1 Atesalonike 4

Üdüvi nëugumuyanjisyaa Muungu

1Mpeo ayo, aruna ane, sese gugamunena na umususutëya nyenye mung'ë a Müküü Yesu, uvi mwino nyenye mwisëiye kunë sese mwino munoneye umuyanjisya Muungu mwino nyenye mutendaa. Nyenye tendi uvii ino ino. 2Gusoko mumanyie maraghëëyo ayo nënaa gugamufa gwa ukëërëa Müküü Yesu. 3Gusoko Muungu ugufenja nyenye mutendeke mwë veru: rekanuki na üdüvi wa ulehadi. 4Mu muntu amanye uwibala mwëërë wakwe mung'ë a weru a nanë ikuryo, 5na ti gwa nkümbü në mbë mwino antu va ndughu ingëja nëvëtimumanyie Muungu. 6Uvii, muntu gëkaku atamuhutyee mbesa umufenea muunakwe gwa ukhani uruu. Gusoko ugwarëfëyaa mantu ayai oong'e, mwino sese gwatongeere umukenea nyenye. 7Gusoko Muungu inagutaanaa see gwa üdüvi wa uvaya, ëgweeso mu weru. 8Gwa uvii, nëuguyahorya masëyo asaa atiumuhorya muntu, gweeso ugumuhorya Muungu mughonjo nëugumufaa nyenye Mwahu wakwe në Mweru.

9Ëgweeso gwa uhonga na uyanjo gwa aruna vanyu, gutie soko a muntu mbaumwe umwandëkëa nyenye, gusoko nyenye aghonjo mwadahie usëywaa na Muungu giyanja nyenye gwa nyenye. 10Na tutë muvayanjëte vaunaanyu voong'e nëvë uMakedonia. Ëgweeso vaunaitu, nguumuromba mudahe utenda uyi ino ino. 11Mutendeke mwina nkümbü a uduvi në utina mukindo, mu muntu atende mantu akwe mweeso mughonjo na atende mwëmo gwa mëkhono akwe mughonjo mwino gwaraghëëywe afoo ufuma mwandyo. 12Gwa uvii mwenende gwa iküryo usonge avoo nëti ahuvëi, na tajee ufënje mantu u muntu woong'e.

Müküü chuu waja

13Arunaitu ëgweeso see gutiufenja nyee mudëe umanya asaa nëëvaghokee avoo nëvarae, uvii gusoko ësëë mutahangëë uvavi mwino vasaa nëvëtikweti ighonje. 14Sese guhuvëe mwino Yesu agakuya na agafëtya, viuyi viuyi na avoo nëvaree itambëëmwe ina Yesu Muungu uguveeta itambëëmbwe na mweeso.

15Gusoko ërëë sese gumutananteya gwa ukhani wa Müküü, uvii sese nëgwaafanga, nëguutendeka gurëfo, itungo nëikwë Müküü waja, tutë tuutë gutiuvatongeera, vasaa nëvakure. 16Gusoko Müküü mweeso mughonjo ujie usima ufuma girunde itambëëmwe na ruri wa iraghëëyo, itambëëmwe na ruri wa malaëka në müküü, na itambëëmwe na ruri wa ifembe ra Muungu. Na avoo nëvakure kunë Kiristo vëjie ufëtya mwandyo. 17Uvii sese në gwafanga, unë gutendeka gurëfo gujie ulakwa gunto itambëëmwe na veeso mumaunde utang'ana na Müküü gunto. Na uvii sese gwinjë utendeka itambëëmwe na Müküü matiku oong'e. 18Uvii, ifefeheeyi mu muntu na muyakwe gwa nkhani iyii.

Currently Selected:

1 Atesalonike 4: RNT

Highlight

Copy