Miteko 21

Mukwaha wa oYerusaleemu

1Naalaxerakaru, naavolowa munikulani ni naalapuwa nirowaka oKosi. Oxaawaya naarowa oRodi ni evenyero vaavaale mpaka oPatara. 2Niphwanyaka nikula neera nilapuwele oFenisiya, naavolowa ni naapwaha. 3Noonakaru oKipro ni niviraka mpattaaya ohitto, naalapuwela oSiriya. Naakhuruwa oTiro, weiwo nikulanahu neeraaya nakuruxe murindaaya. 4Naaphwanyaka oohusera weiwo, naakhala ni yaawo mahuku mathannameeli. Awo, mMunepani, yaamooperera Pawulo weera ahirowe oYerusaleemu. 5Nimalihakatho ehuhuwaahu weiwe, naapwaha ni naapwaherera mukwahaahu. Oohusera ootheene ni axaaraya ni anamwanaaya yaanihoola mpaka okhwipi wa esidade, ni iwe, mukerekhere wa ephareiya, naakokhora ni naavekela. 6Nilaxeranaka, naavolowa munikulani, ni awo yaahokoleela owannyaya. 7Okhuma oTiro naapwaherera mukwahaahu ni naaphiya oPitolemaide weiwo naawuulumihalaahu axunna ni naakhanlaahu nihuku nimoha. 8Nipwahaka oxaawaya, naaphiya oSesareya ni naakhala vaate wa Filipe, namasu ooreeraxa*, mmoha a athanneeli. 9Owo aakhalano aximwali axexe yaari maprofeeti* a Muluku. 10Nimalaka weiwo mahuku makina, aahoorwa mprofeeti mmoha iitthaniwa Agabo, akhumaka oYudeiya. 11Akumanaka ni hiyo, aamukuxa laamba a Pawulo, ni atthukaka matataawe ni inaawosawe, aaheera: “Munepa Wootteela weenre hiiho: ‘Mooteene yoola, aYuda eniimutthuke muneene a laamba ola oYerusaleemu ni eniimvaherere wa amalapo.’” 12Niiwakaru yeeyo, hiyo ni atthu a weiwe naamudyoonttelela Pawulo weera ahirowe oYerusaleemu. 13Vano Pawulo aawaakhula: “Heeni nyuwo muniinlaanyu ni munthananihaanyu murimaaka? Koolikana khoohiyono otthukiwa paahi, menetho weera kikhwe oYerusaleemu niwoko na Nsina na Apwiya Yeesu.” 14Woonaka weera khanaawera omviriyela, naamuhiya ni naaheera: “Otthuna wa Muluku opakiwe.” 15Vahoolowaya, naahiireherera ni naarowa oYerusaleemu. 16Akina a oohusera a oSesareya yaanihoola ni yaanikuxa, enironghaka vaate wa Munasoni, weiwo waatthuneyaaya weera nikhale. Owo aari mutthu a oKipro ni mmoha a oohusera oopacera.

Ophiya wa Pawulo oYerusaleemu

17Naphiyalaahu oYerusaleemu, axunna yaanaakhelela ni ohakalala. 18Oxaawaya Pawulo aarowa ni hiyo weera nimukumanane Yakobe ni asitokweene a ekerexa ootheene yaari weiwe. 19Pawulo aawuulumiha ni aahaathalihera nnenesene yeeyo Muluku aapakaawe variyari wa amalapo niwoko na mutekwaawe. 20Yiiwaka yeeyo, yaamuttottopela Muluku ni yaamweerela Pawulo: “Ntoko munoonaanyu, munna, aakhala aYuda ancipale aroromenle ni ootheene awo ari ni nthiti munlamuloni. 21Awo yaaleeliwa weera nyuwo munaaxuttiha aYuda ootheene ankhala variyari wa amalapo weera esuse wa mahusiho a Moisesi, ngweerelaka weera ehiwiinele anamwanaaya, naari ehitthare ikhovelelosahu. 22Nneereke hai? Vekhaikhai awo anoosuwela weera moophiya, 23tivawo mupake yeeyo hiyo nnooleelaahuni. Ari ni hiyo asilopwana axexe yaalipenle. 24Mwaakuxe asilopwana ala ni mwiirapihe vamoha ni yaawo ni mwaalivele weera emetthe mayihi. Hiiho ootheene anoosuwela weera kheehiyono ekhaikhai yeeyo enghimmwa ya nyuwo, mene weera mumpwaherera wiiwelela nlamulo. 25Mwaha wa amalapo arukunxale murima, nohaalepela yoolakelaahu weera ehiyeke inama sooveleeliwa wa miluku sikina, ehiwure ephome ya inama sinnyopotoliwa, ni ehiraruwe.” 26Oxaawaya Pawulo aahaakuxa asilopwana ale ni aahiirapiha vamoha ni yaale. Vahoolowaya aarowa Empa ya Muluku weera aaleele ehuhu orapiha eneeraaya ekwanihere ni nihuku nlivo nneeraaya nipakiwe wa mutthu ti mutthu.

Otthukiwa wa Pawulo

27Ekhuveelaka omaliha mahuku mathannameeli, aYuda akina a elapo ya wAsiya, emoonaka Pawulo Mpaani mwa Muluku, yaahaasesera atthu ancipale ni yaamvara 28ekhuwelaka: “aYixrayeli, munikhavihere! Ola ti mulopwana onaaxuttiha ootheene a ilapo sootheene itthu siniittana ni mulokwaahu, nlamulonahu ni nipuro nna. Ohiya toko yeeyo, owo aahaavoleiha aGrego Mpaani mwa Muluku ni aananariha Nipuro Nootteela* nna.” 29Khalayi yaamoona muwEfeso Trofimo vamoha ni Pawulo musidadeni ni yaahuupuwela weera Pawulo aamuvoleiha Mpaani mwa Muluku. 30Esidade yootheene yaanyakuleleya ni atthu ancipale yaathukumana. Emvaraka Pawulo, yaampurulela vaate wa Empa ya Muluku, ni woowaakuveya milako saawaliwa. 31Yeereraka omwiiva, muhooleli a anakhotto a aRooma aahaakhela ihaali weera esidade yootheene ya oYerusaleemu eri ni owali. 32Woowaakuveya owo aahaakuxa asitokweene ni anakhotto akina ni aatthimakela variyari wa atthu ancipale. Emoonaka muhooleli ni anakhottwaawe, yaahiya ommana Pawulo. 33Muhooleli aaphiya, anamutthuka ni analamulela weera owo atthukiwe ni onyooro miili. Vano aakoha weera owo aari taani ni aapanke eheeni. 34Akina a atthu ancipale yaakhuwela etthu emoha, ni akinatho etthu ekina. Ahiweraka osuwela nnenesene yeeyo yaakhumelenle niwoko na onyakuleleya, muhooleli ole aahaalamulela weera Pawulo aronghiwe okwarteli. 35Aphiyakaru vaskadani, onyakuleleya wa atthu ancipale waatepaxa moota wooweera waatthuneya owo oteexiwa ni anakhotto. 36Atthu ancipale yaamutthanre yannapwaherera okhuwela: “Mmviive!”

Pawulo onuuluma ni aYuda

37Anakhotto yeeraka emvoleihe Pawulo mukwarteli, owo aamvekela muhooleli a anakhotto: “Kooleelekeni etthu?” Owo aamukoha Pawulo: “Nyuwo munuuluma eGrego? 38Nyuwo khamuhiyono ngwExipitu khalayeene vakhaani aapacenre onyakulihana, ni aakunxe munikareni anamwiiva macira miloko mixexe?” 39Pawulo aamwaakhula: “Kiri muYuda a oTarso, esidade yoottittimiheyaxa ya elapo ya oSilisiya. Mukihiye kuulume ni muloko wa atthu.” 40Atthuniheriwaka ni muhooleli, Pawulo eemenleene vaskadani, aahaamaaliha aathoonyeraka ni matata. Emaalakaru ootheene, aaweerela ni nuulumo na eHeberi:

Currently Selected:

Miteko 21: VMK2021

Highlight

Copy