Okhuma 36

1Bezaleli ni Oholiyabi ni asilopwana ootheene oowera, mwa yaawo Yave aavanghaawe oowera ni akhili okwanihera miteko sootheene sa oteka wa Nipuro Nootteela*, evareke muteko ntoko Yave aalamulenlaawe.” 2Vano Moisesi aamwiitthana Bezaleli ni Oholiyabi ni asilopwana ootheene oowera, mwa yaawo Yave aaweringhaawe ni yaari oolikaneene orwa ovara muteko. 3Yaahaakhela wa Moisesi sooveleela sootheene aYixrayeli yaaruuhalaaya weera sitekeliweno Nipuro Nootteela*. Khula ooxeexelo atthu yannapwaherera oruuha sooveleela ni otthunawaya. 4Tivawo aratti ootheene yaavara muteko vaNipuroni Nootteela* yooceelinghaaya mitekosaya, 5enamweerela Moisesi: “Atthu anniruuha vanceene opwaha onkwanelaaya weera nivarele muteko Yave olamulenlaawe.” 6Vano Moisesi aahaalamulela weera wahimmwe okonelingwe mutthenga ola: ‘Ahikhaleru mulopwana naari muthiyana aneera apaketho sooveleela sikina wa Nipuro Nootteela*.’ Hiiho atthu yaahiihiwa oruuhatho, 7niwoko yeeyo yaaruuhiwe yaahaattaxa mpaka okwanela muteko wootheene.

Otekiwa wa etabernaakulu*

8Asilopwana ootheene yaawera variyari wa anamiteko yaateka etabernaakulu* ni iluttu muloko sa mpuwa sa nliinya nootteettheya sitthaviweene ni ikuwo sa kanka, sookankela ni sooxeera, ni akerubini* exoreliweenemo. 9Iluttu sootheene sa mpuwa saamulikanela: imeetru* muloko ni piili ni eriyari ya emeetru*, vamoha ni emeetru* emoha ni wookwanaka imeetru* piili. 10Yaaluttanya iluttu ithanu ekina ni ekhwaaya ni yaapaka hiiho ni ithanu sikina iye. 11Vahoolowaya yaattotthelela miramba sa ikuwo sa kanka mukhwipi wa eluttu yookisera ya ithanu soopacera ni hiihotho eluttu yookisera sa ithanu sikina. 12Yaattotthela miramba miloko mithanu muluttuni yookisera ya ithanu soopacera, nitho miramba miloko mithanu muluttuni yookisera ya ithanu sikina moota wooweera miramba siwehaneke. 13Yaapaka ivarelelo miloko mithanu sa eyuuma yoorikaxa evarelaka muteko iye wootthukelelano iluttu ekina ni ekhwaaya weera etabernaakulu* ekhaleke emohamoharu. 14Yaahoopopanya iluttu muloko niimoha sa mapururu a ipuri enapakasa eheema yookhuneelano etabernaakulu*. 15Iluttu muloko niimoha saamulikanela: imeetru* muloko ni tthaaru ni eriyari ya emeetru*, vamoha ni emeetru* emoha ni wookwanaka imeetru* piili. 16Yaaluttanya mpatta mmoha iluttu ithanu nitho ithannamosa sikina mpatta mukina. 17Vahoolowaya yaattotthelela miramba miloko mithanu mukhwipi waaxoriwe wa eluttu yookisera ya ithanu soopacera ni miramba miloko mithanu mukhwipi waaxoriwe wa yookisera ya ithannamosa sikina. 18Yaapaka ivarelelo miloko mithanu sa ebronze* weera ekumanyihe eheema ekhalihaka emohamoharu. 19Yaapakelatho eheema yookhuneelano ya ixapala sa amaankhoro sooningiwa yooxeera, ni vasuluwaya ixapala soohukhiwa. 20Yaapakela etabernaakulu* acikhi a mwiri wa akaasiya*. 21Khula cikhi aakhalano miringo iya: imeetru* ixexe ni eriyari ya emeetru*, vamoha ni wookwanaka emeetru* emoha, 22alubaanyihiwaka veeli weera akumane ni mukhwaawe. Ti hiiho yaapankaaya acikhi ootheene a etabernaakulu*. 23Yaahaapaka acikhi miloko miili mpatta wa ohitto wa etabernaakulu* 24ni vathiwaya nyettosaya miloko mixexe sa eparatha* – nyetto miili wa khula cikhi; mmoha vathi wa khula makumano. 25Vano, wa mpatta mukina ori ottuttuwani wa etabernaakulu*, yaahaapaka acikhi miloko miili, 26ni vathiwaya nyettosaya miloko mixexe sa eparatha* – nyetto miili wa khula cikhi. 27Yaahaapakatho acikhi athannamosa opithela wa etabernaakulu*, eyo tiiyo mpatta ninkela nsuwa, 28ni acikhi eeli yaahiikaathiwa opithela mmaloothoni a etabernaakulu*. 29Acikhi a mmaloothoni meeli awo yaaphitaanyiwa okhuma vathi mpaka osulu, etthukiweene ni munela mmoha. Ooweeli yaapakiwa moota mmoha. 30Vano yaakhala acikhi athannaararu ni nyetto muloko ni mithannamosa sa eparatha*; miili vathi wa khula cikhi. 31Yaapakatho mikoomba mithanu sa mwiri wa akaasiya* wa acikhi a mpatta mmoha wa etabernaakulu*, 32mithanu wa acikhi a mpatta mukina, nitho mithanu wa yaawo a mpatta ninkela nsuwa, opithela wa etabernaakulu*. 33Yaapaka mukoomba wa eriyari weera okhume okhwipi mpaka okhwipi variyari wa acikhi. 34Yaahaahuruwela acikhi ni eyuuma yoorikaxa yooreera ni yaahaapaka annela a eyuumeene yeeyo oolipiherano mikoomba. Vano mikoomba iyo saahuruweliwatho ni eyuumeene yeeyo. 35Yaapaka eluttu ya nliinya nootteettheya etthaveliweene ni ikuwo sa kanka, sookankela ni sooxeera. Vano akerubini* yaaxoriwamo ni anamaxora ooweraxa. 36Yaapakela amarimbu axexe a mwiri wa akaasiya*, enaahuruwela ni eyuuma yoorikaxa. Yaapakelatho ivarelelo sa eyuuma yoorikaxa ni yaatotoxera mikoomba sa eparatha*. 37Vano yaapakela eluttu wa mulako wa eheema ya nliinya nootteettheya yootthaveliwa ni ikuwo sa kanka, sookankela ni sooxeera, yoopakiwa ni namaxora. 38Yaapakela eluttu ivarelelo ithanu ni amarimbu athanu a mwiri wa akaasiya*, enahuruwela ni eyuuma yoorikaxa. Yaahanelatho nyettosaya mithanu sa ebronze*.

Currently Selected:

Okhuma 36: VMK2021

Highlight

Copy