Vaeburania 5

1Mu mükumbëki në müküü uguhwaaniwaa udua mukhatë a antu gusoko a umütümamëa Muungu gusoko awe, ufunya dahwa na ikumbëko gusoko a mahutye awe. 2Gusoko mweeso mughonjo uu mülegheku udahëte uvaonëa uvavi vasaa nëvëtimanyie intu na nëvëutendaa mahutye. 3Na gusoko mweeso mughonjo unë mulegheeku, imunoneye utenda ikumbëko ti gutufu gusoko a antu, ëgweeso noo gusoko a mahutye akwe. 4Gutie muntu nëugudaha gihoreya mughonjo iküryo na utendeka mükumbëki müküü. Muu muntu uguhwaaniwaa na Muungu utenda mükumbëki në müküü mwino ëtë na urë Aaroni.

5Uvii uvii, Kiristo noo inihoreyaa mughonjo iküryo ra utenda Mükumbëki në Müküü ëgweeso

Muungu agamwëëra:

“Veve wëë Mwananë,

nene rëo natendaa tata wako.”

6Agahanya noo guungëja:

“Veve wee mükümbëki khae na khae

gwa uhonga ntende a ükumbëki

wamwa Melikisedeki.”

7Yesu nënaa uguduvaa afaa mu urëmi, gwa gëëro gëküü na ndighiigho, agakürya na umuromba Muungu nënaa wina udaho wa umutyoa ufuma ikuya, mweeso agategheeywa gusoko a umükürya Muungu. 8Gweeso, mbesa naa Mwana wa Muungu, agisëya ntende në njija gwa njëa a makhasëko. 9Na nënaa watendwa ukhondekekie agatendeka mwandyo wa utyoi wa khae na khae gwa vasaa voong'e nëvëumutegheeya. 10Mweeso Muungu agamuhwaania utenda mükumbëki müküü gwa uhonga ntende a ükümbëki wamwa Melikisedeki.

Ryionyo gwa uhutya

11Gukweti mingë a uhanya gwa ihanyo ërëë, ëgweeso unë gukaku umukhanëa, gusoko nyenye muti voro umanya. 12Itungwee naa imunoneye khaëngë sa mwaye asëyi, ëgweeso ëkëë muufenja muntu wa umusëya masëyo a mwandyo a sayu a Muungu. Gwa udëa ula ilëwa në ikaku, ëkëë imunoneye unywa mava. 13Mu wasuu në imunoneye unywa meywa wasuu unë ëkëë mung'ënya, atimanyie uduvi në uja unë ntunihe. 14Ëgweeso ilëwa në ikaku unë gwa antu në aküü nëvakhomie, nëvëudaha urekanua në maja nanë mavë.

Currently Selected:

Vaeburania 5: RNT

Highlight

Copy