Lev 14
14
1Nyakubaho akagambira Musa ati: 2Eri niryo iteeka ry'omubembe aha kiro ky'okushemezibwa kwe. Aryareetwa aha muhongyerezi. 3Omuhongyerezi ashohore aheeru y'orusiisira ashwijume ogwo mubembe. Reero omubembe ku araabe akizire egyo ndwara, 4omuhongyerezi abaragiire bareetere orikwenda kwezibwa enyonyi ibiri zihuriire ezitarikuzira, n'ekiti kya kaarwenda, n'akenda ka karari n'enyaweera. 5Mpaho omuhongyerezi abaragiire kwitira emwe ahari ezo nyonyi omu rwabya rw'eibumba oruri eruguru y'amaizi g'omugyera. 6Reero akwate enyonyi ehuriire n'ekiti kya kaarwenda n'omwenda gwa karari n'enyaweera, abijabikye omu shagama y'enyonyi eyaitirwa eruguru y'amaizi g'omugyera, 7haza agimiisiire emirundi mushanju orikwenda kushemezibwaho ebibembe. Bwanyima amurangye ku yaashemera, kandi arekure enyonyi ehuriire egyende. 8Reero orikwenda kushemezibwa ayozye ebijwaro bye, amwe obwoya bwe bwona kandi ayogye ashemere. Na bwanyima ataahe omu rusiisira, kwonka shi amare ebiro mushanju atarikuraara mu ihema rye. 9Aha kiro kya mushanju amwe eishokye rye ryona hamwe n'ebireju, na bahungu n'obwoya bwe bwona. Bwanyima ayozye ebijwaro bye kandi ayogye omubiri gwe, abone kuba oshemeire.
10Aha kiro kya munaana areete empaya ibiri nto z'entaama ezitaine kamogo, n'omwagazi gw'entaama oguhikize omwaka gumwe guzairwe ogutaine kamogo, n'omutoijo gw'esaano y'obunono y'ebicweka bishatu bya ikumi by'eigaro, ejwangiibwemu amajuta g'omuoliva, kandi n'encuba emwe y'amajuta. 11Omuhongyerezi orikushemeza ate ogwo muntu hamwe n'ebyo bintu omu maisho ga Nyakubaho aha irembo ry'eihema ry'okubugabuganiramu. 12Kandi atware emwe aha mpaya nto z'entaama, agihongye ebe empongano y'okwihwaho orubanja; agitware hamwe n'encuba y'amajuta, haza abizongazonzye, bibe empongano ezongazongiziibwe omu maisho ga Nyakubaho. 13Kandi omwana gw'entaama agwitire omu mwanya gu baitiramu enyamaishwa y'empongano y'ekibi n'ey'ekitambo ky'okucwetsya omu Mwanya Gurikwera; ahabw'okuba empongano y'okwihwaho orubanja eri nk'empongano y'ekibi; nayo eba ey'omuhongyerezi, eba erikwerera kimwe. 14Omuhongyerezi akore aha shagama y'empongano y'okwihwaho orubanja, agisiigye aha nshonga y'okutu kwa buryo okw'ow'okushemezibwa, n'aha kikumu kishaija ky'engaro ye ya buryo, n'aha kikumu kishaija ky'ekigyere kye kya buryo. 15Omuhongyerezi akore aha majuta g'omu ncuba, agashukye aha kiganja kye kya bumosho, 16reero ajabikye orukumu rwe rwa buryo omu majuta agari omu ngaro ye ya bumosho. Haza agamiisise orukumu rwe emirundi mushanju omu maisho ga Nyakubaho. 17Agandi majuta agaraamutsigare omu ngaro agasiigye aha nshonga y'okutu kwa buryo okw'ow'okushemezibwa, n'aha kikumu kishaija eky'engaro ye ya buryo, n'aha kikumu kishaija ky'ekigyere kye kya buryo, n'aha shagama y'empongano y'okwihwaho orubanja. 18Amajuta agaraamutsigare omu ngaro agasiigye omu mutwe gw'ow'okushemezibwa. Bwanyima amukarabire omu maisho ga Nyakubaho. 19Omuhongyerezi ahongye empongano y'ekibi, kukarabira orikuza kushemezibwaho okusiisikara. Na bwanyima aite ekitambo ky'okucwetsya. 20Mpaho atambire aha itambiro ekitambo ky'okucwetsya, hamwe n'empongano y'esaano; amukarabire atyo, n'onu ashemezibwe.
21Kwonka kishemezibwa ku araabe ari omworo, atarikubaasa kutunga ebyo byona, areete empaya emwe nto y'entaama, ebe empongano y'okwihwaho orubanja ey'okuzongazongibwa kumukarabira, kandi na kimwe kya ikumi ky'eigaro ry'esaano y'obunono ejwangiibwemu amajuta g'omuoliva, eri omutoijo gw'esaano, hamwe n'encuba y'amajuta g'omuoliva, 22kandi n'amaiba abiri n'enkombe nto ibiri, ebi araabaase kutunga; emwe ebe empongano y'ekibi n'endi ekitambo ky'okucwetsya. 23Mpaho aha kiro kya munaana, ahabw'okushemezibwa kwe abireetere omuhongyerezi aha muryango gw'eihema ry'okubugabuganiramu omu maisho ga Nyakubaho; 24omuhongyerezi akwate omwana gw'entaama n'empongano y'okwihwaho orubanja, n'encuba y'amajuta, abizongazonzye, bibe empongano ezongazongiibwe omu maisho ga Nyakubaho. 25Kandi aite omwana gw'entaama ogw'empongano y'okwihwaho orubanja, akore aha shagama yaayo, agisiigye aha nshonga y'okutu kwa buryo okw'ow'okushemezibwa, n'aha kikumu kishaija ky'engaro ye ya buryo, n'aha kikumu kishaija ky'ekigyere kye kya buryo, 26omuhongyerezi ashukye amajuta aha kiganja kye kya bumosho, 27ago majuta gari ahari ekyo kiganja agamiisise orukumu rwe rwa buryo emirundi mushanju omu maisho ga Nyakubaho. 28Bwanyima akore aha majuta agari omu ngaro ye, agasiigye aha nshonga y'okutu kwa buryo okw'ow'okushemezibwa, n'aha kikumu kishaija ky'engaro ye ya buryo, n'aha kikumu kishaija ky'ekigyere kye kya buryo, ahi yaata eshagama y'empongano y'okwihwaho orubanja. 29Reero amajuta agaatsigara aha kiganja kye agasiigye omu mutwe gw'ow'okushemezibwa, kumukarabira omu maisho ga Nyakubaho. 30Kandi atoije enyonyi emwe aha maiba n'aha nkombe nto, ebi abaasize kutunga; 31emwe ebe empongano y'ekibi, n'endi ebe ekitambo ky'okucwetsya kandi atoijereho ey'esaano. Mpaho ogwo muhongyerezi akarabire atyo omuntu orikushemezibwa omu maisho ga Nyakubaho.
32Eryo n'eiteeka ry'omuntu oine endwara y'ebibembe, otarikubaasa kutunga mpongano z'okushemezibwa kwe.
Enju erimu ebibembe
33Nyakubaho akagambira Musa na Arooni ati: 34Ku murihika omu nsi ya Kanaani, ei ndikubaha, haza naata omu nju endwara y'ebibembe, omuri egyo nsi ei mutungire, 35mukama w'enju egyo aije agambire omuhongyerezi ati: Nooshusha oti omu nju yangye harimu endwara. 36Mpaho omuhongyerezi aragiire baihe ebintu omu nju, omuhongyerezi atakagiireyo kwetegyereza endwara; byona ebiri omu nju bitakaarangwa ngu bisiisikaire. Bwanyima omuhongyerezi ataahemu kugireeba, 37ayetegyereze endwara. Haza endwara ku eraabe eri omu bisiika by'enju, biine amabara ga kijubwe n'agarikutukuratukura, kandi waashusha oti bitaahire omunda, 38obwo omuhongyerezi arugye omuri egyo nju, aze aha muryango gwayo, kandi agikingye okumara ebiro mushanju. 39Mbwenu endwara ku eraabe ebugire omu bisiika byayo, 40obwo omuhongyerezi aragiire baihemu amabaare agakwatsirwe egyo ndwara, baganagye omuri kasasiro, aheeru y'orurembo. 41Kandi aragiire baharagate egyo nju yoona omunda, reero ebi baraaharagatemu babyate omuri kasasiro aheeru y'orurembo. 42Bwanyima bareete agandi mabaare bagate omu mwanya gwa gari; na nyineeka areete ekindi ky'okuhomesa asiigirize egyo nju.
43Endwara ku erigaruka, yaasheesha omuri egyo nju baaherize kugiihamu amabaare, n'okugiharagata n'okugisiigiriza, 44omuhongyerezi azeyo agireebe. Endwara ku eraabe ebugire egyo nju, biri n'ebibembe by'akabi ebigirimu. Obwo esiisikaire. 45Asheenye egyo nju, amabaare gaayo n'ebiti byayo n'obuhome bwayo bwona; abiihe omu rurembo abitware abinagye omuri kasasiro. 46Haza oritaaha omuri egyo nju ekikingire, aryaba otashemeire okuhitsya omu mwabazyo. 47Kandi oribyama omuri egyo nju ayozye ebijwaro bye, n'origiriiramu nawe ayozye ebijwaro bye.
48Kwonka omuhongyerezi ku ariija, yaayetegyereza, yaashanga endwara etabugire enju, baaherize kugisiigiriza, obwo arangye ku egyo nju etasiisikaire, ahabw'okuba endwara ekizire. 49Okushemeza egyo nju, atware enyonyi ibiri n'ekiti kya kaarwenda n'akenda ka karari, n'enyaweera, 50aitire emwe ahari ezo nyonyi eruguru y'orwabya rw'eibumba orurimu amaizi g'omugyera, 51kandi atware ekiti kya kaarwenda n'enyaweera n'akenda ka karari hamwe n'enyonyi ehuriire, abijabikye omu shagama y'enyonyi eyaitwa, n'omu maizi g'omugyera, agimiisiire egyo nju emirundi mushanju. 52Mpaho egyo nju agyezese eshagama y'enyonyi n'amaizi g'omugyera, n'enyonyi ehuriire, n'ekiti kya kaarwenda n'enyaweera n'akenda ka karari. 53Reero arekure egyo nyonyi erugye omu rurembo egyende. Akarabire atyo egyo nju, ebe eshemeire.
54Eryo niryo iteeka ry'endwara yoona eyetwa ey'ebibembe; ey'ebiguuna, 55ey'ebibembe by'omu bijwaro nari eby'omu nju; 56n'ey'ebizimba n'ey'ebiseera nari ey'eibara, 57kworeka ekintu ekisiisikaire nari ekitasiisikaire. Eryo niryo iteeka ry'ebibembe.
Ebitashemeire ebiruga omu bashaija
Currently Selected:
Lev 14: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
