2 Timoti Mbaa naaituruku
Mbaa naaituruku
Keigero Paulo ana palai te jila ta nkata e siedi nateenaki, ewuon eng'or nkini kata payie ear ꞉ilo kitok torno loo Rroman oji Nero ninye metua. Kore Nero naa larikoni apa loo Rroman oibookicho nkop te rikore naa ninye apa Kaisari inia kata. Mesip ltung'ana lari oigeroki ana palai, kake keibala ajo ketepejoyie Nero lkerenket le Rrom ta lari le 64, near koon metua ta lari le 68. Naa kejo ltung'ana kumo ketaraki Paulo ta lari le 67 tanaa ta lari le 68. Nerewaki ꞉Paulo Timoti ana palai ewuon etii apa lkerenket le Epeso.
Ketumo apa Paulo ꞉liyio tankaraki natung'aitie sotuatin lenyena, naa tankaraki inia payie eyieu nedol Timoti. Kake eitu egila ninye ltau amu keata apa ninye sipata, nchere kore abaki etaa keri metua, naa keata ake Nkai ngolon naidimie ninye meitacho taatua ilo sina otumuto to nkop, ewuon eitu ejing atua nkichon ee ntarasi.
Kore tana palai, naa keitogolo ꞉Paulo nkanisani naaitamita apa ꞉laduo arikoni loo Rroman oibookicho nkop sina. Nerreten sii Timoti mechomo kue eiruk lomon le Kristo, nenyok meata ng'ureticho, alikoo rerei le Nkai abaki etii sina o larrabal. Neitaarriyian sii payie edol nebuaaki lolo ooiteng'enicho nkiteng'ena e sapare.
Kore naipirita ana palai naa payie eitogoli ltung'ana meting'iria taa nkatitin e sina. Amu Nkai ake nadung mbae pooki, naa ninye nalaaki lolo oopik siligi atua ninye. Kore nkichon e Paulo naa nkitanyanyukoto supat nayiere payie eduaari.
Currently Selected:
2 Timoti Mbaa naaituruku: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy