Efisos 5

Manau lon saram

5.1-20

1Pokiten ämi nöün Kot mi achengicheng, oupwe fokun apirü i. 2Chen epwe nemeni manauemi, usun Kraist a echenikich o fangala manauan fän itach pwe epwe eu asor mi pwoöch me eu lifang mi apwapwai Kot. #Eks 29.18; Kölf 40.6

3Pokiten ämi nöün Kot aramas mi pin, esap pwüng pwe sokopaten föförün lisowu ika mocheisou ika tipemong epwe fen mwo nge fis ika föü lefilemi. 4Esap pwal fichitikemi pwe oupwe apasa sokun kapas mi ngau, kapas mi lomotongau me kapasen turunufas, nge oupwe chök kilisou ngeni Kot. 5Oupwe fokun silei, pwe esap wor eman mi föri sokun föförün lisowu ika mocheisou ika tipemong (pun tipemong a wewe ngeni angang ngeni anümwäl) epwe angei och feiöch seni lon ewe Mwün Kraist me Kot. 6Ousap tup ren än aramas kapasen atuputup, pun ren ekei sokun föför än Kot song epwe tori chokewe mi lükümach ngeni. 7Iei mine ousap chiechi ngeni ekei sokun aramas.

8Me lom oua nom lon rochopwak, nge iei oua nom lon saram pokiten oua wiliti nöün ach Samol aramas. Iei mine oupwe manaueni eu manau mi nom fän ewe saram, 9pun ewe saram a atoto eu räs mi watte ren sokun föför mürina, föförün pwüng me let. 10Oupwe achocho le kütta mine ach Samol epwe pwapwa ren. 11Ousap eti aramas le föri ekewe föför mi lomotongau, ekewe föförün rochopwak, nge oupwe sarifiir, pwe repwe pwäwu lon saram. 12Pun a fokun asäw ach sipwe mwo nge föüni ekewe föför ra föri le monomon. 13Nge lupwen ekewe mettoch meinisin ra pwäwu lon saram, mürin enletin sokosokun manauer a pwäöchüla. 14Pun meinisin mine a pwäöchüla a saram. Iei mine a mak:

“En chon möür, kopwe pwätä,

kopwe towu seni mäla,

pun Kraist epwe asaramok.”

15Iei mine oupwe afälikemi lon mine oua föri. Ousap föri föförün chon tiparoch, nge oupwe föri föförün chon tipachem. 16Oupwe alomota fansoun manauemi, pun ekei rän ra ngau. #Kol 4.5 17Iei mine ousap föri föförün chon tiparoch, nge oupwe achocho le kütta met letipen ach Samol fän itemi.

18Ousap apuchakemi ren wain, pun ei epwe afeiengauakemi. Nge oupwe urela ren Ngünmifel. 19Oupwe aea le kapasfengen lefilemi ekewe kölfel, ekewe kölün lamalam me ekewe köl mi pin. Oupwe kölü ekewe kölün lamalam me ekewe kölfel ngeni ach Samol, oupwe mwareiti i lon lelukemi. 20Oupwe kilisou fansoun meinisin ren mettoch meinisin ngeni Samach Kot fän iten ach Samol Jesus Kraist. #Kol 3.16-17

Pwüngün lefilen pwüpwülü

5.21-33

21Oupwe aleasochisfengen lefilemi pokiten oua asamolu Kraist.

22Ämi fefin kana, oupwe aleasochisi pwülüemi usun chök ämi oupwe aleasochisi ach Samol. #Kol 3.18; 1.Pet 3.1 23Pun eman mwän möküren pwülüan usun Kraist möküren mwichefel. Kraist ewe Chon Amanauen mwichefel, nge mwichefel iei inisin Kraist. 24Iei usun chök pwal ekewe fefin repwe fokun aleasochisi pwülüer kewe lon mettoch meinisin usun chök mwichefel a aleasochisi Kraist.

25Ämi mwän kana oupwe echeni pwülüemi usun Kraist a echeni mwichefel o fangala manauan fän itan. #Kol 3.19; 1.Pet 3.7 26A föri ei pwe epwe apini mwichefel fän iten Kot, a limeti mwichefel ren koluk, iei an kapas, 27fän iten an epwe aütai mwichefel fän püsin itan lon unusen lingöchün, pwe esap wor tikitikipwülün are lemomon are och limengau, nge epwe pin o unusöch. 28Ina usun ekewe mwän repwe echeni pwülüer usun chök ar püsin echeni inisiir. Eman mwän mi echeni pwülüan a echeni püsin i. 29Esap fokun wor eman a oput püsin inisin, nge a fokun amongöni o tümwünü usun chök met Kraist a föri ngeni mwichefel. 30Pun oukich meinisin kifetin inisin. 31Usun a mak lon ekewe Toropwe mi Pin, “Iei mine eman mwän epwe likitala saman me inan o pache ngeni pwülüan, nge ekewe ruoman repwe wiliti eu chök inis.” #Ken 2.24 32Iei eu monomon mi fokun watte a pwä lon ei wokisin, nge usun ai weweiti pwe a wewe ngeni Kraist me mwichefel. 33Nge a pwal wewe ngenikemi: Ämi mwän meinisin oupwe fokun echeni en me pwülüan usun ämi echeni püsin inisimi, nge ämi fefin meinisin oupwe meniniti pwülüemi.

Currently Selected:

Efisos 5: CHK

Highlight

Compare

Copy