Psalm 144
144
[Psalm lal David]
Sie Tokosra El Sang Kulo Nu Sin God Ke Kutangla
1Kaksakin LEUM GOD, eot ku luk!
El lutiyu in anwuk,
Ac akoeyu nu ke mweun.
2El eot ku luk ac mwe loeyuk luk,
Nien molela luk su langoeyula,
Su nga filiya lulalfongi luk se.
El akpusiselye mutanfahl nu ye niuk.
3 LEUM GOD, mea mwet uh, tuh kom in akilenulos?
Mwet uh ma pilasr, na kom ku lohang nu selos?#Job 7:17–18; Psa 8:4
4Mwet uh oana polo eng se ma tuhwot tuhme;
Lusen len lalos oana ohk, su sa na wanginla.
5O LEUM GOD, ikaselik kusrao ac oatume;
Kahlye eol uh, ac elos fah fosryak.
6Supweya sarom in akfahsryelik mwet lokoalok lom;
Pusrkama pisr nutum, ac oru elos in kaing.
7Asroema poum lucng me.
Srukyuyak liki kof loal, ac moliyula.
Moliyula liki inpoun mwetsac,
8Su tia fahk kas pwaye,
Ac elos kaskas kikiap elos finne fulahk.
9Nga fah onkin soko on sasu nu sum, O God,
Nga fah srital ke harp ac on nu sum.
10Kom pa oru tuh tokosra in eis kutangla,
Ac kom molella David, mwet kulansap lom.
11Moliyula liki mwet lokoalok sulallal luk;
Moliyula liki ku lun mwetsac,
Su tia fahk kas pwaye,
Ac elos kaskas kikiap elos finne fulahk.
12Lela tuh wen natusr, su srakna mwet fusr,
In oana sak sunasr ma kapak arulana ku.
Lela tuh acn natusr in oana sru loeloes
Ma tu ke sruwasrik in lohm sin tokosra.
13Lela tuh nien fil fokin ima lasr in nwanala
Ke kain in fahko nukewa.
Lela tuh sheep in ima lasr
In oswe tausin ac ngoul tausin.
14Lela tuh cow natusr in isus pus
Ac in wangin ma isus tuh misa.
Lela tuh in wangin pusren asor ke inkanek lasr uh.
15Insewowo mutunfacl se su sikyak ouinge nu selos;
Aok, insewowo mutunfacl se su LEUM GOD El God lalos!
Currently Selected:
Psalm 144: KOS
Highlight
Share
Compare
Copy
Want to have your highlights saved across all your devices? Sign up or sign in
This text is in the Public Domain due to copyright expiration.
