1 Lkorinto 3

Oro taatua nchula ee ltung'ana ooiruko Kristo to Korinto

1Kore sii apa nanu lalachera o nkanachera ainien, mairorie ntae ana ltung'ana ooirukurukore Ltau le Nkai, kake kairorie ntae ana ltung'ana ooirukurukore mpukunoto enche torno, nairorie ana nkera kunini neitu ebulu taatua Kristo. 2#Lbr 5:12,13Kaichoo nanu ntae kule, mara ndaa nagol, amu midupdup aatam ndaa nagol. Newuon sii ake taata miduputata, 3tankaraki ewuon ake irukurukorere mpukunoto inchi torno. Amaa tanaa ewuon iatata lom o nchankar taatua ntae, meitodolu inia ajo ewuon eitore ntae mpukunoto inchi torno? 4#1Lkor 1:12Amaa tenejo likae, <<Kara le Paulo,>> nejo likae, <<Kara le Apolos,>> mitiuwuanana ake ana netiu chiaake ltung'ana le nkop?

5Nyo dei Apolos? Naa nyo Paulo? Ikira ake iyioo laisiaayiak oaatasichiere Nkai payie irukuruk ntae. Meatae tee iyioo lamara ilo siaai ake otegelaka ꞉Laitoriani easita. 6#Asat 18:4–11, Asat 18:24–28Katuuno nanu taatua ntae rerei le Nkai, nebukoki Apolos nkurukoto inchi nkare, kake Nkai naitubulua inia kurukoto. 7Naaku mara ilo oun namara sii ilo obukoki nkare oara le tipat, kake inia naitubulu nara netipat, naa Nkai inia. 8Kore ilo oun lantararai o ilo obukoki nkare naa kerisio tipat enche, nemeata lemelak ꞉Nkai te nkiririkinoto e siaai lenye oataasa. 9Amu laisiaayiak le Nkai oaasicho tenebo kira iyioo, nirara ntae lchampa lenye o nkaji natecheta ninye.

10Kore te nkiririkinoto e munyani naaichoo Nkai, naitamanyu lkitamanyunoto ana lachetani arriyia, nechetaa likae to ng'oji naitabaka nanu. Kake keichiaakino payie eing'or ltung'ani pooki neikunaa nchatata, 11amu meatae likae kitamanyunoto ooidim ltung'ani aitamanyu mara ake ilo otipikaki, naa Yeso Kristo taa ilo. 12Oo echetu ltung'ani nkaji enye te nkeper e ilo kitamanyunoto ta saabu tanaa to nkochelai tanaa too soito oogol nkinyang'a tanaa tee nkeek tanaa too nkujit tanaa tee mbene, 13keliooi kenya netiu siaai le pooki ng'ae. Amu kore kenya, keibalunyie inia ꞉parri e nkiguana ilo siaai te nkima, teneimieki siaai oataasa pooki ng'ae inia kima. 14Kore tenebik inia aji natecheta ninye eimieki nkima, naa ketum laata. 15Kake kore tenenya nkima siaai lo ltung'ani, nelo pus, kake keitejeuni ninye ana ake ltung'ani otowuapuaki taatua nkima.

16 # 1Lkor 6:19; 2Lkor 6:16 Amaa, miyielolo aajo irara ntae nkaji e Nkai naa atua ntae emanya Ltau le Nkai? 17Teneitarruo ltung'ani nkaji e Nkai, near ninye ꞉Nkai. Amu kore nkaji e Nkai naa keisinyati, naa ntae inia aji.

18Emisap ate! Kore tenetii lobo linchi ojo keing'en tana kop, oi eng'as aaku lmadai payie etum ng'eno nadede. 19#Ayu 5:13Amu kore inia najo ltung'ana ng'eno tana kop naa madai ta Nkai. Ana nejo Lkigerot Sinyat nchere, <<Keitukurru Nkai laing'eni te ng'eno enche.>> 20#SNk 94:11Neitoki ajo ta nkae ng'oji, <<Keyielo Laitoriani ajo kore mparrunot ee laing'eni naa meitoki.>> 21Naaku emincho hoo ltung'ani eng'idare likae tung'ani, amu kore ntokitin pooki naa nkuninchi. 22Linchi Paulo o Apolos o Kepa, naa ninchi nkop o nkichon o lkiye, taata o kenya. Meatae ntoki namara ninchi, 23kake kore ntae naa irara le Kristo nera ninye le Nkai.

Currently Selected:

1 Lkorinto 3: saq

Highlight

Copy