1 aKorinto 7
7
Mwaha wa othelana
1Mwaha wa milattu nyuwo mukilepenlaanyu, ti wooreera weera mulopwana ahithelane ni muthiyana, 2mene niwoko na oraruwa, ontthuneya weera khula mulopwana amutheleke mwaarawe, ni khula muthiyana ni iyawe. 3Mulopwana akwanihereke yeeyo entthuneya ni mwaariye moothelanani, ni muthiyana akwanihereke yeeyo entthuneya ni iyawe moothelanani. 4Muthiyana khanono ikuru ni erutthwaawe muneenaawe, mene aani, iyawe. Ni hiihaawotho, iyawe khanono ikuru ni erutthwaawe muneenaawe, mene aani, mwaariye. 5Muhikhoottelane okona vamoha, ohikhanle wa ehuhu vakhaani ni mwiiwanane, weera ehuhuweene yeeyo muvilele mmavekeloni. Vahoolowaya, mupwaherere okona vamoha weera ahiweerereni Satana niwoko na ohiisuumaalihawanyu. 6Eyo miyo kinooleelaakani ti yootthuniheriwa, mene kheehiyono nlamulo. 7Kaatthuna weera atthu ootheene ekhaleke ntoko miyo, mene khula mutthu orino mahalaawe muneenaawe wa Muluku – mmoha moota hiiho, mukina mootaawe. 8Kinaaleela athupa ni asinaamukhweli: ti wooreera okhala mahuku ootheene ntoko miyo. 9Yaahiweratho wiisumaaliha, ethelaneke, niwoko fataari othelana, ohikhanle ohaawelaxa okonano. 10Wa oothelana kinaavaha nlamulo nna, hoye, nkihiyono miyo, mene ti Muluku onaavaha: mwaariye ahimwalaneke ni iyawe. 11Amwalanatho, akhaleke oohithelana, hoye hoye iiraaneke ni iyawe. Iyawetho ahimwalaneke ni mwaariye. 12Wa akina ti miyo kinaaleela yeeyo, khaahiyono Apwiya: Akhala munna orino mwaariye oohiroromela, ni yoole atthuna okhala vamoha ni iyawe, ahimwalaneke. 13Vano, akhala muthiyana orino iyawe oohiroromela, ni yoole atthuna okhala vamoha ni mwaariye, ahimwalaneke, 14niwoko iyawe oohiroromela ti ootteelihiwa niwoko na mwaariye, ni mwaariye oohiroromela ti ootteelihiwa niwoko na iyawe. Wahaakhanle hiiho, anamwaniinyu yaakhala oohitteela, mene vano ootteela. 15Wa soothesene, mutthu oohiroromela amwalana, amwalaneke. Weereya hiiho, munna, naari murokora muKristu, khahiyono ootthukiwa, niwoko Muluku onniitthana weera nikhale ni murettele. 16Nyuwo mwaara, taani ansuwela – apaale mmwimvuluxe iyinyu? Hoye hoye nyuwo iya, taani ansuwela – apaale mmwimvuluxe mwaarinyu? 17Vanonto, khula mutthu apwaherere okhala moota Muluku onithoonyenraawe ntoko Owo onniitthanaawe. Nna ti nlamulonaka wa ikerexa sootheene. 18Mukina iitthaniwa areene oowiineliwa? Iineliwe. Mukinatho iitthaniwa ohiineliwa? Ahiineliwe. 19Hata wiineliwa, naari ohiineliwa khoonthoonyera etthu. Yootthuneya ti wiiwelela malamulo a Muluku. 20Khula mutthu apwaherereke ntoko aaraawe oowiitthaniweene ni Muluku. 21Nyuwo mwiitthaniwa mureene epottha? Muhixupeye ni yeeyo. Vano nyuwo mwawera ophwanya oneethi, ngwereke. 22Vano, yoole oniitthaniwa mwa Apwiya, areene epottha, ti neethi a Apwiya, onlikana ntoko yoole aari neethi iitthaniwaawe mwa Apwiya, ori epottha ya Kristu. 23Nyuwo moothummwa ni mutteengo. Muhithatuwe ipottha sa atthu. 24Axunnaka, khula mutthu akhaleke ohoolo wa Muluku moota yoowo iitthaniwaawe. 25Mwaha wa aximwali oowiikosoopa, nkinono nlamulo na Apwiya, mene kimvaha mirukusaka ntoko mukina ori oororomeleya niwoko na ikharari sa Muluku. 26Niwoko na milattu sa vaanaano, kinuupuwela weera fataari mulopwana akhale ntoko oraawe. 27Nyuwo muri oothelana? Muhaasaase omwalana. Nyuwo muri muthupa? Muhimwaase mwaara. 28Vaheera mwathela, khamunono yoottheka, ni mwaamwali oowiikosoopa atheliwa, khanonotho yoottheka. Vano yaawo athelanne eniikhalane sookacamiha sincipale mookuminimwaya ni kintthuna owoopolani mwa yeeyo. 29Mwaakiiwaka hiiho, kinghima weera ehuhu eri vakhaani. Okhuma vaanaano vaava, yaale ari ni axaaraya, ekhaleke ntoko khaanono; 30yaale aniinla, ntoko khaaniinla; yaale anghakalala, ntoko khaanghakalala; yaale anthuma etthu, ntoko khaanono etthu; 31yaale amvarela itthu sa elapo, ntoko khaamvarela, niwoko mukhalelo wa vaanaano oneera oviraka. 32Kaatthuna owoonani muhikhanleno sookacamiha. Mulopwana ohithenle oneeteteya ni itthu sa Apwiya, aasaasaka moota heeni aneeraawe aasivelihe Apwiya. 33Vano mulopwana oothela oneeteteya ni itthu sa elapo ela, aasaasaka moota heeni aneeraawe amusivelihe mwaariye, 34ni ookawanyeya. Hiihotho muthiyana ohitheliwe ni mwaamwali oowiikosoopa oneeteteya ni itthu sa Apwiya, weera ekhaleke ootteela mweerutthuni ni mmunepani. Ootheliwatho oneeteteya ni itthu sa elapo ela – moota heeni aneeraawe amusivelihe iyawe. 35Kinooleelani yeeyo wa oreelawanyu khoohiyono weera kiwooceeliheni, mene weera mukhale moota wooreera ni mwaarumeele Apwiya ni murima wootheene. 36Akhala mukina onoona wuuliha muru niwoko noowoona weera muthiyana omutthomenraawe onoopwaha masusa ooreera omuthela, ni uupuwelaka weera fataari othelana, apakeke ontthunaawe. Owo khanttheka ni yeeyo. 37Wa soothesene, yoole onlipiha mmurimanimwawe ahittharaka soohaawelasawe, mene oniisuumaaliha ni otthunawawe, nitho alakela ohithelana ni omutthomenraawe, yoowo ompakatho nnene. 38Moota hiiho, yoole onthelana ni muthiyana omutthomenraawe, ompaka nnene, mene yoole ohinthelana ni yoowo, ontepaxa opaka nnene. 39Muthiyana ori vamoha ni iyawe owo areene ni okumi. Vano, iyawe akhwa, owo anaawere otheliwa ni mulopwana aneeraawe amutthune, mene ontthuneyaxa weera owo akhaleke muKristu. 40Woonawaka, muthiyana owo anaakhale oohakalalaxa aakhalaka oohitheliwa. Kinuupuwela weera kookhalanotho Munepa wa Muluku.
Currently Selected:
1 aKorinto 7: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
1 aKorinto 7
7
Mwaha wa othelana
1Mwaha wa milattu nyuwo mukilepenlaanyu, ti wooreera weera mulopwana ahithelane ni muthiyana, 2mene niwoko na oraruwa, ontthuneya weera khula mulopwana amutheleke mwaarawe, ni khula muthiyana ni iyawe. 3Mulopwana akwanihereke yeeyo entthuneya ni mwaariye moothelanani, ni muthiyana akwanihereke yeeyo entthuneya ni iyawe moothelanani. 4Muthiyana khanono ikuru ni erutthwaawe muneenaawe, mene aani, iyawe. Ni hiihaawotho, iyawe khanono ikuru ni erutthwaawe muneenaawe, mene aani, mwaariye. 5Muhikhoottelane okona vamoha, ohikhanle wa ehuhu vakhaani ni mwiiwanane, weera ehuhuweene yeeyo muvilele mmavekeloni. Vahoolowaya, mupwaherere okona vamoha weera ahiweerereni Satana niwoko na ohiisuumaalihawanyu. 6Eyo miyo kinooleelaakani ti yootthuniheriwa, mene kheehiyono nlamulo. 7Kaatthuna weera atthu ootheene ekhaleke ntoko miyo, mene khula mutthu orino mahalaawe muneenaawe wa Muluku – mmoha moota hiiho, mukina mootaawe. 8Kinaaleela athupa ni asinaamukhweli: ti wooreera okhala mahuku ootheene ntoko miyo. 9Yaahiweratho wiisumaaliha, ethelaneke, niwoko fataari othelana, ohikhanle ohaawelaxa okonano. 10Wa oothelana kinaavaha nlamulo nna, hoye, nkihiyono miyo, mene ti Muluku onaavaha: mwaariye ahimwalaneke ni iyawe. 11Amwalanatho, akhaleke oohithelana, hoye hoye iiraaneke ni iyawe. Iyawetho ahimwalaneke ni mwaariye. 12Wa akina ti miyo kinaaleela yeeyo, khaahiyono Apwiya: Akhala munna orino mwaariye oohiroromela, ni yoole atthuna okhala vamoha ni iyawe, ahimwalaneke. 13Vano, akhala muthiyana orino iyawe oohiroromela, ni yoole atthuna okhala vamoha ni mwaariye, ahimwalaneke, 14niwoko iyawe oohiroromela ti ootteelihiwa niwoko na mwaariye, ni mwaariye oohiroromela ti ootteelihiwa niwoko na iyawe. Wahaakhanle hiiho, anamwaniinyu yaakhala oohitteela, mene vano ootteela. 15Wa soothesene, mutthu oohiroromela amwalana, amwalaneke. Weereya hiiho, munna, naari murokora muKristu, khahiyono ootthukiwa, niwoko Muluku onniitthana weera nikhale ni murettele. 16Nyuwo mwaara, taani ansuwela – apaale mmwimvuluxe iyinyu? Hoye hoye nyuwo iya, taani ansuwela – apaale mmwimvuluxe mwaarinyu? 17Vanonto, khula mutthu apwaherere okhala moota Muluku onithoonyenraawe ntoko Owo onniitthanaawe. Nna ti nlamulonaka wa ikerexa sootheene. 18Mukina iitthaniwa areene oowiineliwa? Iineliwe. Mukinatho iitthaniwa ohiineliwa? Ahiineliwe. 19Hata wiineliwa, naari ohiineliwa khoonthoonyera etthu. Yootthuneya ti wiiwelela malamulo a Muluku. 20Khula mutthu apwaherereke ntoko aaraawe oowiitthaniweene ni Muluku. 21Nyuwo mwiitthaniwa mureene epottha? Muhixupeye ni yeeyo. Vano nyuwo mwawera ophwanya oneethi, ngwereke. 22Vano, yoole oniitthaniwa mwa Apwiya, areene epottha, ti neethi a Apwiya, onlikana ntoko yoole aari neethi iitthaniwaawe mwa Apwiya, ori epottha ya Kristu. 23Nyuwo moothummwa ni mutteengo. Muhithatuwe ipottha sa atthu. 24Axunnaka, khula mutthu akhaleke ohoolo wa Muluku moota yoowo iitthaniwaawe. 25Mwaha wa aximwali oowiikosoopa, nkinono nlamulo na Apwiya, mene kimvaha mirukusaka ntoko mukina ori oororomeleya niwoko na ikharari sa Muluku. 26Niwoko na milattu sa vaanaano, kinuupuwela weera fataari mulopwana akhale ntoko oraawe. 27Nyuwo muri oothelana? Muhaasaase omwalana. Nyuwo muri muthupa? Muhimwaase mwaara. 28Vaheera mwathela, khamunono yoottheka, ni mwaamwali oowiikosoopa atheliwa, khanonotho yoottheka. Vano yaawo athelanne eniikhalane sookacamiha sincipale mookuminimwaya ni kintthuna owoopolani mwa yeeyo. 29Mwaakiiwaka hiiho, kinghima weera ehuhu eri vakhaani. Okhuma vaanaano vaava, yaale ari ni axaaraya, ekhaleke ntoko khaanono; 30yaale aniinla, ntoko khaaniinla; yaale anghakalala, ntoko khaanghakalala; yaale anthuma etthu, ntoko khaanono etthu; 31yaale amvarela itthu sa elapo, ntoko khaamvarela, niwoko mukhalelo wa vaanaano oneera oviraka. 32Kaatthuna owoonani muhikhanleno sookacamiha. Mulopwana ohithenle oneeteteya ni itthu sa Apwiya, aasaasaka moota heeni aneeraawe aasivelihe Apwiya. 33Vano mulopwana oothela oneeteteya ni itthu sa elapo ela, aasaasaka moota heeni aneeraawe amusivelihe mwaariye, 34ni ookawanyeya. Hiihotho muthiyana ohitheliwe ni mwaamwali oowiikosoopa oneeteteya ni itthu sa Apwiya, weera ekhaleke ootteela mweerutthuni ni mmunepani. Ootheliwatho oneeteteya ni itthu sa elapo ela – moota heeni aneeraawe amusivelihe iyawe. 35Kinooleelani yeeyo wa oreelawanyu khoohiyono weera kiwooceeliheni, mene weera mukhale moota wooreera ni mwaarumeele Apwiya ni murima wootheene. 36Akhala mukina onoona wuuliha muru niwoko noowoona weera muthiyana omutthomenraawe onoopwaha masusa ooreera omuthela, ni uupuwelaka weera fataari othelana, apakeke ontthunaawe. Owo khanttheka ni yeeyo. 37Wa soothesene, yoole onlipiha mmurimanimwawe ahittharaka soohaawelasawe, mene oniisuumaaliha ni otthunawawe, nitho alakela ohithelana ni omutthomenraawe, yoowo ompakatho nnene. 38Moota hiiho, yoole onthelana ni muthiyana omutthomenraawe, ompaka nnene, mene yoole ohinthelana ni yoowo, ontepaxa opaka nnene. 39Muthiyana ori vamoha ni iyawe owo areene ni okumi. Vano, iyawe akhwa, owo anaawere otheliwa ni mulopwana aneeraawe amutthune, mene ontthuneyaxa weera owo akhaleke muKristu. 40Woonawaka, muthiyana owo anaakhale oohakalalaxa aakhalaka oohitheliwa. Kinuupuwela weera kookhalanotho Munepa wa Muluku.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.