Lburania 5

1Kore laitainoni kitok pooki la lasar naa taatua ltung'ana ake ootuwuana ninye egeluni, payie etum aitacheki ninche taa mbaa e Nkai, neichooyo nkichoorot o lasar le mpalikinoto ee ng'ok. 2Keidim ninye ateretu to mborron lolo lemeitoki eyielo netopong'ori, amu kore abaki ninye koon, naa keata ake nchalan naijo inia. 3#Lal 9:7Naa kore tankaraki inia, meata ajo meitai ninye lasar tankaraki ng'ok enyena o noo lkulie tung'ana sii.

4 # Nai 28:1 Meatae ltung'ani oitaa koon laitainoni kitok la lasar peechu ake naa Nkai nategelua, ana apa payie etegeluaki Aron. 5#SNk 2:7Nejia sii etiu Kristo, eitu eitaa koon laitainoni kitok la lasar, kake Nkai natiaka,

<<Ira iyie Nkerai ai,

nataa nanu anapar Papa lino.>>

6 # SNk 110:4 Nejo aitoki Lkigerot Sinyat ta nkae ng'oji, <<Ira laitainoni la lasar ntarasi, ana neikununo apa Melkisedek.>> 7#Mat 26:36–46; Mrk 14:32–42; Luka 22:39–46Kore apa ebikito Yeso tana kop, ketoomono neichiraki Nkai too lkiyio, inia Ai naaidim aitejeu atirichie lkiye. Nening Nkai nkomono enye tankaraki naurie ninye. 8Kore abaki era ninye nkerai e Nkai, neyielou too sinaitin ootumo neiko tenening Nkai. 9Naaku kore payie eisulieki, neaku ninye etumie pooki ng'ae oning ninye njeunoto ee ntarasi, 10neitaa ꞉Nkai ninye laitainoni kitok la lasar ana neikununo apa Melkisedek.

Entodol ake emung'uaa nkurukoto

11Kore taa mbaa naaipirita ana bae, kaata duo lomon kumo lajo, kake kegol limunoto amu misiokiki aaning'u mbaa. 12#1Lkor 3:2Amu kore ntae naa keyiere apa nitaa laiteng'enak, kake ewuon ake iyieuu ltung'ani oiteng'en ntae mbaa naalelek e rerei le Nkai. Kore taata ewuon ake irara ltung'ana laa kule aapeny eidim aatamat alang ndaa nagol. 13Naa kore pooki laa kule e lkina ake eichiwue naa ewuon era nkerai kini, nemeyielo atooro ntoki nadede o nemedede. 14Kake kore ndaa nagol naa noo ltung'ana botoro ootomoo eiteng'en ate aatoor ndedei o sapare.

Currently Selected:

Lburania 5: saq

Highlight

Copy

Compare