Psalm 38
38
[Psalm lal David]
Pre Lun Sie Mwet Su Muta In Keok
1O LEUM GOD, nimet kaiyu in mulat lom!
2Kom kanteyuwi ke pisr nutum,
Ac kom puokyuwi.
3Ke sripen kasrkusrak lom, nga muta in keok lulap;
Monuk nufon mas ke sripen ma koluk luk.
4Nga walomla in sronot lun ma koluk luk,
Su arulana toasr nu sik in us.
5Kinet keik pusrosr ac kulawi
Ke sripen ma lalfon nga oru.
6Nga itungyuki ac kuruweni;
Nga mwemelil ke len fon.
7Arulana folla monuk ke mas luk
Ac nga apkuran in misa.
8Nga totola ac arulana itungyuki;
Insiuk keok na, ac nga sasaola ke ngal luk.
9O Leum, kom etu lah mea nga kena kac;
Kom lohng sasao luk nukewa.
10Insiuk kihmkim, ku luk wanginla,
Ac mutuk ohkla.
11Mwet kawuk ac mwet tulan luk elos tila tuku apkuran nu yuruk
Ke sripen ruf keik;
Finne sou luk, elos tila fahsriyu.
12Elos su suk in uniyuwi elos filiya kwasrip nu sik,
Ac elos su kena akngalyeyu elos fahk mu elos ac kunausyula.
Elos tiana tui in orek pwapa koluk lainyu.
13Nga oana sie mwet sulohngkas — nga tia ku in lohng,
Nga oana sie mwet kofla kaskas, na nga tia kaskas.
14Nga oana mwet se su tia ku in topuk ma uh
Ke sripen el tia ku in lohng.
15Tusruktu nga lulalfongi in kom, O LEUM GOD,
Kom, Leum God luk, fah topukyu.
16Nikmet lela mwet lokoalok luk in engan ke nga sun mwe ongoiya;
Nikmet lela elos in tungak ke nga ikori.
17Nga apkuran in ikori,
Ac nga waiok pacl e nukewa.
18Nga fahkak ma koluk luk;
Tuh ma inge oru nga arulana fosrnga.
19Mwet lokoalok luk elos arulana ku in mano;
Pukanten mwet srungayu ke wangin sripa.
20Elos su folokin ma koluk ke ma wo
Elos lainyu mweyen nga srike in oru ma suwohs.
21Nikmet sisyula, O LEUM GOD;
Nikmet fahsr likiyu, God luk.
22Kasreyu inge, O Leum su langoeyu!
Currently Selected:
Psalm 38: KOS
Highlight
Copy
Compare
Share
Want to have your highlights saved across all your devices? Sign up or sign in
This text is in the Public Domain due to copyright expiration.
