Kölfel 29
29
Möngüngün Kot me lon mölümöl
29.1-11
Echö än Tafit köl.
1Ämi chon läng kana, oupwe mwareiti ewe Samol mi Lapalap,
oupwe mwareiti an ling me manaman.
2Oupwe mwareiti lingen iten ewe Samol mi Lapalap.
Oupwe fel ngeni i fän üf mi pin. #Kölf 96.7-9
3Aramas ra rongorong möngüngün ewe Samol mi Lapalap won ekewe matau.
Ewe Kot mi ling a apüngü chopulap.
Möngüngün ewe Samol mi Lapalap a tittiriis me won ekewe matau.
4Möngüngün ewe Samol mi Lapalap a manaman.
Möngüngün ewe Samol mi Lapalap a fokun amwarar.
5Möngüngün ewe Samol mi Lapalap a kupi ekewe irä setar,
a kupi ekewe irä setar mi nom won Lepanon.
6A föri pwe ewe chuk Lepanon a mwetemwet usun eman nienifön kow,
nge ewe chuk Hermon a mwetemwet usun eman nienifön ätemwänin kow.
7Möngüngün ewe Samol mi Lapalap a afifi inefi.
8Möngüngün ewe Samol mi Lapalap a achechecha ewe fanüapö,
a achechecha ewe fanüapön Kates.
9Möngüngün ewe Samol mi Lapalap a amäräkulu ekewe irä ook
o wichikätiu chön irän ewe wöllap.
Nge lon imwan imwenfel meinisin ra kökkö, “Kot a ling.”
10Ewe Samol mi Lapalap a nemenem won ekewe lölö.
A nemenem, pun i a king tori feilfeilachök.
11Ewe Samol mi Lapalap a ngeni nöün kewe aramas pöchökül,
a afeiöchü nöün kewe aramas ren kinamwe.
Currently Selected:
Kölfel 29: CHK
Highlight
Share
Compare
Copy
Want to have your highlights saved across all your devices? Sign up or sign in
Copyright © 1984, 1989, 1991, 2001 Liebenzel Mission
