Tito 3
3
Asat supati naas ꞉ltung'ana oiruko Kristo
1Ntaparru ltung'ana le nkanisa meeitodou ate too lolo ooitoricho o loaata nkitoo nening sii ninche, nerretena aas ntoki pooki supat. 2Nemejo hoo ntoki torno too lkulie, nepaachare lolemilemi, nebor, nera ltung'ana supati katukul too ltung'ana pooki. 3Amu ikira abaki apa iyioo lmada, nimikining'icho, neitopong'ori iyioo, nikira rrindiki loo ng'uarrat torrok o mbaa kumo naaiting'id seseni. Nikiwuenie nkiba o lom, eibae iyioo nikimbaro. 4Kake kore apa payie eibalunyie Nkai nara Laitejeunoni lang supaticho o nchaman enye naata too ltung'ana, 5neitejeu iyioo, namara tankaraki nikitaasa sipat, kake tankaraki lng'ur lenye. Keitejewua iyioo to nkutuko natiunyieki iyioo nkata e are, neiteng'ejuk iyoo ta Ltau Sinyati, 6ilo oichoo iyioo Nkai te leng'on kitok aimu Yeso Kristo, Laitejeunoni lang. 7Paa kore eikena iyioo ꞉Nkai ajo ikira loosipat to munyani enye, nikiaku lootum nkichon ee ntarasi, inia nikisiliguta.
8Keisiligai kulo omon, naa kaaitaarriyian payie ilikoo te mpijan, paa kore ꞉lolo ooiruko Nkai, nenyok aas supati. Kore kuna baa naa keisupati too ltung'ana neret ninche. 9Kake tapaachare nkarnyas e madai o natinin ee lmakui o nchankar o nchankar ee nkitanapat, amu meitoki eret kuna, pecheu ake ninche. 10Kore ltung'ani oyeu nkiteng'ena e sapare, ng'odia ninye nkata ekue o ne are, naa kore tenelo kue te inia, timirai ninye, 11iyielo ajo kore ltung'ani le inia pukunoto naa keimina neyaka koon nkiguana tankaraki ee ng'ok enyena.
Nkirorokino e siedi
12 #
Asat 20:4; Epe 6:21,22; Lkol 4:7,8; 2Tim 4:12 Kore ake payie aaidip airruu Artemas anaa Tikiko, ninyok oleng alotu natii te lkerenket le Nikapolis, amu atudung'o ajo kawuon te inie ta ng'amata e nkijepe. 13#Asat 18:24; 1Lkor 16:12Tonyuaa ntanapa Sena, ilo okilii o Apolos payie melau hoo ntoki to lototo enche. 14Nchoo ltung'ana lang meiteng'ena ate aas siaatin pooki supati to nyuata, payie etum yieunot naayiere oleng neata ltung'ani, payie meaku ltung'ana lemeiu lng'anayio. 15Ikiroroki ꞉ltung'ana pooki laaboitiere tene. Roroki sii sotuatin lang le nkurukoto.
Metaa munyani e Nkai tenebo o ntae pooki.
Currently Selected:
Tito 3: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
