1 Petero 3

Ntomononi o lpayian lenye

1-2 # Epe 5:22; Lkol 3:18 Natomonok, entodoi ate taa lpayiani linchi, paa kore abaki tenetii loaany eibung rerei le Nkai, neyietu lwuenet linchi metaa le Kristo tenedol ninkoko tiniwuenini te sinyaticho iyanyitnyit lpayiani linchi, eitu ijoijo ntae rerei. 3#1Tim 2:9Emincho sikar inchi e sesen eaku, ne nkitibirata ee lpapit nipikaka masaa e saabu naagol nkinyiang'a, tanaa inchopchop nankan naaipaipai, 4kake enchoo sikar inchi eaku naa ltauja, inia sikar nemelioo nememutari, aa taa ltau oanana nebor, inia taa eiken Nkai ajo toki tekue ninye. 5Nejia sii eikuna ntomonok sinyat e apa naaisiligita Nkai teneisikarrie ate. Keitodoitie ate taa lpayiani lenche, 6#Ng'as 18:12ana apa Sara, naata nkanyit ta lpayian lenye Abraam neipot ajo <<Lkitok lai.>> Kore ntae naa irara nkera enyena iasitata sipat, niminchocho hoo ntoki eituria ntae.

7 # Epe 5:25; Lkol 3:19 Kore sii ntae lpayiani, meata lemewuon tenebo o ntomononi enye, iyielolo aajo kechal ntomononi alang lpayian, ninchocho nkanyit payie meiboori nkomono inchi, amu ketum sii ninye tenebo o iyie nkichon ee ntarasi pecheu.

Nchula ee ꞉ltung'ana ooiruko Yeso

8Kaidip ana kitaarriyiana ajoki ntae payie iwuenini pooki inyanya nabo, niatata lng'er, nichamama ana lalachera o nkanachera, nenanaa ntae ochuaa, niborbor. 9Emilaaki ltung'ani ntorrok too ntorrok anaa ldeket te ldeket, kake entalaaki mayian amu inia eipotoka ntae Nkai payie itumtum mayian metaa ninchi. 10#SNk 34:12–16Amu kejo lkigerot sinyat,

<<Kore ilo oyieu neng'idakino nkichon

nedol mperot supati,

naa keyiere payie eibooyo lng'ejep lenye pee meiro ntorroni,

nemeimunyie nkutuk enye sapare.

11Keyiere payie meitoki aas ntorrok, kake payie eas supati,

neyiaya seriani, nenyok aing'oru.

12Amu kore nkonyek e Laitoriani naa loosipat eing'or,

neinining nkiyiaa enyena nkomono enche.

Kake netusuboka nkomom enye laasak loo ntorrok.>>

Meitoki sina tanaaku iasitata supati

13Amaa, ng'ae sa oitaas ntae ntorno, tanaa inyoknyok aas supati? 14#Mat 5:10#Isa 8:12,13Kake kore abaki eitam ltung'ana ntae sina tankaraki nirara loosipat, naa imayianana. Emiata ngureticho tankaraki ninche, nimiirranana. 15Kake enkena taa ltauja linchi aajo keisinyati Kristo, oara sii Laitoriani linchi, nirretenana payie iwolikiki pooki ng'ae oipar ntae ajo nyo eitacheyie siligi linchi. 16Kake entaas inia to mborron o ta nkanyit, ining'ning taa ltauja linchi aajo kore inia niwolikitata naa kedede, paa kore lolo oodek ntae aaitarruoo nkarn tankaraki e lwuenet linchi supat taatua Kristo, neitami anyit. 17Amu naikach teneitami ntae sina iasitata supati, tanaa duaake yieunoto e Nkai inia, alang teneitami ntae sina iasitata ntorrok. 18Keitamaki naa Kristo sina nkata nabo tankaraki ng'ok, kera ninye loosipat netanang'a ltung'ana lamara loosipat, payie etum atirikoki iyioo Nkai. Ketua ninye te sesen kake neitipiuni ltau, 19nelo teinia pukunoto aliki ltauja ooyenaro#3:19 Kore ltauja ooyenaro naa keidim neipirita lmalaikani oaatanya apa ening Nkai. lomon lenyena, 20#Ng'as 6:1—7:24amu kore lolo tauja naa ketanya apa ening Nkai, eanyuta ninche te ng'iriata ta nkata apa nachetita Noa meli. Lkuni tung'ana ake isiet ootijing'a, neitejeunyieki nkare. 21Kore inia naa maaji e nkipatisa naitejeu taata ntae. Meipirita taa inia ajo keituk sesen aoru latukuny, kake ntoki naitisipu ajo merekure etii ntoki niurie tekue Nkai tankaraki ketipiwua Yeso Kristo, 22ilo oiliepa alo chumata, newuon ta nkaina e tetene e Papa etii lmalaikani o lolo oaata nkitoo o lolo oaata ngolon taabori ninye.

Currently Selected:

1 Petero 3: saq

Highlight

Copy

Compare