Tit 2
2
1Kwonka iwe, guma oyegyese ebishemereire enyegyesa ehikire. 2Yehanangirize abagurusi, barekye kusinda, babe abatarikwegiza, abarikwetegyereza, abahikire omu kwikiriza, omu kukunda n'omu kugumisiriza. 3Abakaikuru nabo obeehanangirize otyo, bagire emitwarize y'abarikwera, batarikubeiherera bantu, nari okuba bantabo yaago; kureka babe ab'okwegyesa ebirungi, 4babone kumanyiiza abakazi bato kukunda baibabo n'abaana baabo; 5babe abarikwetegyereza, abatarikushambana, abarikwecurengyera eka, ab'embabazi kandi abarikworobera baibabo, ekigambo kya Ruhanga kibone kutagaywa.
Eby'abatsigazi
6N'abatsigazi obeehanangirize otyo, babe abeerinzi. 7Omu miringo yoona, guma oyeyorekye ori eky'okureeberaho omu birungi bi orikukora; n'omu kwegyesa kwawe oyorekye ku ori ow'amazima kandi otarikwegiza. 8Emigambire yaawe ebe ehikire etarikuhaahuuzibwa, orikukuhakanisa abone kwitwa enshoni, ataine kibi kyona eki arikutugambaho.
Eby'abahuuku
9Yehanangirize abahuuku kworobera bakama baabo, n'okubananura omuri byona, batari b'okubahakanisa. 10Tibashemereire kwibaguzibwa, kureka okworekyera kimwe obwesigwa obw'amazima; batyo omuri byona babone kusiimisa enyegyesa ya Ruhanga Omujuni waitu.
Emitwarize y'abantu ba Ruhanga
11Manya embabazi za Ruhanga zireebekire zaareetera abantu boona kujunwa. 12Ezo mbabazi nizo zitwegyesa okureka eby'okuteeta hari Ruhanga n'okwetenga eby'ensi, tukaguma turi abeerinzi, abahikire kandi abarikutiina Ruhanga omu busingye obu. 13Obwo tutegyereize eki twineho amatsiko marungi, nikwo kuboneka okw'ekitiinwa okwa Ruhanga waitu omukuru, kandi Omujuni waitu Yesu Kristo. 14Kristo ogwo akeehayo ahabwaitu kutucungura omu kutahikiirira kwona, n'okweyereza abantu ngu babe abe ahabwe, baine omuhimbo gw'okukora ebirungi.
15Ebyo obe nibyo waaguma nooyegyesa, nooyehanangiriza noohana n'obushoboorozi bwona. Hatarigira owaakugaya.
Eby'okuhabura abaikiriza
Currently Selected:
Tit 2: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
