1 Yoana 4

Ltau le ndedei o le sapare

1Lacham lainien, emiiruk ltau pooki, kake entisipu ltauja payie iyielouu tanaa Nkai eing'uaa, amu ketijing'a nkop ꞉loibonok kumo le sapare. 2Naa ana iyielounyienyie Ltau le Nkai: Kore ltau pooki oibalunyie ajo keyewuo Yeso Kristo era ltung'ani naa le Nkai, 3naa kore ilo pooki lemeibalunyie Yeso naa mara le Nkai. Kore ele tau naa le ilo oiba Kristo, litining'o apake aajo kelotu, naa keti abaki taata nkop. 4Nakera ainien, irara ntae ne Nkai, nindipa aatimir lolo oibonok le sapare, amu kore ilo otii atua ntae naa keikitok alang ilo otii nkop. 5Kera ninche ne nkop naa inia pee eiro ana neiko nkop teneiro, nening ꞉nkop ninche. 6Nikira naa iyioo le Nkai. Kore pooki oyielo Nkai naa kening iyioo, naa kore ilo lamara le Nkai nemening iyioo. Ana naa kiyielounyie Ltau le ndedei o ltau le sapare.

Nchaman e Nkai

7Lacham lainien, matachamata amu kore nchaman naa Nkai eing'uaa. Naa kore pooki oachamicho naa keino ta Nkai, neyielo Nkai. 8Kore pooki lemechamicho naa meyielo Nkai, amu kore Nkai naa nchaman. 9Naa nchi eikuna Nkai payie eitodolu nchaman enye tee iyioo, nchere eirriwua inia Kerai enye nabo ake naino, meeu nkop payie eaku ninye kinchiwue. 10Kore nchaman naa ana: Mara iyioo oaatachama Nkai, kake ninye natachama iyioo, nereu Nkerai enye peaku lasar loo ng'ok ang. 11Lacham lainien, kore amu ketachama iyioo Nkai aiko inji, keiririkino sii tinikichama iyioo. 12#Yoa 1:18Meatae aikata ꞉ltung'ani otodua Nkai. Naa tanaa ikichama maate, newuon Nkai taatua iyioo, neitabayieki nchaman enye taatua iyioo. 13Ikiyielo aajo kewuon ninye taatua iyioo nikiwueni iyioo taatua ninye, tankaraki ketang'arie iyioo Ltau lenye. 14Naa ikitodua nikilimu aajo keterewua Papa Nkerai enye metaa Laitejeunoni le nkop. 15Kore pooki oibalie ajo kera Yeso Nkerai e Nkai naa kewuon Nkai taatua ninye, newuon ninye taatua Nkai. 16Naaku ikiteyieloutua inia chaman naata Nkai te iyioo nikitipika siligi lang atua inia chaman.

Kore Nkai naa nchaman. Naa kore pooki owuon taatua nchaman, newuon Nkai taatua ninye. 17Tana eitabayieki nchaman taatua iyioo, payie kitum nkitieunoto ta mparri e nkiguana, amu kore netiu ninye naa nejia sii kitiu iyioo tana kop taata. 18Mewuon ngureticho tenebo o inia chaman, amu kore nchaman nasipa nemiraa ngureticho. Kore ngureticho neipirita ndung'oto e nkiguana, naa kore pooki oata ngureticho eitu ebulu abaya te inia chaman. 19Ikichamicho amu ninye apa oatachama iyioo tekue. 20Naa kore tenejo ltung'ani, <<Kacham Nkai,>> neiba lalache lenye, naa losapicho. Amu kore pooki lemecham lalache lenye otoduaa, meidim atachama Nkai neitu edol. 21Naa ana nkitanapata naichoo ninye iyioo, nchere kore ilo oacham Nkai naa keyiere sii necham lalache o nkanache enye.

Currently Selected:

1 Yoana 4: saq

Highlight

Copy

Compare