2 aKorinto 13
13
Soowooperera sookisera
1Ela eniikhale emaara yanaararu kineeraaka kooxekureni. “Milattu sootheene ontthuneya weera sikhaviheriweke ni anamoona eeli, naari araru.” 2Miyo kaawoopererani kaaraaka ni nyuwo emaara yanaaveeli. Vano, kihikhanlewo, kinaalepela yaawo yaatthenke khalayi ni wa akina ootheene: kaahokolowaka, nkiwuurela, 3woonaka weera nyuwo munaasa woonihera weera Kristu onuuluma mwa miyo. Owo khahiyono oohilipa ooreherakani, mene a ikuruxa variyariwanyu. 4Vekhaikhai, aathomeiwa moohilipani, mene onkhala ni ikuru sa Muluku. Mooteene yoowo, nri oohilipa mwa Yoowo, mene ni ikuru sa Muluku nnikhale ni Yoowo, noorehererelakani nyuwo. 5Mmwiwehawehe nnenesene weera moone nyuwo mwaari munroromeloni. Mooneke asineenaanyu! Khamusuwenle weera Kristu Yeesu ori mwa nyuwo, ohikhanle weera apaale khamwaakhuleliwe? 6Koororomela weera moosuwela weera hiyo ti oowaakhuleleya. 7Vano, nnimvekela Muluku weera nyuwo muhipake etthu yoonanara. Khoohiyono weera akina yoone weera hiyo nohaakheleliwa, mene weera nyuwo mpake yeeyo eri yooreera, naamwi okhalaka ntoko hiyo nohooceela. 8Vano khaningwera ovaanya ekhaikhai, mene waakhulela yeeyo paahi. 9Ninnahakalala imaara sootheene nihinlipaahu ni nyuwo munlipaanyu. Nivekelonahu ti weera nyuwo mukhale ookwanelihiwa. 10Tivawo kinlepaaka itthu iya kihikhanlewo weera, miyo kaarwaaka, khoontthuneya woohiihani, kivarelaka muteko ikuru Apwiya akivanghaaya. Aakivaha ikuru iya weera koopuhiheni, ohikhanle woophwatani.
Isalaama sookisera
11Kihipwahereraka axunna, miyo kinoolaxerani. Mwaase wiikwanihera, ni mwiiwe nivekelonaka. Muupuweleke etthu emoharu, mukhaleke ni murettele. Ni Muluku a osivela ni a murettele anaakhale ni nyuwo. 12Muulumihaneke ni ebeecu yootteela. 13Ootteela ootheene anoovahani isalaama. 14Mahala a Apwiya Yeesu Kristu, osivela wa Muluku, ni wiiwanana wa Munepa Wootteela okhale ni nyuwo ootheene.
Currently Selected:
2 aKorinto 13: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
