Rroman 15

1Kore iyioo oogol to nkurukoto, keichiaakino tiniking'iri nchalan ee lolo oaachal, namara ake payie kinting'id ate. 2Meatae lobo lang lemeyiere neiting'id likae eitaas supat payie erreten ninye. 3#SNk 69:9Amu kore abaki Kristo naa eitu eiting'id koon, kake keigero ajo, <<Kore ng'elaa ee lolo liking'elaki naa nanu etumo.>> 4Amu kore pooki naaigeroki apake too Lkigerot naa keigeroki payie eiteng'en iyioo, paa kore te ng'iriata o rreten nikitum too lolo Kigerot, nikimbung siligi lang. 5Meichoo ntae Nkai naa ninye eing'uaa ng'iriata o rreten entum mparrunoto nabo ana inia naata Kristo Yeso, 6paa kore tanaboicho o to ltoilo obo, nitumokiki aisisa Nkai e Laitoriani lang Yeso Kristo naa ninye sii Papa lenye.

Entang'amaroto

7Entang'amaroto, ana payie etang'amayie ntae Kristo, payie etum Nkai nkisisa. 8Amu kajoki ntae nchere, ketaa Kristo laisiaayiani too Lyiaudi payie eitodolu ajo keisiligai Nkai, netum aitededeyie lekutukie apa ooichoo Nkai lmakui, 9#2Sam 22:50; SNk 18:49netum lkulie oreren aisisa Nkai tankaraki e lng'ur lenye, ana naigero ajo, <<Tankaraki inia, kaaisis iyie taatua loreren lamara loo Lyiaudi, narany arrep nkarna ino.>> 10#Nkit 32:43Nejo aitoki, <<Enting'idata ntae loreren lamara loo Lyiaudi tenebo o ltung'ana lenyena.>> 11#SNk 117:1Neitoki ajo, <<Esisa Laitoriani ꞉ntae loreren pooki, ninchocho ltung'ana pooki meisisa ninye.>> 12#Isa 11:10Neitoki Isaya ajo, <<Keipung'u kenya ntanai e Yese, ilo oiliepu aitore loreren, neisilig ꞉loreren ninye.>> 13Naa meiputa ntae Nkai e siligi ng'ida o sotua irukuruk ninye, paa kore to ngolon e Ltau Sinyati nirrapaii te siligi.

Paulo Lkipaaret loo loreren

14Kore nanu lalachera o nkanachera ainien, kaata sipata naipirita ntae ajo, kebore ntae supaticho, nebore ng'eno, naa indimdim aaitaarriyianata maate. 15Kake kore eyia, kaigeroka ake ntae aaitieu, aitaparru ntae nkuti baa. Kataasa inia tankaraki munyani naaichoo ꞉Nkai, 16mataa laisiaayiani le Kristo Yeso payie atum atabaki ltung'ana loo loreren, nalikoo Lomon Supati ana neas laitainoni la lasar teneitai lasar, payie eaku ltung'ana loo loreren nkichooroto nang'amaa ꞉Nkai, eitisinyaki to ngolon e Ltau Sinyati. 17Naaku kailach taatua Kristo Yeso tankaraki inia kisiaayiare ai te Nkai. 18Amu meatae ntoki naitieu airoro mara ake inia nataasa Kristo ta nanu, payie etum loreren aayanyita Nkai. Kaatasichere ninye tee rereii o taa asat 19o taa asat naaitodolu nkitoo enye o taa mbaa e nking'asia o to ngolon e Ltau Sinyati. Paa kore ang'asu te Yerusalem o lubot naanyikita ana metabaki mbata e Ilirikum, nalikoo Lomon Supati le Kristo to ng'oji pooki. 20Naaku katumuta apa ajo malikoo Lomon Supati to ng'oji neyieloi Kristo, payie machet neitamanyua ꞉likae. 21#Isa 52:15Kataasa ana inia naigero ajo,

<<Kore lolo leitu apake elikini mbaa enyena, naa kedol,

naa kore lolo leitu ening apa nening'u.>>

Yieunoto nayieu ꞉Paulo neisabaki Rrom

22 # Rrom 1:13 Kaaibooyieki nkatitin kumo paa malotu nitii. 23Kake kore amu merokure aata siaai too kuna bat e nkop, nateyiewua apake larin kumo nalotu nitii, 24kaisilig ajo kaisabaki ntae aimaa aloito Sipein, nawuon tenebo o ntae peneu ang'idakino mboita inchi, kore tesiedi inia nikintanapnap machomo kue to lototo ai. 25#1Lkor 16:1–4Kake kore taata, kaloito Yerusalem ayaki sinyat le Nkai otii inie, nkichoorot naaretieki. 26Amu kore ltung'ana le mbata e Makedonia o Akayia naa ketachamaitie aaitai sotua o lolo aisinak sinyat otii Yerusalem. 27#1Lkor 9:11Ketachamaitie ninche pee eas inia, naa kedede keata sile enche. Amu kore tanaa ketang'arie ltung'ana le Yerusalem mayianat e Ltau ltung'ana loo loreren, keichiaakino sii payie eret ꞉ninche ltung'ana le Yerusalem too ntokitin naayieu. 28Kore naa tanaidip aitabaki ninche ntokitin pooki naatobosuaki, naimu ntae aloito kue abaki nkop e Sipein, 29naa kayielo nchere kore tanalotu nitii, nemayian ntae Kristo katukul.

30Kore ta Laitoriani Yeso Kristo o te nchaman naaichoo ꞉Ltau Sinyati, kaitaarriyian ntae lalachera o nkanachera ainien, entam larrabal tenebo o nanu to nkomono kiomonokitata Nkai. 31Entoomon payie aalakuni too ltung'ana lemening'icho ootii Yudea, neng'amaa ꞉sinyat ana reto ai te Yerusalem, 32niomonmon payie atum ayeu aata ng'ida echam Nkai, nayeng'iyeng'a tenebo o ntae. 33Metaa Nkai e sotua tenebo o ntae pooki. Aamin.

Currently Selected:

Rroman 15: saq

Highlight

Copy