Ruuka 6:27-49

“M-bëënyu nkötëëbhya bhano mukunyitegherra. Mohanshenga abhabhisa abhëënyu. Abhantö bhano bhakobharegha, bhëënyu mobhakore bhuuya. Mongʼoore bhano bhakobhaihiima. Bhano bhakobhanyankya, bhëënyu mobhasaasaamerenga ku-Waryobha. “Hano ömöntö araakosere akoteme öröhë ko-mboto, umusyörri na emboto iyëndë. Hano ömöntö araakuruusi ëkööti yaaho, mohaane kora ishaati yonswe agheghe. Hano ömöntö wowonswe igho akosabhirë ëkëntö, omohaana. Hano ömöntö araakosake ëbhëntö ibhyaho, otakaamosabha akukyörri. Mokorrenga abhantö kya bhono mukutuna bhabhakorrenga. “Hano moraahanshe bhano bhabhahanshirë abheene igho, n-kë oraanyoore mökörrë? Kora abha ëbhëbhë bhonswe, nkohansha bharë bhano bhabhahanshirë. Na hano moraatöörri bhaara bhakobhatöörrya abheene igho, n-kë oraanyoore mökörrë? Kora abha ëbhëbhë bhonswe ni-igho bhakokora. Na hano moraahaanenga isiirë bhano mukwitengʼera igha bhareebhahaka abheene igho, n-kë oraanyoore mökörrë? Kora abha ëbhëbhë bhonswe nkohaana bharë bharikyabho isiirë, bhamanyirë igha, mbarehakwa isiirë iyaabho yonswe igho. “Kasi bhëënyu, mohanshe abhabhisa abhëënyu, mobhatöörringa. Mohaanenga abhantö isiirë motakwitengʼera igha, moreehakwa. Hayö ho murituhwa ituho enene, na hayö ho moraabhe abhaana abha Waryobha ono arëngë kighörö iya bhyonswe igho. Ko bhoora Waryobha, m-buuya akokorra abhakora amaghogho, na bhano bhataana umukumo. Mwabhere abhantö, kya bhono Suwëënyu uwa mu-ryobha akwabhera abhantö. “Motakaabhotorra abhandë ibhiina, ho na bhëënyu bhonswe motarebhotorrwa ibhiina. Motakaatema abhantö amasoro, ho na bhëënyu bhonswe motaretemwa amasoro. Mwabhere bhano bhakobhasarrya, okore na bhëënyu bhonswe, muushekwabherwa. Mohaanenga abhantö ëbhëntö, ho na bhëënyu bhonswe morehaanwa ëbhëntö. Morehaanwa ekerengere ikiiya bhököngʼu, keno kirisingisibhwa na ukwighaterwa, okore kyeshore kora kyetekerre. Mbe, ekerengere keno mokohaanera-mo abhandë, nkyo na bhëënyu bhonswe morehaanerwa-mo.” Yëësu akabharëngërya ëkërëngyö keno igha, “Umuhukuru natora okoraahuna umuhukuru murikyaye? Ndamanya hano araamoraahuune, m-bonswe igho bharaaghwe mu-rirooma! Umwegha tamanye amangʼana aheteere umwëghya uwaaye hë. Kasi hano araaiköngʼërri ko ghano akwëghibhwa ghonswe igho, ho araarengʼaane na umwëghya uwaaye. “Motakaabha kya ömöntö ono akomaaha ekesaara mu-riiso irya murikyaye, kasi takomaaha oromambo rono rörëngë mu-riiso iryaye umwene. Iyakë oraakore ötëëbhi murikyaho igha, ‘Tigha nkuruusi ekesaara mu-riiso iryaho,’ na eno mbe uwe noona oromambo mu-riiso iryaho? Ore mwikörya, ruusya tangata oromambo mu-riiso iryaho, ho bhoono oraatore okomaaha bhuuya, kya bhono oraaruusi ekesaara keno kërëngë mu-riiso irya murikyaho. “Teghooho ömötë umuuya ghono ghukwama sehagho sengogho hë. Kora ghwiki, teghooho ömötë omoghogho ghono ghukwama sehagho sinshiiya hë. Sehagho seno sekoreebhwa, tisikutwebhwa ko-bhehore hë. Ebhesaka ibhya amahwa, tibhikwama sitiini hë. Ömötë nkomanyerwa ghörë ko-sehagho isyako. “Ni-ighoigho na abhantö bhonswe. Ömöntö uwa heene, amangʼana aghaaye amaiya nkurwa gharë mo-maitegherro aghaaye agha heene ghano aanagho mo-nkoro iyaaye. Na ömöntö omoghogho wonswe, amangʼana aghaaye amaghogho nkurwa gharë mo-maitegherro aghaaye amaghogho ghano aanagho mo-nkoro iyaaye. Mbe, amangʼana ghano ömöntö akoghamba, n-gaara ghaishööyë mo-nkoro iyaaye. “N-kwakë mokomberekera bherekera igha, ‘Omonene uwëëtö! Omonene uwëëtö!’ Kasi ghano nkobhatëëbhya temokoghakora hë? Tigha mbarëngëri ëkërëngyö ikya ömöntö ono akwitegherra amangʼana aghaane na ukunyighwera, kya bhono arë. Uyö n-kya omohaghaashi ono yaatukirë obhorosa bhokahika ku-ritare, akahaghaasha inyumba. Hano imbura yaatööyë, omoghera ghokeeshora, amanshë ghakaghera, ghakaitema inyumba iyaaye iyö. Kora teghaghisingisiri hë, ko bhoora yaahaghaashirwë bhuuya. Ömöntö ono akwitegherra amangʼana aghaane kasi takunyighwera hë, uyö n-kya ono yaahaghaashirë inyumba iyaaye ko-mosense, atatukirë obhorosa. Hano imbura yaatööyë, omoghera ghokaghera, amanshë ghakaitema inyumba iyaaye, ekaihöngörrya hansë yonswe igho.”