Heb 1
1
Oku Ruhanga yaagambiire omu Mwana we
1Ira Ruhanga akaba agambira baatatenkuriitwe omu miringo mingi etari emwe, naaraba omu barangi. 2Kwonka omu biro ebi ebihereerukire, itwe atugambiriire omu Mwana ou yaataireho kuba omuhunguzi w'ebintu byona. 3Niwe kimurinkano ky'ekitiinwa kya Ruhanga, kandi ekyeshusha buzima ky'obwaruhanga bwe, ohigikisa ebintu byona ekigambo kye eky'amaani. Ku yaaherize kukora eky'okwozyaho ebibi, yaashutama aha rubaju rwa buryo orwa Nyakusinga omu iguru.
Omwana wa Ruhanga akiza baamaraika ekitiinwa
4Mwana yaakiza atyo baamaraika obukuru, nk'oku eiziina eri yaatungire ririkukiriza kimwe agaabo ekitiinwa. 5Mbwenu ni maraika ki ou Ruhanga aragizire ati:
Niiwe Mwana wangye;
eri izooba naakuzaara?
Nainga shi ati:
Ndyamubeera ishe,
nawe ambeere omwana?
6Kandi hoona, obu Ruhanga yaareeta Omwana we omujigaijo omu nsi, akagira ati:
Ka baamaraika ba Ruhanga boona
bamuramye.
7Haza ahari baamaraika yaagira ati:
Ruhanga ahindura baamaraika be
omuyaga,
n'abaheereza be abahindura endimi
z'omuriro.
8Kwonka aha Mwana we, akagira ati:
Ai Ruhanga, ekitebe kyawe ky'obugabe
n'eky'ebiro n'ebiro;
obugabe bwawe obutegyekyesa obwinganisa.
9Okunda okuhikiirira kandi oyanga okutahikiirira;
nikyo Ruhanga, Ruhanga waawe,
akusiigiire amajuta okashemererwa
okukira bagyenzi baawe,
akakuha obunanukye bw'okusiigwa amajuta g'obugabe.
10Kandi ati:
Iwe Nyakubaho, omu kutandika
okahanga ensi,
n'eiguru waarikoresa engaro zaawe.
11Ebyo biryahwaho, kwonka Iwe ogumaho.
Byona biryakura nk'ekijwaro,
12oryabikuba nk'omunagiro,
bihindukye nk'oku bahindura ebijwaro.
Kwonka iwe, oguma ori nk'oku ori;
n'emyaka yaawe terihwaho.
13Kandi ni maraika ki ou Ruhanga aragizire ati:
Shutama aha rubaju rwangye rwa buryo,
okuhitsya obu ndihindura abazigu baawe,
endibatiro y'ebigyere byawe?
14Nbwenu baamaraika boona t'emitima erikuheereza Ruhanga, eyaatumirwe kukwatsa ab'okutunga okujunwa?
Obukuru bw'okujunwa.
Currently Selected:
Heb 1: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
