Ipru 5

1Iwe, iteiten souasor mi lap a kefilitä me lein aramasan, a angei wisan an epwe angang ngeni Kot fän iten ekewe aramas, pwe epwe föri angangen asor o föri ekewe asoren tipis. 2Pokiten i a apwangapwang lon püsin manauan, a tongeni tipepwetete ngeni chokewe mi wewemang o föri mine a mwäl. 3Iwe, pokiten püsin i a apwangapwang, epwe fokun föri asoren amusamusen tipis, sap fän iten chök än ekewe aramas tipis, pwe pwal fän iten püsin an tipis. #Lif 9.7 4Esap wor eman a seikätä püsin i an epwe wiseni ewe wisen souasor mi lap. Nge Kot echök a seikätä eman aramas an epwe wiseni ewe wisen souasor mi lap, usun chök mine a fis ngeni Aaron. #Eks 28.1 5Ina chök usun Kraist, esap püsin seikätä an epwe wiseni ewe wisen souasor mi lap. Nge Kot a üreni,

“En Nei, ikenai üa wiliti Semom.” #Kölf 2.7

6A pwal apasa lon eu kewe Toropwe mi Pin,

“En kopwe eman souasor tori feilfeilachök

lon tettelin Melkisetek.” #Kölf 110.4

7Lon fansoun än Jesus manau won fanüfan, a iotek o tüngor fän mwelian mi leüömong, a pwal kechü ngeni Kot, ewe mi tongeni amanaua i seni mäla. Iwe, Kot a aüselinga i, pun a meniniti i. #Mat 26.36-46; Mark 14.32-42; Luk 22.39-46 8Iwe, inamwo are i Nöün Kot, nge a kaiö aleasochis ren ekewe riaföü a tolong lon. 9Iwe, lupwen a unusöchüla manauan won fanüfan, a wiliti ewe popun küna manau esemüch fän iten chokewe mi aleasochis ngeni. 10Iwe, Kot a aita ngeni souasor mi lap lon tettelin Melkisetek.

Kapasen fön usun ach sisap likitala ach lükülük

5.11–6.12

11Mi wor chomong mine aipwe tongeni apasa usun ei mettoch, nge a weires äm aipwe awewe ngenikemi, pun oua fokun wewemang. 12A fen tori fansoun ämi oupwe sense, nge oua chüen osun än eman epwe asukulakemi ekewe lessen fän iten chon popuetä kaiö kapasen Kot. Ürürün pwe oupwe mongö mongö mi pöchökül, nge oua chüen chök ükün milik. 13Eman mi chök ükün milik a chüen eman mönükol, esap tongeni sipeöch lon ewe kapasen pwüng. #1.Kor 3.2 14Nge mongö mi pöchökül a chök fän iten ekewe aramas mi mwukula, ir chokewe mi aörüni ngeniir ar repwe tufichin alefila lefilen mine a öch me mine a ngau.

Currently Selected:

Ipru 5: CHK

Highlight

Compare

Copy