2 Abhatësarönikë 3
3
Pauro arasabha bharikyaye bhabhasabheraninga ku-Waryobha
1Bhoono abhakumya bharikyëtö, motosabheraninga, okore amangʼana agha Omonene Yëësu gharomaane bhöngö. Motosabherenga, okore abhantö bhaghaikërri na bhaghasooke, kya bhoora yaarë kö-bhëënyu. 2Motosaasaamerenga, okore Waryobha atötöörri ko-bhantö abhaghogho na abhaköri abha amangʼana amaghogho, ko bhoora te-bhantö bhonswe igho bhakukumya amangʼana ghayö hë. 3Kasi Omonene Yëësu uwa heene, naraabhatogheke na abharende motakaanyoorwa na mangʼana agha Omoghogho oora. 4Omonene uyö, we akotohaana ubhweseghe obhonene kö-bhëënyu igha, nkokora mörë, kora moraaghëndërri okokora ghaara twaabharaghërrëëyi. 5Omonene Yëësu, atangate senkoro isyënyu ku righonshe irya Waryobha, na kö ököghömërrya kono tokohaanwa na Kiristo.
Okokaania abhooro bhatighe obhooro
6Abhakumya bharikyëtö, nkobharaghërrya törë okohetera ubhwera ubhwa Omonene Yëësu Kiristo igha, mwibhashe abhahiiri abhatereghanu bhonswe igho, bhano bhatakokora kya bhoora twaabharaghërrëëyi. 7Keno kekoghera toraghamba igho, n-ko bhoora bhëënyu abheene mmomanyirë igha, ni-igha mweghe eteemo iyëëtö eno twaarenayo kö-bhëënyu hayö. Bhëëtö hano twaarë hayö, te-bhatereghanu twaarë hë. 8Bhëëtö tetwaryanga ibhyakorya ibhya ömöntö wowonswe oora bhosa igho hë. Kasi ntwaarenga na omotono ughwa okokora emeremo ubhutikö na omobhasö, okore totakaanyankya ömöntö uwëënyu wowonswe oora. 9Ni-igho twaakörrë, kasi ti-igha tetwaingʼarëëyë ukunyoora ëbhëntö kö-bhëënyu, kasi keno twaatunanga ni-igha, tobhakorre ëkërëngyö, okore bhëënyu bhonswe momaahere-ko. 10Ghwiki hano twaarë hamwë na bhëënyu, ntwaabharaghërrëëyi igha, “Ömöntö wowonswe ono atakutuna okokora emeremo, okorya kwonswe atighe.”
11Nkoghamba törë amangʼana ghayö ko bhoora tukwighwa igha, bhaaho abhantö abhatereghanu kö-bhëënyu hayö, bhano bhatakokora omoremo ghwoghwonswe ghoora, kasi keno kebhatönëri na-mangʼana agha abhantö abhandë. 12Abhantö bhayö torabharaghërrya na okobhakaania ku ubhwera ubhwa Omonene Yëësu Kiristo igha, bhakorenga emeremo ighyabho bhahörëërrë, okore bhabhe na ibhyakorya ibhyabho abheene. 13Kasi bhëënyu abhakumya bharikyëtö, motakaarosa okokora amangʼana amaiya.
14Mwangarre ömöntö wowonswe ono atakutuna okoghoota amaraghërryö aghëëtö ghano gharëngë ku-ritashandighi reno, motakaasanga nawe, okore asooke. 15Kasi motakaamokora kya umubhisa, momokaaninga kya murikyënyu.
Amangʼana agha okoragha
16Bhoono, Omonene Yëësu umwene, ömösëmöri uwa omorembe, abhahaanenga omorembe senkaagha syonswe igho, ko-senshera syonswe igho. Abhe hamwë na bhëënyu bhonswe igho. 17Öni nö-öni Pauro ono mbandëkëëyë amangʼana agha öbhökëërërrya bhono ko okobhoko ukwane öni umwene. Kiyö nkyo ekemanyërryö ikyane ko-matashandighi aghaane ghonswe igho, na ni-igho nkwandekanga.
18Örööbhö urwa Omonene uwëëtö Yëësu Kiristo, robhe hamwë na bhëënyu bhonswe igho.
Currently Selected:
2 Abhatësarönikë 3: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.