Kut 43
43
1Mbwenu enjara ekagumizamu eri nyingi omuri egyo nsi. 2Ku baaherizeho ebyokurya bi baihire omuri Misiri, ishebo yaabagira ati: Nimugarukyeyo mutushakire ak'okurya. 3Kwonka Yuda yaamugarukamu ati: omushaija akatwehanangiririza kimwe, naagira ati: Timuringaruka mu maisho mwaba mutaine murumuna waanyu. 4Ku oraatwohereze na murumuna waitu nitwija kuzayo tukushakire ebyokurya; 5kwonka ku oraabe otamwohereize titurikwija kuzayo. Manya ogwo mushaija akatugira ati: Timuringaruka mu maisho mwaba mutaine murumuna waanyu. 6Isiraeli abagarukamu ati: Ahabw'enki mwankozire kubi mutyo, mukagambira ogwo mushaija ku mwine murumuna waanyu? 7Baamugarukamu bati: Manya ogwo mushaija akatubuuza naatucondooza kumanya oku turi, n'abaitu oku barikuraara. Yaatugira ati: Shoimwe akibaho? Mwineho murumuna waanyu ondi? Naitwe twamugarukamu nk'oku yaatubuurize. Mbwenu shi tukaba nitumanya ku arikwenda kugira ati: Mureete murumuna waanyu? 8Na Yuda agira Isiraeli ishe ati: Ba niinye waayohereza n'ogu mwana twimukye tugyende, tugumeho turekye kufa, itwe naiwe n'obwana bwaitu. 9Mbwenu niinye naayekwatiriza omu mwanya gwe, obe niinye orimubuuza. Ku ndaabe ntamukugaruriire nkamukuhitsya omu maisho, ekihemu niinye kiraagumeho ebiro byona. 10Manya kuri tutareeziringire, tukaabaire twagarukireyo kabiri.
11Isiraeli ishebo abagarukamu ati: Ku kiraabe kiri kityo, nimugire muti: Mutware omu nshaho zaanyu ebijuma by'ensi egi ebirungi munonga mubitoijere ogwo mushaija, mumutwarire n'omubazi gw'okwekandisa n'obwoki n'emigaju n'entsinda n'ebinyoobwa n'endezi. 12Mutware empiiha zirikwingana na ziri kabiri. Mugarureyo n'empiiha zi baataire omu minwa y'enshaho zaanyu; shana bakaaba baakikozire batakimanyire. 13Mutware na murumuna waanyu, haza mwimukye mugarukye ow'ogwo mushaija. 14Ruhanga omushoboorozi wa byona naakabahe akaso karungi omu maisho g'ogwo mushaija, haza akabagarurira mukuru waanyu ori hamwe na Benyamiini. Ku ndiba naafeereirwe abaana bangye, biri naafeereirwe!
Beene Yakobo okuhika owa Yosefu
15Batyo abo bashaija baatwara ebiconco, baagyenda n'empiiha zirikwingana na ziri kabiri, hamwe na Benyamiini. Baimuka baashuuma baaza Misiri, baayegaranjura omu maisho ga Yosefu.
16Yosefu ku yaareebire Benyamiini ari hamwe nabo, yaagira omubiiki w'eby'omu ka ye, ati: Taasya aba bashaija omu nju, haza obabaagire oboneze, ahabw'okuba niinyija kurya nabo omu ihangwe. 17Ogwo mushaija yaakora nk'oku Yosefu yaamuragiira. Yaabataasya omwa Yosefu. 18Haza bo baatiina ahabw'okubataasya omwa Yosefu, baagira bati: Eki baatutaahiza omu n'ahabw'empiiha zi baagarwire omu nshaho zaitu bwabiso ngu abone kutunga obwiho bw'okutukwatsizaho, atukwate kitaraariire, atuhindure abahuuku, n'endogoya zaitu azinyagye. 19Batyo abo bashaija beegaranjurira omubiiki w'eby'eka ya Yosefu bagambira nawe aha muryango gw'egyo nju, 20bamugira bati: Mukama waitu, obu twaija kunu bwabiso kugura ebyokurya, 21ku twahikire omu icumbi, twakomoorora enshaho zaitu; twashanga empiiha za buri omwe ziri omu minwa y'enshaho ye zoona zihikire. Mbwenu nzizi, twazigarura. 22Kandi twareeta n'ezindi mpiiha kushaka ebyokurya, kwonka titurikumanya owaataire ezo mpiiha omu nshaho zaitu. 23Abagira ati: Nimuhuumure kandi mutatiina. Obundi Ruhanga waanyu, kandi Ruhanga wa shoimwe, akaaba niwe yaabateereire ekyo ky'obutungi omu nshaho zaanyu. Nyowe empiiha zaanyu nkazitunga. Atyo ashohoza Simeoni amubareetera.
24Mbwenu ogwo mushaija ku yaaherize kubataasya omwa Yosefu, yaabaha amaizi baanaaba ebigyere; yaaha n'endogoya zaabo ebyokurya. 25Bwanyima baatebeekanisa ebiconco by'okutoijera Yosefu yaija omu ihangwe, ahabw'okuba bakahurira ku niyo baraariire.
Beene Yakobo okurya na Yosefu obugyenyi
26Yosefu ku yaagarukire omuka, beene Yakobo baamureetera omu nju ebiconco bi baabaire baine, baajuumara ahansi baamuramya. 27Nawe yaababuuza oku barikuraara, yaabagira ati: Shoimwe omugurusi ou mwagambireho agumire? Beitu akibaho? 28Nabo bati: Omuheereza waawe tataitwe agumire, kandi akibaho. Batyo baatsimba amaju baamuramya. 29Ku yaimukize ati amaisho, yaareeba omurumuna Benyamiini mwene nyina; yaababuuza ati: Ogu niwe murumuna waanyu omuto ou mwangambiire? Ruhanga naakakugirire embabazi, mwana wangye. 30Yosefu arahuka kubarugaho ahabw'okuba akaba ainiire omurumuna orushusho rwingi. Atyo asherura ah'okuririra; ataaha omu kishengye kye aririrayo. 31Ku yaaherize kunaaba ahamaisho, yaashohora. Atyo ayegumya, agira ati: Nimwihure ebyokurya. 32Baamugaburirira ahakwe, na bariya ahakwabo, n'Abanyamisiri abaariire nawe ahakwabo; ahabw'okuba kikaba kizira Abanyamisiri kurya n'Abaheburaayo, kiri ekihagaro aha Banyamisiri. 33Beene Yakobo baamushutama omu maisho nk'oku barikukuratana omu kuzaarwa, okwiha aha mukuru okuta aha muto; haza baarebana nibatangaara. 34Yosefu yaabaha ebibego naabiiha aha meeza ye, kwonka ekibego ekya Benyamiini kyakira ekya buri omwe omuribo emirundi etaano. Batyo baanywa baashemererwa hamwe nawe.
Okubura kw'ekikopo kya Yosefu
Currently Selected:
Kut 43: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
