Nte 18

Faulo uKorinto

1Naarë asaa akëa Faulo agahegha Ateni agaenda faka uKorinto. 2Na mweeso agamuhanga Muyahudi umwedu ugwëtaanwaa. Akwila, muntu wa uFonto, matiku ayaayo arë wajaa ufuma Italia itambëëmwe na mukhema wakwe Firisikila, gusoko Kilaudio arë waraghëëye Ayahudi voong'e vaheghe uRumi. Na mweeso agaenda uvaona veeso. 3Na gusoko mwëëmo wakwe arë wikhwete na mwëëmo wao agikhaa itambëëmwe na veeso vëgatenda mwëëmo, gusoko mwëëmo wao arë utuma mahema. 4Na mweeso agarighëëtya gwa nguu mung'ë a sinagogi mu itiku ra sabato, na agavauta Ayahudi nanë Ayunani.

5Naarë Sila ina Timoteo vaja ufuma uMakedonia, Faulo agatumëa udaho wakwe voong'e gwa utanantya, uguvasudangëa Ayahudi mwino Kiristo arë Yesu. 6Na naarë veeso vamufënga na vëgamutuka, mweeso agakununta ukungu wa masaa akwe na agavakhanëa, “Saghami anyu ëtendeke unto a mëtwe anyu. Nene ntikweti mahutye. Ufuma itungwee nene noka gwa antu nëti Ayahudi.” 7Na mweeso agahegha hafo agaenda gikhaa u nyumba amwa Tito Yusito, muntu naarë ugumukuryaa Muungu. Nyumba akwe arë ëfifë na sinagogi. 8Kirisifo, müküü wa sinagogi, agamuhuvëa Müküü, itambëëmwe na antu voong'e va ukhakwe. Na Akorinto vaingë gwa umutegheeya Faulo vëgahuvëa na vëgabadiswa. 9Na itiku rëmwedu utiku Müküü agamukhanëa Faulo gwa njëa a ndoti, “Utaoghofe, ëgweeso rëghëëtya utaje ukie; 10gusoko nene nëitambëëmwe na vee, na gutie muntu në winjë ugumankëa veve na uguvaarya. Gusoko nëkweti antu vaingë mung'ë a muji urui.” 11Na Faulo agagikhaa uKorinto mwakha umwedu na mëëri mutandatu, ugusëya ukhani wa Muungu mukhatë ao.

12Ëgweeso itungo naarë Galio müküü wa mükoa wa Akaya, Ayahudi vëgatenda nkhama ëmdwe vamumankëe Faulo na vëgamutoa usonge a barasa, 13vëuhanya, “Muntu uyi uguvafema antu vamükürye Muungu hiya na seria itu.” 14Ëgweeso naarë Faulo arë waurakanua momo wakwe arighëëtye, Galio agavakhanëa Ayahudi, “Nëmbesa ukhani urui aja në ntendo a ihutye mba lakuno në mbë, nene aja nënoneye giyanjëya ginanyu, Nyee Ayahudi. 15Ëgweeso gusoko në mawëyo nëëghokee nkhani nanë mina nanë seria anyu, ramwui nyenye aghonjo. Nene nahita utendeka në muramwui wa antu ayai.” 16Na mweeso agavajuncha ufuma ubarasa. 17Na voong'e vëgamukwata Sositene, naarë mutongeeri wa sinagogi, na vëgamukhua mweeso usonge a barasa. Ëgweeso Galio ainamëkeera ntendo asëë.

Faulo Wasuka Kangë Antiokia

18Naarë asaa akëa Faulo agagikhaa matiku maingë uKorinto, na uvii agavareka ahuvëi agatenda muhënjo ukëërëa girambo faka uSiria, itambëëmwe ina Firisikia nanë Akila. Kuuko u Kenkerea mweeso agamwa njëë yakwe gusoko arë walile irafo. 19Na veeso vëgafika faka Efeso, hafo Faulo agavareka Firisikila nanë Akula. Ëgweeso mweeso mughonjo agaenda mung'ë a sinagogi na agarighëëtya gwa nguu itambëëmmwe na Ayahudi. 20Naarë veeso vamuromba ikhae inao gwa itungo irifu mweeso agahita. 21Ëgweeso naarë mweeso wauvareka veeso, agavakhanëa, “Nene ngusuka kunë nyenye nësa Muungu wayanja.” Na ufuma Efeso mweeso agatenda mihënjo gwa njëa a irambo.

22Naarë mweeso wasima uKaisaria, na agaenda faka uYerusalemu na agarëramucha kanisa, na kangë agaenda faka Antiokia. 23Naarë wikhaa matungo ëgëtunga kuuko mweeso agahegha na agaenda ufuma gitümbë faka gitümbë ukëërëa u mukoa wa uGalatia nanë wa uFiligia, uguvakhamia asëywi voong'e, mu uhuvëi.

Afolo Mung'ë a Efeso nanë uKorinto

24Na Muyahudi umwedu rina rakwe Afolo, munyang'ë wa Alekisanderia, agafika Efeso. Mweeso arë muntu në muremu, na umanyie ija maandëko. 25Mweeso arë wasëiywe njëa a Müküü, na arë wë moto munkhoo, na agatanantya na usëya ija mantu nëëmughokee Yesu, na mbesa arë umanyie ubadiso wamwa Yohana gutufu. 26Mweeso agaandya utanantya gwa nguu mung'ë a sinagogi. Ëgweeso naarë Firisikila ina Akila vamutegheeya mweeso, vëgamuhoa na vëgamusëya njëa a Muungu ija nanguu. 27Nanë mweeso wasëgha utambuka uenda Akaya, ahuvëi vëgamunena, na vëgavandëkëa asëywi keeti vamughenyife mweeso. Naarë mweeso wafika, agavaarëya ino vasaa në gwa mboto a Muungu vaiye ahuvëi, 28gusoko mweeso gwa udaho agavahuma Ayahudi uchanya laa, uguraghëëra gwa njëa a maandëko mwino Kiristo në Yesu.

Currently Selected:

Nte 18: RNT

Highlight

Copy