Lburania 4

Nkiyeng'iyeng'ata naitayia Nkai lekutuk ajo ketum ltung'ana lenyena

1Naa kore ake ewuon etii lekutuk oitaka iyioo ꞉Nkai payie kitum nkiyeng'iyeng'ata enye, matodol ate payie meatae ake taa ntae lolau. 2Amu ketilikaki abaki iyioo Lomon Supati ana apake natilikaki ninche, kake eitu eret ninche lolo omon ootining'o tankaraki neitu eng'amaa to nkurukoto. 3#SNk 95:11Kore iyioo ooiruko naa iyioo oojing atua inia kiyeng'iyeng'ata enye. Netejo Nkai taa naipirita lkulie,

<<Inia paa kore to ngoro, naimie te lekutuk nchere,

<Mejing katukul atua nkiyeng'iyeng'ata ai> >>.

Naa ketejo nejia abaki eidipe apake ntoki pooki payie eidip aitibira nkop.

4 # Ng'as 2:2 Amu keigero ta nkae ng'oji too lkigerot Sinyat neipirita mparri e sapa payie eidip Nkai aitibira nkop nchere, <<Kore ta mparri e sapa neyeng'iyang'a Nkai te siaai lenye pooki.>> 5#SNk 95:11Kake kore eyia ketejo tanaduo ng'oji, <<Mejing katukul atua nkiyeng'iyeng'ata ai.>> 6Keatae nkiyeng'iyeng'ata natum lbata, kake kore apa lolo ootining'o lomon supati neitu etum ninche tankaraki neitu ening Nkai. 7#SNk 95:7,8Naaku keinyiaaka Nkai agelu nkae parri, natejo <<Anapar>>, inia kata apa eima nkata naado, payie eicho Daudi rerei ojo ana naigero tanaduo ng'oji ajo,

<<Kore tinining'ining anapar ltoilo lenye

emintogol nkuechi inchi.>>

8 # Nkit 31:7; Yoch 22:4 Amu tanaa ketiriko ꞉Yochua ninche metijing'a atua nkiyeng'iyeng'ata, anata eitu eitoki Nkai aimaki tesiedi nkae parri. 9Naaku kewuon ake eatae nkiyeng'iyeng'ata natum ltung'ana le Nkai. 10#Ng'as 2:2Amu kore pooki ng'ae ojing atua nkiyeng'iyeng'ata e Nkai naa keyeng'iyeng'a abaki ninye te siaai lenye ana payie eyeng'iyeng'e Nkai. 11Naaku matonyok aatum inia kiyeng'iyeng'ata, payie meatae ake lobo orria ana lolo apa oaatanya ening Nkai. 12Amu kore rerei le Nkai naa keichu neata ngolon. Kepi alang lalem opi mbat pukura, nerem arich nkurruk o nkichui o loik o ntolo, neidim atukurru mparrunot o yieunot e ltau naaisudoro. 13Nemeatae hoo ntoki naisudori tekue Nkai. Keibala ntoki pooki tekue nkonyek enyena, ilo laa ninye oipar iyioo mbaa pooki.

Yeso laitainoni lang kitok la lasar

14Naaku kore amu ikiata Laitainoni kitok la lasar oiliepa aim keper ajing chumata, Yeso Kristo Nkerai e Nkai, maibung'a naa aitirrichaki inia kurukoto nikilimu aajo ikiata. 15Amu mara laitainoni kitok la lasar lemeiseyie ꞉nchalan ang ikiata iyioo, kake ikiata ilo otetemaki too nkoitieii pooki ana natemitae iyioo, kake neitu eas ng'oki. 16Naaku maotu tekue lorika le Nkai ang naata lng'ur mikiata ngureticho, payie kitum aatang'amai lng'ur o munyani naret iyioo ta nkata naichiaakino.

Currently Selected:

Lburania 4: saq

Highlight

Copy

Compare