Luka 16
16
Wikhori wa Mughondaniyi në Muhughangu
1Mweeso no agavakhanëa asëywi vakwe, “Are urëfo muntu umwedu mughwarë naarë ukweti na mughondanëyi masitaka arë ëutowa kunë mweeso mwino muntu uyi ugutumëa mari vivë. 2Na mweeso agamwëtana mweeso agamwëra, ‘Nkhani këë ëyii nënguitegheya kunë vee? Funya isabu ra ughondanëyi wako, gusoko utiutendeka meneja kangë.’ 3Na mughondanëyi wasuu agahanya mughonjo unkhoo akwe, ‘Ngutenda urëë, nëhikwë müküü wane wang'ëya mwëmo wa meneja? Nene ntikwetë nguu ya udaha urëma, na uromba nguona mënyaa. 4Naramua mwino ngutenda, gusoko antu vaje ung'enyifa nene umakhaya ao nëhikwë na junchwa unji umwëmo wa umeneja.’ 5Uvii, agavaëtana anyahirë va mukuu, wakwe vëgiirekeanga, agamukhanëa wa mwandyo, ‘Müküü wane ugugudai hela inga?’ 6Mweeso agasucha, ‘Müküü ugundai nene makuta a nyanyi mafifa ighana rëmwedu.’ Agamwëra ‘Hoa ibada rako ra deni ako na wikhae urëë fangë uandëke makumi atano.’
7“Na kangë agamukhanëa muuya wa gavëë, ‘Na veve ugudaiwa inga?’ Agasucha, ‘Nene ngudaiwa magunëa ighana angano.’ Mweeso agamwira mweeso, ‘Hoa ibada, rako ra deni ako uandëke makumi munana.’ 8Müküü wasuu agamukumajua mughondanëyi në muhughangu gwa ihaa rakwe. Gusoko vana va murëmi urui vina mahaa ino na ufafo wao aghonjo ukëa vana va weru. 9Na nee ngumukhanëa nyenye, tuungi mbuya na mari a nëti atutë, në hikwë ahia vamughenyife umëkhao akhae na khae. 10Mweeso unë wina uhuvëi mu mantu në manyui ino na ugutendeka muhuvëi umantu në makuunoo. Na mweeso unë timuhuvëi umantu në manyui ino atiutendeka muhuvëi gwa ayoo në makuunoo. 11Nëmbesa nyenye arë mutiahuvëi umari a murëmi anyu në ugumufa nyenye utakii wa tutë? 12Na nëmbesa mwinatendeka mwahuvëi umari ya muntu ungëja, anyu në ugumufa nyenye në yanyu aghonjo? 13Gutie muntu nëugudaha utumekëa aküü vavëë. Gusoko mweeso ugumuhura umwedu na umuyanja muuya, fangëja ugumutegheeya uyoo nangu, umwedu na umuhorya muuya. Mutiudaha umutumekëa Muungu na hela.”
Mërighëëtyo a Mwa Yesu
(Mat 11:12-13; 5:31-32; Mrk 10:11-12)
14Na Afarisayo, naarë ayanja hela, vëgategheya asaa oong'e, vëgamuhorya mweeso. 15Ëgweeso mweeso agavakhanëa, “Nyenye mwë avoo nëvitendie anya tutë aghonjo usonge antu, ëgweeso Muungu umanyie nkho yanyu. Gusoko gasëkë nëgigheete mukhatë antu mwino giija ino Muungu ugikengee mwino mpaara. 16Seria nanë Maandëko anyagëdaghu arë arëfo faka ikhondo ramwa Yohana. Ufuma hafo Sayu Njija a utëmi wa Muungu ëgutanantiwa, na mu muntu uguingëa gwa nguu. 17Ëgweeso guoro ino irunde na ng'ë ukëa, ukëa gwa gahada gamwedu ga seria uheeywa. 18Mugëkaku muntu në wamureka mukhema wakwe na uroghoa ungëja ahoo watenda ulëhadi, na wasuu në wamuroghoa wasuu në warekiwe na mughohi walëhada.”
Mughwarë nanë Lasaro
19“Arë urëfo muntu umwedu mughwarë areë uguya a maasa aikeru ra sambarau na mputi ya gëtani në njija na utenda ngoi muitiku. 20Na ugënyamwango arë uguraëchwa mutuki umwedu rina rakwe Lasaro, arë wina maronda, mwëërë woong'e 21mweeso arë ugulia makhokho nëëugwanga ufuma unto a mesa a mughwarë wasuu, mbwa nyingë arë yuuja na umuramba maronda akwe. 22Na mutuki uyi agakuya na agahowa na malaëka faka ugëkua gamwa Ibrahimu. Na mughwarë wasuuno agakuya agaëkwa. 23Na gwa arungu, naarë ugumakhasëko. Mweeso agahumbua miho akwe unto agamwona Ibrahimu kue na Lasaro ugugëkua gakwe. 24Agaëtana gwa ruri në aküü, Tata Iburahimu, unyone uvai nene, umutume Lasaro ahombie songe a mwachaa wakwe umajë ariure urëmë wane. Gusoko ngukhasëka ino umoto urui. 25Ëgweeso Iburahimu agamwëëra, këmbukwa mwanane mwino veve muduvi wako wahangie mantu në maja, na Lasaro wahangie mantu në mavë. Ëgweeso itungwee mweeso hafai ugufefeheywa na veve ugukhaswa. 26Na mbesa asaa oong'e ayai, mukhatë itu nanyee rëëhëmbiwe ikhombo rikuu gusoko vasaa nëvëufenja ufuma hafai uja kunë nyenye vatadahe, na gutie në ugudaha ufuma kuuko uja kunë sese. 27Na mweeso agahanya, ‘Uvii nguguromba vee, tata, umutume mweeso khamwa tata wane, 28gusoko nëkweti aruuna vane vatano ende uvasudangëa veeso vatajeno vaje hafai umakhasëko.’ 29Gweeso Ibrahimu agahanya, ‘Vaakweti va Musa na anyagëdaghu vavategheya veeso.’ 30Na mweeso agahanya, ‘Tiuyi, tata Ibrahimu, ëgweeso nëmbesa muntu ende ufuma gwa akuyi, vëufea.’ 31Mweeso agamukhanëa Nëmbesa vadie uvategheeya Musa na anyagëdaghu, vatiufefeheywa nambesa muntu afëtye ufuma gwa akuyi.”
Currently Selected:
Luka 16: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.