Lúʼkáasʉ 6:27-49

«Lə́, m mə̌ ndâʼ lə́ pei ngô: Pei kôŋ pəghaŋə mbəu péi, ə́ nkə́ ngʉ̂ pə̂ shʉʼʉ lə́ pye pi gháp paa wéi. Pei sʉ́ʉtə́ Sê ńgó â cóghʼ mbwórə lə́ pye pi gháp tə̂m kwaʼ wei, ə́ mbǒu sʉ́ʉtə́ Sê tû pye pi gháp côŋ ləjôghʼ zéi. Ŋuu lə̌i sə́u ghô ləwoʼ gho, o nyárə yé có. Ŋuu lə̌i ngôu ndǐ fwoghʼ zô ḿpfú, o nyêr a pfû yi cər wó lə́wó. Ŋuu lə̌i ndóu ghô zə̂u, o ŋə̂. Ŋuu póu mbyé zə̂u zô, koo túŋu ghô yé zěi. Zə̂u yi pei koŋ ńgó pə ghʉ́ lə́ pei, pei ghʉ́ zěi lə́ pəcó pye. Pei lə̌i mə́ nkôŋ pə́ ndaʼ pye pi gháp koŋ wéi, pə́ pou fə́tə́ wéi ńté hó? Ngaŋə-məfaa kə́ nkoŋ pə́ pye pi gháp koŋ gháp záp. Pei lə̌i nkə́ ngʉ̂ shʉʼʉ pə́ lə́ pye pi gháp pə́ ngʉ záp shʉʼʉ lə́ pei lə́wó, pei pou nzʉ́ʼtə ńgó pə fə́tə́ wéi ńté hó? Tə mbaa ngaŋə-məfaa kə́ ngʉ̂ záp pə́ yə́rə́. Pei lə̌i mə́ fô zə̂u, ə́ fô pə́ lə́ pye pi pei jǐ ńgó gháp ghʉ̌ paghʼə́ ńŋə́ lə́ pei, pei pôu nzʉ́ʼtə ńgó pə fə́tə́ wéi ńté hó? Tə mbaa ngaŋə-məfaa kə́ fô záp zə̂u pə́ lə̂ pəcó ghíʼ gháp ghʉ̌ paghʼə́ ńŋə́ lə́ páp. Lə́, pei kôŋ pəghaŋə mbəu péi, ə́ ngʉ̌ shʉʼʉ lə́ páp mbou fó zə̂u lə́ pye tə́ kwǎŋ ńgó gháp ghʉ̌ paghʼə́ ńŋə́ lə́ pei. Ə̂ leitə́ yə́rə́, ntsoʼó-faʼ zéi ghʉ́ ḿbə́ tə́koʼ wěi, ə́ pei ncʉ́ʼ ghəpə́ Tsəpye, ńté ńgó a poŋə́ no mbó pəzʉ-tə-pə̂i tə mbaa mbó pəghaŋə məfaa lə́wó.» «Pei pə́ ngaŋə-tsâa-mə́jʉ̂ŋ ghíʼ Tə́ wéi pə̌ ngaŋə-tsâa-mə́jʉ̂ŋ. Koo pei nyâŋ tô məlǒʼ pye, ə́ mbóghʼ Sê lə̂ ntáa ntô méi lə́wó. Koo pei nyâŋ côghʼ fər paa ŋuu, Sê táa nkə́ cóghʼ yé fər paa pei lə́wó po. Pei nyáŋ ńdyə́ghʼə mə́faa pye, Sê táa ndyə́ghʼə́ mə́faa wêi lə́wó. Pei nyáŋ ńŋə̂ zə̂u lə́ pəcó pye, pə táa ngí ŋə́ lə́ pei zéi, ə́ fə̌iʼ ḿbʉŋə́ cər môu-paa wei, â lóghʼə́, pə́ cʉ́ʼtə́, ə́ ndə́ghʼə́ tə ə́ zêʼ ńcwə́rə́.» Yěso kə̂ ncí ndâʼ lə́ páp ngô: «Tə mboʼ fwoghʼ-mə́nyôghʼ myághʼə nyárə cǒ laŋə́-ndə̂u? A lə̌i mə́ ndôu nyárə́ yé, mə́i gháp zʉ́ wǒ nǎa pfúŋ cər ghəm. Njyêʼ-faʼ kâa pə́ ndêi yé tə́-faʼ ye. Lə́, a jyêʼ faʼ tə fú ńjí, ə́ ncʉ́ʼ ḿbə́ pə́ ghíʼ tə́-faʼ ye. Ńté hó o pə̂ ndôu lə̂ njwó fəpə pʉ̌ʉ yi nuŋú ləjôghʼ fə̌r gho, lə́ lə́u mə́ njwô ghô kə̂u nkwə̂i yi a pʉŋtə́ ləjôghʼ gho po?» Tə mboʼ o kûʼ lə̂ ndáʼ lə́ fə̌r gho ngô: «Ə fə̌r, cʉ̂ʼ n nkwarə́ fəpə pʉ̌ʉ yo yi pə̌ ləjôghʼ gho lo, lə́ ngǐ lǎʼ, kə̂u nkwə̂i pʉ̂ŋtə ləjôghʼ gho? Sap-ndwô-fʉ́ŋ! Tsə̌mbi nkwárə́ kə̂u nkwə̂i yi a pʉŋtə́ ləjôghʼ gho, tə ntsúŋú mə́ njwô yʉʼ mboŋə́ lǔ lə̂ nkwárə́ fəpə pʉ̌ʉ yi pə́ ləjôghʼ fə̌r gho.» Tʉ̌ shʉʼʉ kâa pə́ nzə̂m yé ntǎa tə́poŋ. Ə tʉ̌ yi pə́ ngǒu kə̂ mə́ nzə̂m yé ntǎa shʉʼʉ po. Pə́ jî tʉ̌ tsəm pə́ lə̂ məntǎa měi. Pə́ lə̌i nkâp yé nyar lə̂ tʉ̌ nkaŋ-nyêʼ po. Ə́ kə́ ḿbə́ ndʉŋ-ndʉŋ ghíʼ mboʼ pə́ kə̂ kâp yé mbwʉ̌ lə̂ tʉ̌ ngə́m po. Ŋuu shʉʼʉ ghʉ no shʉʼʉ yi ə́ kwar lə̂ shʉʼʉ yi lóghʼə́ cər ntə̂ʉ zʉ́, ŋuu tə́poŋ ghʉ no tə́poŋ yi ə́ kwar lə̂ no tə́poŋ yǐ lóghʼə́ cər ntə̂ʉ zʉ́, ńté ńgó tsâr yi ə́ kwar ntsʉ ŋuu ə́ fú lə́ yi ə́ lóghʼə́ cər ntə̂ʉ zʉ́. Ńté hó pei pə̂ fûŋ ghâa ńgó ə́ Nde! Ə́ Nde! Ə́ mbǒu káa kə́ pə́ ghʉ̂ wéi zə̂u yi məŋ ndaʼ zěi? N ngwo nyarə́ wéi ŋuu yi ńgó, ŋuu yi a tǒ ńcə́r ghâa, ə́ nzúʼ tsâr zâa, ə́ mbǒu ngʉ́ ghíʼ ə́ pə́ ntúŋú shwǐ yé. A shwǐ ŋuu yi a lə ghí kə́r ndə̂ ye, ə́ ntsə̌mbi ntúŋ cû zěi tə ntə́ʉ ndəu ghǒ mboŋə́ jǐ lə̂ mbóu. Nci tâa ndóghʼə́ ńzéʼ ńtó ńdwúŋ ndə̂, lə́ káa kûʼ yé lə̂ nkə̂m ńté ńgó pə́ lə pôu shʉʼʉ. Lə́, ŋuu yi a zǔʼ tsâr zâa káa ghʉ̌ yé ghíʼ ə́ pə́ ntúŋú wə́ ghíʼ ŋuu yi a kə̌r ndə̂ pə́ tə pǒu cû zěi. Nci tâa ndóghʼə́ ńzéʼ ńtó ńdwúŋ ndə̂ zêi, ə lêi-lěi kə́mə́ ńcwə́rə́ tə mê.