1 Lkorinto 4

Laitoriani ake odung mbaa ee laisiaayiak lenyena

1Enteyielo aajo ikira iyioo laisiaayiak le Kristo ooichooki metaa laing'urak loo mbaa naaisudoyieki apa e Nkai. 2Kore ake nayiere taa laing'urak naa payie etumi era looisiligai. 3Kore ta nanu madol hoo era toki tinikinguanguan ntae nanu tanaa sii aaiguanare nkae kiguana, namadung'oki sii nanu koon nkiguana. 4Maata mbae naparru naitarruoyie, kake mara inia naaitaa loosipat, Laitoriani ake laadung'oki nkiguana. 5Naaku emidung'oki ltung'ani nkiguana ewuon eng'or nkata nachukunyie Laitoriani. Amu kore Laitoriani, naa keibalunyie nenia naaisudoro ta naimin, neibalunyie sii yieunot ee ltauja loo ltung'ana. Kore taa inia kata, neicho ꞉Nkai pooki ng'ae rrepet naichiaakino.

6Kore naa lalachera o nkanachera aainien, kaimaka mbaa ainien o ne Apolos aitainyie nkitanyanyukoto payie mirepaa inia naigero too Lkigerot Sinyat, nemeyiere sii neatae lobo linchi ong'idare likae arikoni nemenaa likae. 7Amaa, ng'ae likintaa iyie le tipat alang lkulie? Nyo iata iyie namara inia nikinchoo Nkai? Naa amaa tanaa ta Nkai itang'amayie ntoki pooki niata, aanyo payie iilach?

8Eji ijoijo ntae iborere pii, neidipa Nkai atamayiana ntae oleng? Eji itaa dei lkinkii mikitii iyio? Oi siake duo tanaa itaa lkinkii payie kintoreicho tenebo o ntae. 9Kadol ajo ketipika iyioo Nkai kira lkipaareta le Yeso mataa ltung'ana le siedi, ana ltung'ana otudung'okaki nkiguana e lkiye eing'orita ꞉nkop pooki o lmalaikani, eng'ida. 10Kedol iyioo nkop ana lmada tankaraki Kristo, nedol ntae tana ltung'ana lenyena ng'eni! Nedol iyioo ana loaachal, nedol ntae ana loogol! Keyanyit ntae, nemen iyioo. 11Kore o taata ikiata sumach o nkure, mpurdat kinchopito neritae iyioo, nimikiata nikimanya. 12#Asat 18:3Keirraayie iyioo siaai ogol likiasita taa nkaik ang. Kore edeki iyioo, nikimayianicho, kore eitami iyioo sina, niking'iri. 13Kore teneitarruorri iyioo nkarn, nikiro to mborron. Kore o taata ikituwuana sordo e nkop o lokudong'oi loo nkejek ee ltung'ana.

14Kore naigerokita ntae naa mara payie aaitam ntae anyit, kake payie aitaarriyian ntae ana nkera ainien nacham. 15Amu kore abaki duaake tiniatata laiteng'enak 10,000 taatua Kristo, meatae lotiiwua ntae taatua Kristo Yeso, kake nanu otiiwua ntae taatua ninye payie aliki apa ntae Lomon Supati. 16#1Lkor 11:1; Lpi 3:17Naaku kaitanap ntae entoduaayieki, 17naa tankaraki inia payie airruaaka ntae Timoti, nkerai ai nacham naisiligai ta Laitoriani. Keitaparru ntae naikunari tanairukurukore Yeso Kristo, ana naiteng'enicho chiaake taa nkanisani to ng'oji pooki.

18Keti lbata linchi oaatang'asutua aaikar ejo malotu nitii. 19Kore ta nkata nataana echam Laitoriani, naa kalotu nitii. Naa kore payie abau inie, mara ake rerei loo kulo tung'ana ooikar alotu ayielou, kake ngolon naata ninche. 20Amu kore nkitoria e Nkai naa mara nee rereii lemeata tipat kake no ngolon. 21Kaa iyieuu too kuna? Kalotu nitii aata ng'udi tanaa te nchaman o ta ltau le mborron?

Currently Selected:

1 Lkorinto 4: saq

Highlight

Copy