Lburania 10

1Kore nkitanapat e Musa, naa keata loip loo nana baa supati naapuonu, mara nenia baa supati eata kake loip ake. Kore abaki eitaitae lolo asarri ooitanapaki tee nkitanapat lari o lari, naa meidim aikata aaitaa lolo oopuonu tekue Nkai loosipat. 2Tanaa apa keidim, anata etapalaki meitaini amu kore inia kata nabo ake naa keidip aitisinya lolo oopuonu tekue Nkai metaa meitoki aadol aajo ketaasa ng'oki. 3Kake kore lolo asarri naa keitaparru ninche ng'ok enche lari o lari, 4amu meidim lodo laa laing'ok o laa ntare aaitai ng'ok. 5#SNk 40:6–8Kore naa payie elotu Kristo ana kop nejo, <<Miyieu apa iyie lasarri o nkichoorot, kake ikinchoo sesen. 6Neitu ichamaa iyie lasar opejori o lasar loo ng'ok. 7Najo, <Lele nanu, kayewuo aas ana niyieu iyie Nkai ai, ana naigeroki to mbuku ino sinyati naaipirita nanu.> >> 8Ketang'asa ajo, <<Miyieu apa lasarri oopejori o nkichoorot o lasar loo ng'ok, neitu ing'idakino iyie ninche>> abaki eyiere payie eitaini ana najo nkitanapat. 9Neitoki ajo, <<Lele nanu, kayewuo aas ana niyieu iyie.>> Kore peejo nejia, neiwuang'ie inia oitiei apa musana nasayieki ninye neyau ng'ejuk. 10Naa kore te inia yieunoto enye, neitisinyaki iyioo te sesen le Yeso Kristo oataa lasar lang nkata nabo ake.

11 # Nai 29:38 Kore ake laitainoni pooki la lasar naa meatae mparri nemeitache aas siaai lenye, eigil aitai lolo asarri le oochiaake lemeidim hoo katukul aawaita ng'ok. 12#SNk 110:1Kake nkata nabo ake eitayia Kristo koon aaku lasar loo ng'ok obik ntarasi, newuon ta nkaina e tetene e Nkai. 13Kore ang'asu inia kata naa keanyuta meidacha lmang'ati lenyena murto. 14Amu kore tankaraki nataa ninye lasar nkata nabo, neitaa lolo ooitaaki sinyat, ltung'ana lemeata ntioto ntarasi. 15Naa ketilika sii iyioo Ltau Sinyati sipata naipirita ana. Kore eidipa atejo, 16#Yer 31:33<<Ele lning'o lalo nanu aitai o ninche te siedi nenia perot, kapik nkitanapat ainien atua ltauja lenche, naiger taatua nkuechi enche,>> 17#Yer 31:34neitoki ajo, <<Maitoki aikata aparru ng'ok o ntorrok enche.>> 18Kore naa etapalikaki ng'ok, naaku meitokini aaigil aaitai lasarri loo ng'ok.

Yeso nkoitiei najing'ieki Ng'oji sinyati naaisul pooki

19Naaku lalachera o nkanachera, ikindim aatijing inie Ng'oji sinyati naaisul pooki mikiata ngureticho tankaraki naibukoyie Yeso lodo lenye. 20Kore lkiye le Yeso naa ninye nkoitiei ng'ejuk naichu nikijing'ie, aapachaki inie Ng'oji sinyati naaisul pooki#10:20 Kore tinikijo aapachaki inie Ng'oji sinyati naaisul pooki naa keasichere laigeroni le ana palai likae rerei oji inia anka naa sesen le Yeso. Kore apa inia anka naa keisapuk, neor nkaji e Nkai, metaa ninye ake apeny epach laitainoni kitok la lasar nkata nabo ta lari, tenejing atua inie Ng'oji sinyati naaisul pooki., 21nikiata laitainoni kitok la lasar supat oitacheki ltung'ana le Nkai. 22#Lal 8:30; Ese 36:25Naaku matinyikaki naa Nkai ta ltau odede kiata sipata ee mbaa nikiruko, neitukoyieki mbaa pooki torrok nikimusoo aajo kintarruoitie to lodo le Kristo neitukoki seseni lang ta nkare jirlil. 23Mikipal kilimu aaipidaki ilo siligi likijo ikiata, amu keisiligai ilo oichoo iyioo lekutuk. 24Maing'urai sii nikinko payie kerretena likae o likae aaitoduaaya nchaman nikias supati. 25Nimikipal mikitumo tenebo ana neasita lkulie, kake entogoloto, naleng idolitata aajo ketinyikua Mparri e Laitoriani.

26Amu tinikiche aabaraki aas ng'ok kindipa aateyiolo sipata nadede, naaku merekure eatae likae asar ooitukoo ng'ok ang. 27#Isa 26:11Kore natiu naa nkiguana o nkima napi namut lolo mang'ati le Nkai kianyuta te ngureticho. 28#Nkit 17:6, 19:15Kore apa teneany ltung'ani eirukurukore nkitanapat e Musa, naa keri metua meatae lng'ur teneatae ltung'ana oare tanaa okuni oaata sipata e inia. 29#Nai 24:8Entaparrai naa ja newua wochoto naichiaakino ltung'ani lemeyanyit Nkerai e Nkai, newa ilo odo lo lning'o oitisinya ninye metaa ntoki namara sinyati, netediaa Ltau Sinyati oicho iyioo munyani e Nkai. 30#Nkit 32:35, Nkit 32:36Amu ikiyielo ninye otejo, <<Nanu oitalakicho naa kaitalaku nanu>> naa kore aitoki, <<Keiguanare ꞉Nkai ltung'ana lenyena.>> 31Naaku ntoki naituriaicho oleng tinirrachu koon itii nkaik e Nkai naichu naiguanicho.

32Entaparru apa payie ing'amumu wong'an e Nkai, ninkuna payie ing'iriri sina ogol. 33Ketediaaki neitami ntae sina tekue ltung'ana, nintokiki sii aikata aaku tenebo o lkulie ooitaasitae nejia. 34Ing'urrie ntae lolo ooteenaki te jila, nitachamaitie te ng'ida meewae ntokitin inchi amu iyielolo aajo iatata ntokitin e tipat naabik ntarasi nianyutata naalang nenia naawaki. 35Naaku eminturraa nkiteunoto inchi, amu keyau laata kitok. 36Keyiere ning'iriri payie itumtum aataas yieunoto e Nkai, nitumtum inia naitayia Nkai lekutuk ajo keicho ntae. 37#Abak 2:3,4Amu kejo lkigerot sinyat, <<Kore ta nkata nataana oleng naa kelotu ilo olotu, nemeimalmal. 38Kore ltung'ani lai loosipat naa nkurukoto eichiwue. Naa kore teneiwuatuwuata arrinyo siedi, namang'idakino nanu ninye.>> 39Kake mikira iyioo lolo ooiwuatuwuata aarrinyo siedi, kake ikiata nkurukoto naa ikitum nkichui ee ntarasi neiteng'elakaki iyioo.

Currently Selected:

Lburania 10: saq

Highlight

Copy

Compare