Lburania 8
8
Lning'o ng'ejuk
1 #
SNk 110:1
Kore mbae e tipat ee kuna nikijeito naa ana: Ikiata laitainoni kitok la lasar otowuana te chumata te tetene e lorika le nkitoo e Nkai naaisul pooki. 2Kera ninye laitainoni la lasar oisiaaicho to Ng'oji sinyati naaisul ta nkaji nadede e Nkai, inia naa Laitoriani oitibira mara ltung'ani. 3Amu kore laitainoni kitok pooki la lasar naa ketegeluaki payie eichooyo nkichoorot o lasarri, naaku keyiere sii paa kore Kristo neata ntoki naichooyo. 4Kore duo tanaa keti ninye ana kop naa meaku laitainoni la lasar, amu keatae laitainok la lasar ooichooyo nkichoorot ana nayieu nkitanapat e Nkai. 5#Nai 25:40Ketuwuana nkisiaayiare enche tene to nkop ana nkitanyanyukoto, nera ntoki nalio e nkisiayiare nadede e chumata. Amu kore apa payie eaku kechet Musa nkaji e Nkai, neitaarriyian ꞉Nkai ajoki, <<Ntibira ntoki pooki metinyunyukore inia naaitoduaa to ldonyuo.>> 6Kake kore Kristo naa keata nkisiaayiare nalang naata apa laitainok la lasar, ana nalang ꞉ilo ning'o oara ninye laitutumoni, ilo ning'o musana tankaraki keirichakino lekutukie supati oaalang lo lning'o musana. 7Kore tanaa meitoki apa nang'oriki ilo ning'o lekue anata meatae tipat nayeunyieki likae ning'o. 8#Yer 31:31–34Amu ketoduaa Nkai ajo keitarroitie ltung'ana nejo,
<<Kejo Laitoriani, kelotu kenya nkata
naitai lning'o ng'ejuk
o lmarei le Isirael o le Yuda.
9Nemetuwuana ilo ning'o ana ilo apa
laitibira o lmakui lenche,
inia kata apa payie aibung ninche ta nkaina ai
narik aitung'aa Misiri.
Neitu apa eaku loosiligai te ilo ning'o lai,
naiwuatuwuata taa nanu aing'uaa ninche.
10Amu inji ejo Laitoriani,
Ele lning'o laitibir o lmarei le Isirael te inia kata kenya:
Kapik nkitanapat ainien atua mparrunot enche,
naiger taatua ltauja lenche,
naaku nanu Nkai enche, neaku
ninche ltung'ana lainien.
11Nemeatae loitoki aiteng'en le latia enye tanaa lalache lenye ajoki,
<Teyielo Laitoriani,>
amu kaayielou ninche pooki,
ang'asu lkini ana metabaki lkitok.
12Amu kapaliki ntorrok enche, namaigil aikata aparru ng'ok enche.>>
13Kore tenejo Nkai lning'o <<Ng'ejuk>>, naa keikena ilo lekue ajo keimusana, naa kore ntoki natumusana, nemerokure eata tipat naa ketaa keichunye.
Currently Selected:
Lburania 8: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
