2 Peetero 3
3
Urusikö urwa Omonene
1Abhaghonshe abhaane, ritashandighi reno nkobhandekera, ni-irya kabhërë. Naakora omotono ughwa okosesemora amaitegherro aghëënyu amaiya, mo-sehakëri isyënyu ko okobhahiitökya mo-matashandighi ghonswe igho abhërë ghayö. 2Nkutuna ndë muhiite amangʼana ghaara abharööti abhahörëëru bhaaghambirë kare hayö, na amangʼana agha umughiro ughwa Omonene Ömötöörya uwëëtö, ghano abhatomwa abhaaye bhaabharëtëëyë.
3Engʼana iya mbere ni-igha momanye igha, ku-sinsikö isya umuhiko, mbariisha abhantö abha inshabhura. Abhantö bhayö, no-ronamba urwabho urwene igho ndo rokobhanyankya. Mbarebhashabhura 4bharaghamba igha, “Kiristo yaaraghaini igha nakaakyörrë! Bhoono heegharë? Ukurwa abhakörö abhëëtö bhaakwa, amangʼana m-buyöbhuyö igho gharë, kya bhono ghaarë ukurwa okosemoka ukwa ekebhara!” 5Abhantö bhayö, bharaikörya kya bhano bheebha igha, kare Waryobha ne-ngʼana iyeene igho yaaghambirë, mu-ryobha na ekebhara bhekabhombwa. Yaabhömbirë ekebhara ukurwa mo-manshë na ko okohetera amanshë ghayöghayö, ko enshera iya engʼana iyaaye. 6Ghwiki okohetera amanshë ghayö, yaasikiri ekebhara ikya enkaagha eera. 7Ghwiki ko okohetera engʼana iyöiyö, Waryobha yatigha-ho mu-ryobha na ekebhara, okore bhiishe okosambwa mo-morro. Yabhitigha-ho okore bheghanye urusikö rono arebhotorra ibhiina abhantö bhano bhatakumwighwera, hayö bhoono, ho bharisika.
8Kasi abhaghonshe abhaane, motakeebha engʼana eno igha, ko-Monene Waryobha, urusikö örömwë ndongʼana kya imyoka ëkëkwë, na imyoka ëkëkwë, ngengʼana kya urusikö örömwë igho.#3:8 Maaha mo-ketabho ikya Zabhuri 90:4. 9Abhantö abhandë nkokanya bharë igha, Omonene Waryobha nkotegheta arë okohekerania ghano yaaraghaini. Kasi obhoheene takotegheta hë. We nköghömërrya arë ko okoghera iya bhëënyu, ko bhoora takutuna igha, ömöntö kora ömwë, asire hë. Keno akutuna ni-igha, bhonswe igho bhahongore ëbhëbhë ibhyabho. 10Urusikö urwa Omonene nduriisha igho kya umwibhi. Urusikö ruyö, ighörö iyö, harihëënia ukurwa-ho ku ikirumo ekenene. Ëbhëntö bheno bheemo, mberesambwa na omorro. Ekebhara kyonswe igho nkirisika hamwë na ëbhëntö bhyonswe igho bheno bheemo.
11Mbe, ko bhoora ëbhëntö bhyonswe igho ni-igho bhirisika, bhoono bhëënyu, n-teemo kë mokaabha nayo ko-kebhara kono? Ni-igha mobhe abhahörëëru, mosooke Waryobha. 12Moghanyenga urusikö urwa Waryobha, kora morokore rwangohe ukuusha. Urusikö ruyö, ighörö iyö haresambwa na omorro hasike. Ëbhëntö bheno bheemo, mbiriyaaya ko okoghera iya rebherera rirörö bhököngʼu. 13Kasi bhëëtö nkoghanya törë mu-ryobha ahahya na ekebhara ekehya, kya bhono yaatoraghaini, ahasë hano haishööyë obhoheene.
14Ku bhuyö abhaghonshe abhaane, enkaagha eno mokeghanya urusikö ruyö, mokorenga omotono ughwa okobha na enkoro inshiiya bhököngʼu, motakaabha na risoro ku-Waryobha, kora mobhe na omorembe. 15Momanye igha Omonene nkobhaghömërrya arë, okore munyoore umweya ughwa ököhönibhwa. Ni-igho Pauro umukumya murikyëtö omoghonshe, yaabhandëkëëyë ko obhongʼaini bhono Waryobha yaamohaayë. 16Mo-matashandighi aghaaye ghonswe igho, na-mangʼana ghayö akushumaashera. Ghaamo amangʼana aghandë mo-matashandighi aghaaye, n-këköngʼu okoghamanya. Abhantö bhano bhataana obhongʼaini na bhanyamukumo mötëntëëru, nkoghasisasisa bharë kya bhono bhakusisasisa Amaandeko aghandë Amahörëëru. Nkwisikya bharë abheene ko okokora amangʼana ghayö.
Amangʼana agha okomarërrya
17Bhoono abhaghonshe abhaane, momarrë okomanya amangʼana agha abhëëghya nyangasheka bhayö, ku bhuyö mwiraarerre, okore motakangʼainwa na obhongʼaini ubhwa abhasarya bhayö, bhobhakore moghwe kora mutighe obhoheene ubhwënyu ubhwa obhoheene. 18Kasi möghëndërri okobha mö-rööbhö, mo-bhomanyi ubhwa okomanya Omonene uwëëtö, Ömötöörya uwëëtö Yëësu Kiristo. Atöönibhwi, bhoono igho, na amakora ghonswe igho! Amina.
© 2021, Wycliffe Bible Translators, Inc. All rights reserved.