Psalm 56
56
[Psalm lal David, Tukun Mwet Philistia Sruokol in acn Gath]
Sie Pre In Lulalfongi Ke God#Sifa 1 Sam 21:13–15
1Pakomutuk, O God,
Tuh mwet lokoalok luk elos ukweyu,
Elos kalyeiyu in pacl e nukewa.
2Mwet su srungayu elos lainyu len fon;
Arulana pus mwet anwuk lainyu inge.
3Ke pacl nga pula sangeng, O LEUM GOD Kulana,
Nga filiya lulalfongi luk in kom.
4Nga lulalfongi God, ac tiana sangeng;
Nga kaksakunul ke wulela lal nu sik.
Mea mwet ac ku in oru nu sik?
5Mwet lokoalok luk aklokoalokyeyu ke len fon;
Pacl nukewa elos suk na ma in akkolukyeyu!
6Elos tukeni ke nien wikwik
Ac tawi ma nukewa nga oru,
Ac kena uniyuwi.
7Kaelos, O God, ke ma koluk lalos inge;
Ac kutangulosla in kasrkusrak lom!
8Kom etu lupan fosrnga luk;
Kom etu lupan tung luk.
Ya ma inge tia simla in book nutum?
9Ke len se nga pang nu sum uh,
Mwet lokoalok luk elos ac folokelik likiyu.
Ma se na nga etu uh pa God El wiyu —
10Aok, LEUM GOD su nga kaksakin wulela la.
11Nga lulalfongi in El, ac nga ac fah tiana sangeng.
Mea mwet ac ku in oru nu sik?
12O God, nga ac fah asot nu sum ma su nga wulela kac;
Nga ac fah oru mwe kisa in fahkak kulo luk nu sum,
13Mweyen kom moliyula liki misa
Ac sruokyuwi tuh in tia kutangyukla nga.
Inge nga fahsr ye mutun God
Ke kalem su sang moul nu sin mwet uh.
Currently Selected:
Psalm 56: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
