Yaakobho 2
2
Motakaabha na ekeroterro
1Abhakumya bharikyane, kya bhoora mukukumya Omonene uwëëtö Yëësu Kiristo uwa ubhuhika, motakaabha na ekeroterro ko-bhantö. 2Toghambe igha, ömöntö ono aibhöhirë singibho sinshiiya, na atöörrë ku-kyara ikitwangʼa ikya esahaabhu, aishirë asöhirë mu-nyumba iya esango iyëënyu. Hano akomara ömötöbhu wonswe asohe aibhöhirë amatati. 3Momare mösërëëni uyö aibhöhirë bhuuya, momosooke na mömötëëbhi igha, “Ikara hano ho ahaiya.” Kasi mötëëbhi ömötöbhu oora igha, “Uwe imerra haara,” handë igha, “Ikara hansë ko-maghörö aghaane hano.”
4Hano moraakore igho, noraanyoore mwörökëri igha, mmoona ekeroterro, öbhöbhötöri ubhwënyu ubhwa ibhiina, m-boghogho.
5Abhakumya bharikyane abhaghonshe, munyitegherre bhuuya. Waryobha yaashaaghora abhatöbhu abha ko-kebhara kono, okore bhabhe abhaamë abha umukumo, kora bharaaghere umwandö ughwa Obhokama bhono yaaraghaini bhano bhamohanshirë. 6Kasi bhëënyu, nkosera mörë bhököngʼu abhatöbhu! Kanaa, abhaamë bhayö, te-bho bhakobhabhandërryanga, kora bhabhahira ko abhaahokania abha ibhiina? 7Te-bho bhakotoka iriina iriiya irya Yëësu Kiristo reno mokobherekerrwa?
8Mo-Maandeko Amahörëëru, amaraghërryö agha Obhokama ubhwa Waryobha gharaghamba igha, “Ohanshe murikyaho, kya bhono wihanshirë uwe umwene.”#2:8 Maaha mo-ketabho ikya Amangʼana agha Abharaawi 19:18. Hano moraakore igho, m-buuya oraanyoore mökörrë. 9Kasi, hano moraakore ekeroterro ko-bhantö, noraanyoore mökörrë ëkëbhë, na hayö ho amaraghërryö gharaabhashongere igha, m-basarya mörë.
10Hano ömöntö araaghoote amaraghërryö ghonswe igho, kasi rimwë remoterroke, naraabharwe igha, mosarya uwa ghonswe igho. 11Ko bhoora Waryobha ono yaatöörrë-ho amaraghërryö ghano ghakoghamba igha, “Otakaabha omosooraare,”#2:11a Maaha mo-ketabho ikya Ukurishoka 20:14; Eheetoko iya Etoraati 5:18. we uyöuyö yaatoora-ho kora ghano ghakoghamba igha, “Otakaita.”#2:11b Maaha mo-ketabho ikya Ukurishoka 20:13; Eheetoko iya Etoraati 5:17. Ku bhuyö nokaanyoora igha törëngë mosooraare hë, kasi waita, mo-bhasarya abha amaraghërryö okobharrwa.
12Ku bhuyö, mushumaashenga na okokora amangʼana, momanyirë igha, Waryobha narebhabhotorra ibhiina ko-maraghërryö ghano ghakoreeta öbhötöönööni. 13Waryobha takwabhera ömöntö wowonswe ono ataana amaabhë hë. Kasi naryabhera abha amaabhë urusikö urwa okobhabhotorra ibhiina!
Ukukumya na okokora amangʼana amaiya
14Abhakumya bharikyane, ömöntö ono akoghamba igha aana umukumo, kasi takokora amangʼana amaiya hë, n-hoorohooro kë araanyoore? Obhoheene ni-igha, umukumo ughwaye ghuyö, tëghömötööri hë. 15Hano oraanyoore umukumya murikyaho wowonswe igho, ataana singibho handë ibhyakorya, 16na Umukiristo murikyënyu amötëëbhi igha, “Kaghi na omorembe, Waryobha akohaane ribhereera na ibhyakorya,” kasi tamwibhöhëri hë, handë okomohaana ëkëntö ikya okorya hë, ömöntö kya uyö n-kë oraanyoore akörrë? 17Ni-igho ekobha hano mwabha na umukumo, kasi temokokora amangʼana amaiya hë, hayö nkunyoora örë umukumo ughwënyu ghuyö, ghwamara ukukwa.
18Kasi ömöntö uwöndë aratora okoghamba igha, “Uwe, oona umukumo na öni na amangʼana amaiya nkokora.” Mbe, öni nendaamötëëbhi igha, “Nnyörökya umukumo ughwaho ghuyö ghotaana amangʼana amaiya, na öni nkwöröki umukumo ughwane ko amangʼana amaiya ghano nkokora.”
19Nkukumya örë igha, Waryobha nö-ömwë igho. M-maheene ni-igho ërë! M-buuya okokora! Kasi amasambwa ghonswe nkukumya gharë ighoigho, kora nkurighita gharë na okoobhoha!
20Kana, m-mushiimushiimu örë! Nkutuna örë wörökibhwi igha, umukumo ghono ghotaana amangʼana amaiya, teghoona ubhwera hë? 21Ndarra Waryobha yaabharëëyë ghuuka Ibhurahimu#2:21a Ibhurahimu. Maaha mo-faharaasa. igha m-möntö uwa heene, ko amangʼana amaiya ghaara yaakörrë, ko okokora Isaaka omoona uwaaye abhe ikimwenso ko-hasë aha ukumwensera ku-Waryobha!#2:21b Maaha mo-ketabho ikya Okosemoka 22:1-19. 22Kasi tokomaaha igha umukumo ughwa Ibhurahimu, ngwaaraini hamwë na ghano yaakoranga? Ku bhuyö umukumo ughwaye, ngwaaimërëëyë ko mangʼana ghaara yaakoranga.
23Ghayö ngaakörrwë, kora ghakandekwa mo-Maandeko Amahörëëru igha, “Ibhurahimu yaakumiri Waryobha, kiyö nkyo kyaaghërrë Waryobha akamobhara igha wa heene.”#2:23 Maaha mo-ketabho ikya Okosemoka 15:6. Akabherekerwa igha, m-mosaani uwa Waryobha.
24Mbe, moramaaha igha Waryobha nkobharra arë ömöntö igha n-wa heene, ko okokora amangʼana amaiya, kasi tërëngë igha nu-mukumo ughwene igho, ghono ghotaana amangʼana amaiya hë.
25Kora Rahaabhu omoraaya oora, wonswe Waryobha yaamobharëëyë igha m-möntö uwa heene ko amangʼana amaiya ghano yaakörrë. Akasërëënia abhashamishya bhaara, akabhatöörya bhakakyora ko okohetera enshera iyëndë.#2:25 Maaha mo-ketabho ikya Yoshua 2:1-21, 6:22-25.
26Ku bhuyö hano oraanyoore ömöntö aana umukumo, kasi takokora amangʼana amaiya hë, umukumo ughwaye ghuyö, ghwakwa, ghwabha kya ikihundughu keno ketaana umwika.
Currently Selected:
Yaakobho 2: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.