Okhuma 29

Okhalihiwa wa asaserdoti*

1Mwaakhalihe moota ola weera ekirumeele ntoko asaserdoti*: Munkuxe mwaaxaana a emombe ni anapunci eeli oohirakala. 2Mpake ipaawu soohikhalano eferementu ni ephepa yooreerelaxa ya etrigu ni mpaketho iboolu sootakansiwa ni makhura ni ipaawu soozazaala soottikittheliwa makhura. 3Muhele mumpaparani ni mumveleeleno vamoha ni mwaamombe ni anapunci eeli. 4Vahoolowaya munruuhe Aharoni ni anamwanaawe asilopwana vamulako wa Eheema ya Muthukumano* ni mwaavululase. 5Mukuxe soowara sa esaserdoti ni mungwarihe Aharoni evestidu ni yoowara ya vakakasani. Muntthukelele mooxikootti ni laamba ootthaviwa. 6Mungwarihe ecireemba muvarelaka muteko ediyadema* mmuru. 7Vano munghele makhura anttikitthelelaniwa, mmiinelaka mmuru mwa Aharoni. 8Mwaaruuhe anamwanaawe asilopwana ni mwaawarihaseke evestidu 9ni yootthukano mmuru. Muntthukeletho laamba Aharoni ni anamwanaawe asilopwana. Hiiho osaserdoti* ti wawaya niwoko na nlamulo noohimala. Vano nyuwo munkhalihe Aharoni ni anamwanaawe asilopwana moota ola. 10Munruuhe mwaamombe ohoolo wa Eheema ya Muthukumano*. Aharoni ni anamwanaawe asilopwana emwiikaathere matata vamuruwawe. 11Munghite vamaithoni wa Yave vamulako wa Eheema ya Muthukumano*. 12Vano mukuxe mpatta mukina wa ephome ya mwaamombe ni muhinge ni ekatha vamanyakani a altaari*. Vahoolowaya mmiinele yeeyo enghala mukhwipi wa altaari*. 13Vanonto mukuxe makhura ootheene anrukureera marupo – hapa ni miso miili – vamoha ni makhura ari vasuluwaya ni muhise vasulu wa altaari*. 14Wa soothesene, enama, exapala ni mpuule wa mwaamombe sihisiweke okhwipi wa okonelingwe. Ti yooveleela niwoko na yoottheka. 15Munkuxe mmoha a anapunci ni Aharoni ni anamwanaawe asilopwana yiikaathereke matata vamuru wa mwaamunama. 16Munghite, mukuxe ephome ni mmisere mukhwipi moothemwene wa altaari*. 17Munthikilanye napunci intthuri intthuri, muhapihe marupwaaya ni nyettosaya, ni mwiikaathi mpatta siri nyuru ni mipatta sikina. 18Vano munghise napunci mpurukuma valtaarini*. Ti yooveleela yoohisa wa Yave, yoowunkhela yooreeraxa; yooveleela yoopakeliwa Yave vamooroni. 19Munkuxe napunci mukina ni Aharoni ni anamwanaawe asilopwana yiikaathereke matata vamuru wa mwaamunama. 20Munghite, mukuxe ephome ni munghinge okhwipi wa naaru na woolopwana na Aharoni ni anamwanaawe asilopwana. Munghingetho vakathani etokweene ya mmatatani ya moono mulopwana ni mwetto mulopwana wa Aharoni ni anamwanaawe asilopwana. Vahoolowaya mmisere ephome enghala mukhwipi moothemwene wa altaari*. 21Vano mukuxe ephome vakhaani wa altaari* ni makhura vakhaani oottikitthelano ni mummisereno Aharoni ni ikuwosawe ni anamwanaawe asilopwana ni ikuwosaya. Vahoolowaya owo vamoha ni anamwanaawe asilopwana ni ikuwosaya nsitteelihiwe. 22Mvenxe makhura a napunci owo, mpatta woonuna wa mwiila, makhura anghuruwela marupo, makhura aninghuruwela hapa ni miso miili nitho makhura anghuruwela etakhwi yoolopwana. Owo ti napunci a otteelihiwa. 23Mukuxe epaawu yoohikhalano eferementu, eboolu yootakansiwa ni makhura ni epaawu emoha yoozazaala eri mumpaparani ori ohoolo wa Yave. 24Mumvaherere ipaawusene seiyo Aharoni ni anamwanaawe asilopwana ni yiinainiheke ohoolo wa Yave ntoko sooveleela soowiinainihiwa. 25Vahoolowaya mvenxe seiyo mmatatanimwaya ni muhiseke valtaarini* vamoha ni sooveleela soohisa ntoko yoowunkhelaxa yoomusiveliha Yave. Ti yooveleela yoopakeliwa Yave vamooroni. 26Vahoolo wookuxa ehoce ya napunci omvareliwa muteko woomutteelihera Aharoni, mwiinainihere ohoolo wa Yave ntoko sooveleela soowiinainihiwa. Vano eyo eniikhale yawinyu. 27Mutteelihe mipatta sa napunci omvareliwa muteko woomutteelihera Aharoni ni anamwanaawe asilopwana: Ehoce ni etakhwi siinainihiwe. 28Mipatta iya eniimvaheke aYixrayeli Aharoni ni anamwanaawe asilopwana. Eyo ti yoowaandyeererihana ni nlamulo eniikhalihe sooveleelasaya. Ti mipatta sa sooveleelela murettele simpakeliwa Yave sintthuneya omvaha Aharoni ni anamwanaawe asilopwana otthuna ni ohitthuna. 29Soowara sootteela sa Aharoni nsikhale sa ekhapiraawe weera ewarihiwe yaattikittheliwaka ni yaakhalihiwaka. 30Mwaana aneera amurandele Aharoni ntoko musaserdoti* aavolowaka Muheemani ya Muthukumano* weera arumeele vaNipuroni Nootteela* awareke seiyo wa mahuku mathannameeli. 31Munkuxe napunci omvareliwa muteko woomutteeliha Aharoni ni mmwaapeye vaNipuroni nikina Nootteela*. 32Aharoni ni anamwanaawe asilopwana ekhuureke enama ya napunci owo ni epaawu eri mumpaparani, awo ereene vamulako wa Eheema ya Muthukumano*. 33Awo ekhuureke sooveleela seiyo, niwoko wohiiraaniheya mwaha wa seiyo wa okhalihiwawaya ni otteelihiwawaya. Ahikhale mukina anaakhuure seiyo, niwoko ti sootteela. 34Yahala enama ya napunci omvareliwa muteko woomutteeliha Aharoni hoye hoye epaawu mpaka waaxiiye, muhiseke. Sihikhuuriweke seenre sitteelihiwaka. 35Mumpakele Aharoni ni anamwanaawe asilopwana sootheene Miyo koolamulenlaakani, mwaatteelihaka wa mahuku mathannameeli. 36Khula nihuku munghite mwaamombe ntoko yooveleelela yoottheka enruuha wiiraana. Mwaatteelihe altaari* ngwiiraanyihaka ni mwaattikitthele weera ekhale ootteelihiwa. 37Ngwiiraanyihe altaari* wa mahuku mathannameeli mwaatteelihaka. Vano altaari* eniikhale ootteelaxa ni eniyaataveru eniikhale yootteela.

Sooveleela sa khula nihuku

38Vano sooveleela muneeraanyu mpake khula nihuku ti iya: Iputtiputthi piili sa eyaakha emoha. 39Mveleele emoha oxeexelo ni ekina wiilaka. 40Vano ni yooveleela yoopacera, mveleeletho ikiilu* piili sa ephepa ya etrigu yooreeraxa yoowootoweleliwa eliitru* emoha ya makhura a sooliveira* ni eliitru* emoha ya eviinyu ntoko yooveleela yoomiineliwa. 41Mveleele eputtiputthi ekina wiilaka vamoha ni yooveleeleene yeeyo ya ephepa ni ya yoowura ya oxeexelo. Ti yooveleela yoowunkhelaxa enimusiveliha Yave; yoopakeliwa Yave vamooroni. 42Khula ekhapira epake yooveleela yoohisa ela khula nihuku vamulako wa Eheema ya Muthukumano* ohoolo wa Yave. Nipuro nno kinimoophwanyasani ni kinimuuluma ni nyuwo. 43Iwo kinoophwanyaneyawo ni aYixrayeli ni nipuro nno nniitteelihiwe ni ovuwawaka. 44Vano kinootteeliha Eheema ya Muthukumano* ni altaari* ni kinoomutteelihatho Aharoni ni anamwanaawe asilopwana weera ekirumeelase ntoko asaserdoti*. 45Kinookhala variyari wa aYixrayeli kikhalaka Mulukwaaya. 46Awo eniisuwele weera Miyo ti Yave Mulukwaaya, mwa Yoowo aakhuminghe wExipitu weera kikhale variyariwaya. Miyo ti Yave Mulukwaaya.

Currently Selected:

Okhuma 29: VMK2021

Highlight

Copy