awEfeso 1

Khoohiyono wiinela, mene ephattuwelo enyowani

1Ya Pawulo, murummwa a Kristu Yeesu, ntoko Muluku aatthunaawe, wa ootteela ni oororomeleya mwa Kristu Yeesu ari wEfeso: 2wa nyuwo mahala ni murettele onrweela wa Muluku Atithihu, ni wa Apwiya Yeesu Kristu.

Mareeliho a Munepa mwa Kristu

3Oottottopeliwa akhale Muluku ni Atiithi a Apwiyaahu Yeesu Kristu! Vano, mwa Kristu, Owo oonireeliha ni mareeliho ootheene a Munepa ari wiirimu. 4Muluku onithanlale mwa Kristu ehinaaye ephattuwelo ya elapo ya vathi, weera nikhale ootteela ni oohootheriwa vamaithoniwawe. Moosivelanimwawe, 5Owo oonithanla ehinaaye ehuhu weera naakhuleliwe okhala anamwanaawe niwoko na Yeesu Kristu, niwoko wu waari ohakalalawawe ni otthunawawe. 6Nnimuttottopele niwoko na ovuwa wa mahalaawe, mwa yaawo Owo onivanghaawe mwa Oosiveleya. 7Mwa Yoowo nookhalano ovuluxiwa niwoko na ephomaawe, nitho elevelelo ya sootthekasahu. Ti hiiho mihakhu sa mahala a Muluku, 8mwa yaawo Owo oniyeehenraawe ni miruku sootheene ni wiiwexexa wootheene! 9Aanisuweliha ntikhinelo na otthunawawe niwoko na oreerawawe murima Owo oonihenraawe mwa Kristu, 10weera athukumanyihe mwa Yoowo itthu sootheene siri wiirimu, naari sa vathi, yaaphiyaka ekwanihero ya ehuhu. 11Mwa Yoowo nithanliwe ehinaaye ehuhu mwaha wa soovaanela sa Yoowo ompaka itthu sootheene ntoko otthuna wa murimaawe 12weera hiyo nri oopacera omuroromela Kristu, nikhale ottottopela wa ovuwawawe. 13Nyuwo mookhalatho mwa Yoowo vahoolo woowiiwa ni woororomela masu a ekhaikhai, masu ooreeraxa awo yoovulunxeni, ni nyuwo mohiiyaatheriwa ni Munepa Wootteela woororomelihiwa. 14Owo ti ekhaikhai ya yeeyo nneeraahu naakhele mpaka ovuluxiwa wa yaale ari a Muluku, wa ovuwawawe ottottopeliwe.

Otthapela ni nivekelo

15Tivawo, okhuma kiiwalaaka wuulummwa sa ororomelawanyu mwa Apwiya Yeesu, ni sa osivela nyuwo mungwooniheraanyu ootteela ootheene, 16nkinghiya omtthapela Muluku niwoko na nyuwo, kiwuupuwelelakani mmavekelonimwaka. 17Kimvekela weera Muluku a Apwiyaahu Yeesu Kristu, Atiithi oovuwaxa, yoovaheeni munepa wa miruku ni wa eyoonihero weera munsuwele nnenesene. 18Kimvekelatho weera maitho a murimaanyu ekhale oomwaleeleya weera musuwele oweherera mwa weiwo Owo owiitthanenlaaweni ni mihakhu sa yoohiyeraawe* yoovuwaxa Owo oovahenraaweni nyuwo ootteela, 19ni musuweletho ikurusawe sitokotoko soohilikanxereiya wa hiyo ninroromela. Ikuru iyo sootepaxa 20ti ikurusene seiye Owo oonihenraawe mwa Kristu, amvenyererihaka mookhwaani ni amukilaathihaka moonowaawe mulopwana mmapuroni a wiirimu, 21vasuluxa wa ibooma, ikuru, owera, olamula wootheene ni nsina nootheene ningwereya oromola, kheehiyono paahi wa ehuhu ela, mene yeeyotho eneera erwe. 22Muluku iiyaathiye itthu sootheene vathi wa inaawosawe ni oomuthanla ntoko muru wa itthu sootheene wa ekerexa 23eri erutthwaawe, ekwanihero ya Yoole onkwaniha itthu sootheene mwa soothesene.

Currently Selected:

awEfeso 1: VMK2021

Highlight

Copy