Kölfel 38
38
Än eman chon aier iotek
38.1-22
Echö än Tafit köl fän iten asoren achechem.
1Ai Samol mi Lapalap, kosap apwüngüei lon om song,
kosap pwal ninniei lon om lingeringer.
2Pun ka akinasaei ren wokum kewe föün esefich,
ka pwal amiritiei.
3Esap wor pöchökülen inisi pokiten om song,
esap pwal wor pöchökülen lechüi pokiten ai tipis.
4Üa pwölüla fän ai kewe föför mi ngau,
ra chou usun och mettoch mi kon chou ngeniei.
5Kinasei kewe ra pwongau o not
pokiten ai umwesila lon tipis.
6Üa wesewesen pworetiu o chapala,
fansoun meinisin üa lolilen.
7Üa samaun pwichikar,
esap fokun wor pöchökülen inisi.
8Üa aiemalü o fokun apwangapwang,
üa ngüngü pokiten riaföün lelukei.
9Ai Samol, en ka silei mochenin letipei meinisin,
ka rongorong ai ngüngü meinisin.
10Lelukei a chechech, ai pöchökül a sü seniei,
pwal mesei esap chüen neneöch.
11Pwii kewe me chiechiei resap kaneto rei
pokiten ai samau,
pwal mwo nge aramasei ra ütä me toau.
12Chokewe mi mochen nieila ra amolätä ar kewe sär,
nge chokewe mi mochen ariaföüüei ra kapas usun ar repwe afeiengauaei,
ra chök ekiekin rawangauaei fansoun meinisin.
13Nge ngang üa usun eman aramas mi selingapwas esap tongeni rongorong.
Üa usun eman aramas mi awemwöch esap tongeni fos.
14Ewer, ngang üa usun eman aramas esap tongeni rongorong,
esap pwal wor an kapasen pälüeni.
15Nge ngang üa apilükülükuk, ai Samol mi Lapalap.
Ai Samol me ai Kot, en ätewe mi pälüeniei.
16Pun üa iotek, pwe kosap fokun mwüt ngeni ekewe chon oputaei pwe repwe takirin ämängauaei
o esitaei, lupwen üa mit.
17Pun üa arap ngeni ai üpwe turula,
üa chök memetek fansoun meinisin.
18Üa pwärätä ai kewe föför mi ngau,
üa pwal lolilen ren ai tipis.
19Chokewe mi oputaei ra fokun pöchökül,
nge chokewe mi oputafateei ra chomong.
20Chokewe mi liwini ngeniei ingau fän iten ai föför mürina,
ir chon ü ngeniei, pun üa föri mine a pwüng.
21Ai Samol mi Lapalap, kosap likitieila,
ai Kot, kosap toau seniei.
22Kopwe kaito pwe kopwe alisiei, ai Samol, ai Chon Amanau.
Currently Selected:
Kölfel 38: CHK
Highlight
Share
Compare
Copy
Want to have your highlights saved across all your devices? Sign up or sign in
Copyright © 1984, 1989, 1991, 2001 Liebenzel Mission
