Kut 49
49
1Bwanyima Yakobo akeeta abatabani, yaabagira ati: Nimweteerane, mbagambire ebiribabaho omu biro ebiriija.
2Imwe beene Yakobo nimweteerane muhurire;
kandi mutegye Isiraeli shoimwe okutu.
3Reubeeni niiwe mujigaijo gwangye,
amaani gangye kandi ou naabandize kuzaara ndi omutsigazi;
ow'amaryo rurangaanwa kandi ow'amaani rugambwa.
4Nk'oku ori nk'omutunga gurikuhimintikisa amaani,
nikyo otaritungira bukuru;
ahabw'okuba okatemba ekitabo kya sho,
waakihagaza waaza ahi mbyama.
5Simeoni na Leevi n'enyina-emwe;
zaarurara zaabo ziba eby'okurwanisa
by'okukoresa eby'obwinazi.
6Nyowe tindiza mu naama zaabo,
kandi tindikwatanisa na kiriibe kyabo.
Ahabw'okuba ekiniga kikabaitisa abantu,
kandi ahabw'okwenda kwemara ak'aha mutima, baatema ente ebiteega.
7Ekiniga kyabo nikikakyeenwe, ahabw'okuba ni kingi;
na kashanga yaabo neekainare, ahabw'okuba tegira saasi!
Ndyababaganisiza omuri Yakobo,
mbataataanisize omuri Isiraeli.
8Iwe Yuda, beene sho baryakuhimbisa;
omukono gwawe guryakwata abazigu baawe aha bitsya;
beene sho bakuramye.
9Yuda ori ekitsigazi ky'entare;
Mwana wangye ogarukire nooruga aha ki waita.
Oinamire waabandama nk'entare enshaija nari enkazi;
Mbwenu n'oha owaakwehanga kukusiimura?
10Enkoni y'obugabe teriruga hari Yuda,
nobu yaakuba ey'obutegyeki kuruga aha baijukuru,
okuhitsya obu mukama waayo ariija,
amahanga goona gakamworobera.
11Aryatsibika endogoya ye aha muzaabibu,
n'omwana gwayo agutsibikye aha muzaabibu omurungi,
Ayogyese omunagiro gwe viino,
n'ekanzu ye agyogyese eshande y'ebijuma by'emizaabibu.
12Amaisho ge garyatukura okukira viino,
n'amaino ge geere okukira amate.
13Zebuluuni aryatuura aha rubaju rw'enyanja,
abe enyambukiro ei emeeri zirikwegamamu,
kandi omwatano gwe guryagarukira ahari Sidoni.
14Isakaari n'endogoya y'amaani
ebyama ahagati y'amatsibikiro g'entaama.
15Ku yaareebire omwanya gw'okuhuumuriramu guri murungi,
n'egyo nsi neeshemeza,
yainika eibega rye kwekorera;
atyo yaahinduka omuhuuku w'okugyemwa emirimo.
16Daani aryaramura ab'eihanga rye,
ari ow'omu b'enganda za Isiraeli.
17Daani aryaba enjoka y'omu muhanda, encwera y'aha rubaju rw'akahanda,
eruma obukangaasi bw'embaraasi
ogitembire akagwa agarami.
18Ai Nyakubaho, niiwe ntegyereize ku onjuna.
19Gaadi ababisha baryamuteera, kwonka aryababinga abahambize.
20Asheri ebyokurya bye biryabamu ekirikuriisa,
atungire omugabe ebyokurya binuzire.
21Nafutaali n'ebuguma y'ensa etsibwire; ejumeeza ebigambo birungi.
22Yosefu n'eitaagi ririkwana munonga eryanira aha rubaju rw'omugyera;
amataagi gaaryo gakataaguza,
gakarengyera aha kisiika.
23Abarasi bakamutaahirira bataine saasi,
baamurasha kandi baamubonabonesa munonga.
24Kwonka obuta bwe bwaguma bureegire,
emikono ye yaahangaanwa Ow'obushoboorozi bwona
Ruhanga owa Yakobo,
Omuriisa kandi omurinzi wa Isiraeli.
25Mbwenu iwe Yosefu, Ruhanga wa shoimwe orikuhwera,
Ruhanga omushoboorozi wa byona,
akuhe emigisha y'enjura y'omu iguru,
n'emigisha y'amaizi g'okuzimu,
n'emigisha eheebwa abarikwontsya n'abaine enda,
26emigisha ei shoimwe arikukutengyera
n'ey'amaani okukira enshozi ezitahiguka,
kandi neekira ebirungi by'omu bibungo ebitarugaho.
Egyo migisha yoona neekaitururukire
aha mutwe gwawe, Yosefu,
ekashononokyera aha bitsigye byawe,
iwe owaacwirwe beene sho.
27Benyamiini n'omushega gurikusikankura,
ogushonshomera omu kasheeshe eki gwaita,
omu mwabazyo gukeeshahurira omunyago.
28Abo boona nibo nganda ikumi na ibiri eza Isiraeli; kandi ebyo nibyo ishebo yaabagambiire naabashabira emigisha; buri omwe naamwendeza omugisha gumushemereire.
Okufa kwa Yakobo
29Bwanyima Yakobo akabeehanangiriza naabagira ati: Ndi haihi kukurata abaitu. Haza muryanziika hamwe na baatatenkuru omu nyanga y'omu kibanja kya Efurooni Omuhiiti. 30Egyo nyanga eri omu kibanja ekiri Makipeela, aha rubaju rwa burugwa-izooba obwa Mamure omu nsi ya Kanaani. Enyanga egyo niyo Aburahamu yaaguzire hamwe n'ekibanja ahari Efurooni Omuhiiti kuba obutaka bw'okuziikamu. 31Okwo niyo baaziikire Aburahamu na Saara omukazi we. Niyo baaziikire Isaaka na Rebeka omukazi we; kandi naanye niyo naaziikire Leeya. 32Ekyo kibanja n'egyo nyanga ekirimu bikagurwa aha Bahiiti.
33Yakobo ku yaaherize kwehanangiriza atyo abatabani, yaagarura amaguru ge omu kitabo, gwahwamu, yaashanga abaabo.
Okucurira Yakobo n'okumuziika
Currently Selected:
Kut 49: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
