Psalm 62
62
[Psalm lal David]
Lulalfongi Ke Karinginyuk Lun God
1Nga muteng in tupan molela lun God nu sik;
El mukena nga lulalfongi.
2Tuh El mukena eot ku luk ac mwe loango luk;
El tower fulat luk su moliyula,
Ac nga ac fah tiana kutangyukla.
3Putaka kowos ac lain sie mwet
Su munas oana sie kalkal ma musalla?
4Kowos lungsena tuh kowos in eisilya liki nien muta fulat lal;
Kowos engan in orek kikiap.
Kowos akinsewowoyal ke kas lowos,
A insiowos selngawel.
5Nga lulalfongi God mukena;
Nga filiya finsrak luk in El.
6Tuh El mukena eot ku luk ac mwe loango luk;
El tower fulat luk su moliyula,
Ac nga ac fah tiana kutangyukla.
7Lango luk ac wolana luk oan inpoun God;
El mwe loeyuk kulana luk;
El nien wikla luk.
8Mwet luk, kowos in lulalfongi God pacl e nukewa.
Fahkang mwe fosrnga lowos nukewa nu sel,
Tuh El nien molela lasr.
9Mwet uh mulala oana mongin mwet se;
Kut ac fin fuhlelosi fin sie mwe paun, ac fah wangin toasriyalos;
Mwet fulat ac mwet pusisel elos kewa ma pilasr.
Elos mulala liki momong se na.
10Nikmet lulalfongi ke moul in sulallal;
Nikmet finsrak in eis kutena ma ke pisrapasr;
Mwe kasrup lom finne yokyokelik,
Nikmet filiya lulalfongi lom kac.
11Pus pacl nga lohng ke God El fahk
Lah ku nukewa ma lal,
12Ac lungse lal uh lungse kawil.
O Leum, kom sifacna asang ma lacne nu sin mwet nukewa fal nu ke orekma lalos.#Job 34:11; Jer 17:10; Mt 16:27; Rom 2:6; Fwack 2:23
Currently Selected:
Psalm 62: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
