1 Ltesalonike 5
5
Enterretenata nimiurieichocho
1Lalachera o nkanachera, kore mbaa naaipirita nkatitin o ng'amat, naa meyiere nikingeroki ntae, 2#Mat 24:43; Luka 12:39; 2Pet 3:10amu kore ntae maate, naa iyielolo katukul aajo kelotu mparri e Laitoriani ana neiko lapurroni tenelotu meitekini kuarie. 3Kore ewueni ltung'ana aajo, <<Keti seriani o sotua>>, kore ta nkata nemeitekini, neirrachu mutai ninche ana neiko saisai teneirrachu ntomononi natunute, nemeata hoo nepaachereyie. 4Kake lalachera o nkanachera, mitii naa ntae atua naimin eji paa keirrachu ntae inia parri ana lapurroni. 5Amu irara ntae pooki nkera e wong'an, nirara sii nkera e mparkiji. Mikira ne nkuarie anaa ne naimin. 6Naaku naa, mikilura ana neiko lkulie kake matirripicho nikiparricho aaitibiraki! 7Amu kore looilura naa kuarie eilura, kore sii loomera naa kuarie emera. 8#Isa 59:17; Epe 6:13–17Kake kore amu ikira le mparkiji, mataa loaaparricho aaitibiraki! Maichopo naa nkurukoto o nchaman ana nchuret e lgoo, nikinchop sii siligi le njeunoto ana nkopiyia e senkei.#5:8 Kore nchuret e lgoo o nkopiyia e senkei todua picha e sikarii loo Rroman te mbuku ee Epeso 6:10–17. 9Amu eitu egelu iyioo Nkai payie emut iyioo ngoro enye, kake payie kitum njeunoto naimu Laitoriani lang Yeso Kristo, 10ilo otua tankaraki iyioo paa kore tanaa ikinchu tanaa kilurate, naa ikinchu tenebo o ninye. 11Naaku entaarriyianata, nintogololo ltauja ana ninkunitata.
Nkitaarriyiana o nkirorokino e siedi
12Naa ikisai ntae lalachera o nkanachera, payie ianyitinyit lolo oonyokita eas siaai taatua ntae, nerikoo ntae taatua Laitoriani, neing'ode ntae payie miasias ntorrok. 13Ninchocho ninche nkanyit te nchaman kitok oleng tankaraki siaai enche. Entubulai seriani taatua ntae! 14Lalachera o nkanachera, ikilej ntae! Eng'odia lolo lemeyieu neas siaai, entogolo lolo ootigilete ltauja, niretret loaachal tee seseni, ning'iriri too ltung'ana pooki. 15Entodol metaa, meata linchi oitalaku ntorno to ntorno, kake entonyok entaasata maate o lkulie tung'ana pooki mbaa supati nkata pooki.
16Enting'idata nkata pooki.
17Emipal aikata miomonmon.
18Kore taatua mbaa pooki, enchoo Nkai nache, amu inia eyiewuoki ninye ntae taatua Kristo Yeso.
19Emiar nkima e Ltau Sinyati.
20Emimen naibon e Nkai, 21kake entetem ntoki pooki, nintirrichakiki aaibung inia supat.
22Entapaachere mpukunot pooki torrok.
23Naa enchoo meitisinya ntae katukul Nkai e sotua makoon. Kore mpukunoto inchi pooki, aa nkiyeng'et o nkichui o seseni linchi, naa enchoo metaa meata ntioto to lotunoto e Laitoriani lang Yeso Kristo. 24Kore ilo oipoto ntae naa keisiligai, naa keas ninye.
25Lalachera o nkanachera, entoomonoki iyioo. 26Eroroki lalachera o nkanachera pooki to ngusoto e nchaman.#5:26 Kore ngusoto naa nkoitiei apa nairorokinereki te inia kata.
27Kaitanap ntae ta nkarna e Laitoriani payie eisomakini ana palai lalachera o nkanachera pooki. 28Metaa munyani e Laitoriani lang Yeso Kristo tenebo o ntae.
Currently Selected:
1 Ltesalonike 5: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
