2 Peetero 2
2
Abhëëghya nyangasheka
1Kasi ko-nkaagha eera iya abharööti abha Isiraëri, bhaibhökirë abharööti abha obhorongo. Ni-ighoigho erebha kö-bhëënyu igha, abhëëghya nyangasheka mbaryebhoka. Abhantö bhayö, mbarësöhya amëëghyö agha ukusirya abhantö, na mbaryanga Omonene ono yaabhatungurya. Ko okokora igho, mbareghera ukusika ukwabho kobhangohere. 2Kora abhantö abhaaru mbareghoota amangʼana aghaabho amaghogho ghayö. Na ko okoghera iya abhantö bhayö, enshera iya obhoheene neretokwa. 3Mbarebhaghaneranga amaghano agha obhorongo, ko oronamba urwabho oroghogho, okore bhanyoore keno bhakutuna kö-bhëënyu. Kasi okobhotorrwa ikiina ukwabho, kwamara kösëëmibhwa ukurwa kare. Ukusikibhwa ukwabho, tekoteghete hë.
4Abhamaraika bhano bhaakörrë ëbhëbhë, Waryobha tiyaabhatighirë hë. Kasi yaabhatabhutirë mu-kyaro ikya abhaku,#2:4 Ikyaro ikya abhaku. Engʼana eno ku-Kiyunaani ni-igha, Taritarosi reraimererra ahasë aha ikisuntë hano abhaku bhakoghanyera okobhotorrwa ibhiina ibhyabho. Ensonga iya engʼana iyö nituubhaini na engʼana eera igha, Hadesi. Maaha mo-faharaasa. bhakabhohwa-mo na ebheraangʼani mu-kisuntë. Mu-kyaro ikya abhaku muyö, mo bhakoghanyera urusikö urwa okobhotorrwa ikiina. 5Ghwiki ni-igha, enkaagha eera iya Nuhu, Waryobha tiyaatighirë ukushibhya abhantö bhano bhatamwighwërëëyë, yaarëëtirë ëhöörö iya amanshë ko-kebhara, abhantö bhakakwa. Akatöörya Nuhu hamwë na abhantö abhandë muhungatë. Nuhu uyö, we yaaraarëkëëyë abhantö abha enkaagha iyaaye igha, bhakore bhono Waryobha akutuna. 6Ghwiki Waryobha akasamba imighi ighya Sodoma na Ghomora na omorro, ghekabha riibhu, akaghisikya hamwë na abhantö abha mu-mighi ghiyö. Akabhakora ëkërëngyö ko-bhantö bhano bhatakumwighwera. 7Waryobha akatöörya-mo Ruutu ono yaarë ömöntö uwa heene. Ruutu yaaighwanga bhoghogho, hano yaamaahanga seteemo sengogho isya abhasarya bhayö. 8Ömöntö uwa heene uyö hano yaamënyirë hamwë nabho, enkoro iyaaye ekabhaabhayera bhököngʼu, ku-sinsikö sinsharu ko okoghera iya amangʼana amaghogho ghayö yaaighwanga na okomaaha. 9Ku bhuyö momanye igha, Omonene Waryobha namanyirë enshera iya ökötöörya abhantö abhaaye, bharwe mo-mashaashyo. Kora ghwiki namanyirë bhono arishibhya abhakora amaghogho, urusikö urwa okobhabhotorra ikiina. 10Ekenene m-baara abha oronamba oroghogho urwa kinyamöbhërë, bhano bhakosera ubhwera ubhwa Waryobha.
Abhantö bhayö, m-baana eteemo iya senkaani na ikiheemere, kora tebhaakoobhoha okotoka ëbhëntö ibhya ubhuhika, bheno bhërëngë mu-ryobha. 11Nokaanyoora abhamaraika mbaana singuru na obhotoro obhonene, kasi bho tebhakushongera na okotoka ëbhëntö ibhya ubhuhika bhiyö ko-Monene Waryobha. 12Abhantö bhayö, bho nkotoka bharë ëkëntö kyokyonswe igho, keno bhatamanyirë. Mbatuubhaini kya sityënyi seno setaana obhongʼaini, ko bhoora nkwebhorwa sërë igho, okore seghootwe na okoghooghwa! Ni-igho abhëëghya nyangasheka bhayö bharisika. 13Ghwiki mbarishibhibhwa bhanyoore inyanko, kya bhono bhaanyankëri abhandë. Nkushomerwa bharë okokora amangʼana aghaabho agha oronamba urwabho oroghogho, harabhu igho. Kora nkushomerwa bharë okobhatëëbhya amangʼana agha obhorongo, ko-nkaagha eno ukunyoora bhararya hamwë na bhëënyu. Ko okokora amangʼana ghayö, nkobha bharë kya ubhunyanku na amahara ghano gharëngë ku-ngibho endabhu.#2:13 Ko okokora amangʼana ghayö, nkobha bharë kya ubhunyanku na amahara ghano gharëngë ku-ngibho endabhu. Senakara isyëndë syandëkirë igha, Kora enkaagha eno bhakosanga na bhëënyu ku-sinyangi isyënyu isya righonshe, nkushomerwa bharë ko-bhoraaghëri ubhwabho. 14Amaiso aghaabho, n-ga kesooraare. Oronamba urwabho oroghogho urwa okokora ëbhëbhë, teroona umuhiko hë. Nköngʼënërrya bharë bhanyamukumo mötëntëëru. Senkoro isyabho, bhaasenarya ukwighomba ëbhëntö. Abhantö bhayö bhaihiimwa! 15Bhaatigha enshera ëndöngë, bhasira ko okoghoota enshera iya Bharaamu, omoona uwa Bhëöri. Ömöntö uyö, yaahanshirë ukunyoora ehoorohooro ko okokora amangʼana amaghogho. 16Ko okoghera iya eteemo iyö, Bharaamu yaahamërrëëywë na itikërë. Itikërë ni-tyënyi, kasi yaashumaashirë kya ömöntö ekarebherra ömörööti uyö, atighe okokora amangʼana agha ekekangi.#2:16 Maaha mo-ketabho ikya Okobhara 22–24, 31:16.
17Abhantö bhayö n-kya ibhisima bheno bhetaana amanshë, n-kya indumbë eno ikuhuushwa na ikighumbë. Ahasë aha ikisuntë ekenene ho Waryobha yaabhasëëmërya. 18Nkoghamba bharë amangʼana agha ikiheemere, ghano ghataana ubhwera. Oronamba urwabho oroghogho urwa kinyamöbhërë, ndo rokoghera bharakemba abhantö bhano bhaakumya bhöngö hano, bhano bhaatigha okokora ghano abhasarya bhakokora. 19Nkoraghania bharë bhayö bhaakumya bhöngö ko okobhatëëbhya igha, mbaraanyoore öbhötöönööni, kasi bho abheene, m-baghorwa abha obhorangara, ko bhoora, ömöntö nkobha arë omoghorwa uwa ëkëntö kyokyonswe igho keno kekomobhaaha. 20Hano ömöntö yaibhasha ubhunyanku ubhwa ko-kebhara kono, ko okomanya amangʼana agha Omonene Ömötöörya uwëëtö Yëësu Kiristo, amare ghwiki aghöötiibhwi, akerwe ukurwa mu-bhunyanku, nkobha arë na eteemo engogho bhököngʼu, okokera eera yaarë nayo ekembere. 21Nyakara hano akaangirë okomanya enshera iya heene iyö, okokera okoghemanya, ghwiki amare atighe amaraghërryö amahörëëru ghano yaahaaywë. 22Ömöntö uyö, natuubhaini kya oroghero rono bhaarëngëri igha, “Ësëësë ikyörëëyë okorya amaröki aghaayo,”#2:22 Maaha mo-ketabho ikya Sengero 26:11. ghwiki oroghero urwöndë nkoghamba rörë igha, “Ëmbëëshë eno yöghiibhwi, eraighaaraghaara ghwiki mo-matoto!” Ni-igho ekobha kö-möntö kya uyö.
Currently Selected:
2 Peetero 2: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.