Amosi 2
2
1Yave oneera ha: “Niwoko na sootakhala sincipale seereiye oMowabe, nkirwa kihiya omuttaruxa. Vano owo oohisa mpaka olaliha makhuva a mwene a awEdomi. 2Tivawo kineeraaka kirumihele mooro oMowabe olaliheke moolipamo mwa oKeriyote. Mowabe onoolakaseya mmunyakunyakuni mutokotoko, okhuwelaxiwaka mukhottoni ni moorumani mwa nipalapatta. 3Kinoomphwata mulamulaawe kiwiiveke asitokweenaawe vamoha ni yoowo,” onghima Yave. 4Yave oneera ha: “Niwoko na sootakhala sincipale seereiye oYuda, nkirwa kihiya ottaruxa. Vano aYuda aakhootta Nlamulo na Yave ni khayiiwelenle ikanosawe, niwoko aalokottheya ni miluku soowootha, mwa seiyo yaattharaaya makholowaaya. 5Tivawo kineeraaka kirumihele mooro oYuda, olaliheke moolipamo mwa oYerusaleemu.”
Othorihiwa wa oYixrayeli
6Yave oneera ha: “Niwoko na sootakhala sincipale seereiye oYixrayeli, nkirwa kihiya ottaruxa. Awosa animuthumiha ni eparatha* oororomeleya, nitho ikwakwaatta piili oohaawa . 7Annyikala muru wa oothoiwa, mooteene yoowo annyikalaaya ntthupi, ni animukhoottela ompakela ekhaikhai oohasuliwa. Tiithi ni mwaana animukonano muthiyana mmoharu, ehiirihaka hiiho Nsinanaka Nootteela. 8Anuuramela ohoolo wa yakhalaru altaari* ewanreene ikuwo sooweemexeriwa. Ereene mpaani mwa mulukwaaya, angwura eviinyu yoothummwa ni musurukhu wooliviwa mmulattuni. 9Yaaroorakamaxaru ntoko mwiri wa esidari*, ni yaaroolipaxaru ntoko ikaravaliyu, ti Miyo kaaphwante awAmori ohoolo wa aYixrayeli. Koovurula soowiimasaya, kinaruttumula mikwankhwaarisaya. 10Ti yoomeene kookhumihaleni wExipitu, kinaweettihani iyaakha miloko mixexe munikareni, weera koovaheeni elapo ya awAmori. 11Kohaathanlatho anamwaniinyu akina akina asilopwana weera ekhale maprofeeti, ni akina akina a amiravowaanyu weera ekhale aNaziri*. Muloko wa oYixrayeli, kheehiyono ettiitthu?” onghima Yave. 12“Vaheera nyuwosa moopakiha weera aNaziri* ewure eviinyu, munaalamulela maprofeeti weera ehithalihere otthuna wa Muluku. 13Vanonto, Miyo kinooweetheyasani ntoko ekaaro eneetheyaaya etthaya elemelaxiweene etrigu. 14Oowaaluweya khoopowa, oolipa khalipa, ni nakhotto khoopola okumaawe. 15Namalatha muura khapwaherera okhala vanipuroniwawe, ontthimaka khatthawa, ni namweettiha a ekavalu* khoopola okumaawe. 16Nihuku nno mpaka anakhotto oolipihaxa murima anootthawa tiriya,” onghima Yave.
Currently Selected:
Amosi 2: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
