Kur 7
7
1Nyakubaho akagira Musa ati: Reeba naakuhindura ruhanga ahari Faraaho, na mukuru waawe Arooni abe omurangi. 2Oryaguma ogambe ebi ndikukuragiira, na Arooni mukuru waawe aryagambira Faraaho kureka Abaisiraeli bakaruga omu nsi ye. 3Kwonka ndyagangaaza Faraaho omutima. Nobu ndikanyisa obumanyiso bwangye n'eby'okutangaaza omu nsi ya Misiri, 4Faraaho ogwo taribahurira, mbone kuhingamiza Misiri omukono gwangye; ngiihemu ebimbuuro byangye nibo bantu bangye Abaisiraeli ninkoresa ebifubiro bihango. 5Reero Abanyamisiri, ku ndibangira Misiri omukono, naiha omuribo Abaisiraeli, nibwo barimanya ku ndi Nyakubaho. 6Musa na Arooni nabo baaba nikwo baagira; baatwaza nk'oku Nyakubaho yaabaragiira. 7Obwo Musa akaba aine emyaka makumi munaana y'obukuru, na Arooni ahikize makumi munaana n'eshatu, obu baagambira Faraaho ebi batumirwe.
Musa na Arooni okuhindura enkoni enjoka
8Nyakubaho akagambira Musa na Arooni ati: 9Faraaho ku araabagire ati: Nimukore eky'okutangaaza ekirikubahamya, obwo ogire Arooni oti: Kwata enkoni yaawe, oginagye ahansi omu maisho ga Faraaho, ehindukye enjoka. 10Musa na Arooni batyo baza owa Faraaho, batwaza nk'oku Nyakubaho yaabaragiira. Arooni anaga enkoni ye aha nsi omu maisho ga Faraaho n'abagaragwa be; egyo nkoni ehinduka enjoka. 11Bwanyima Faraaho ayeta abanyabwengye n'abarogi n'abafumu ba Misiri, nabo batwaza batyo nibakoresa emiguruko yaabo. 12Ahabw'okuba buri muntu akanaga aha nsi enkoni ye, haza zaahinduka enjoka. Kwonka enkoni eya Arooni yaamira ezaabo. 13Hoona omutima gwa Faraaho gwaguma gugangaire, tiyaabahurira, nk'oku Nyakubaho yaakigambire.
Ekibonaboneso ky'okubanza: Amaizi okuhinduka eshagama.
14Bwanyima Nyakubaho akagambira Musa ati: Omutima gwa Faraaho gugangaire, ayangire kurekura abo bantu bakagyenda. 15Mbwenu irooko oze owa Faraaho omu kasheeshe. Yaaba naaza aha maizi, haza omutegyeerereze aha nkungu y'omugyera, okwaitse enkoni eri eyaahindukire enjoka. 16Reero omugire oti: Mukama Ruhanga w'Abaheburaayo akuntumireho naagira ati: Reka abantu bangye bagyende bampeerereze omu ihamba, kandi ngu reeba tomworobeire. 17Mbwenu Mukama ogwo naagira ati: Eki nikyo oraamanyireho ku ndi Nyakubaho: Reeba naaza kuteeza amaizi g'omu mugyera enkoni ei nkwaitse, gahindukye eshagama, 18ebyenyanja byamwo bife, omugyera gunuukye, Abanyamisiri banugye amaizi gaagwo, barekye kuganywa. 19Kandi Nyakubaho yaagira Musa ati: Gambira Arooni oti: Kwata enkoni yaawe, obangye omukono gwawe ahaiguru y'amaizi ga Misiri, aha migyera yaago, aha mikura yaago, aha biyanja byago, n'aha bisyaraazi by'amaizi byona, bibone kuhinduka eshagama. Ensi ya Misiri yoona ebugye eshagama, entaatika zaabo n'enyungu zaabo z'amabaare biijure eshagama.
20Musa na Arooni baakora nk'oku Nyakubaho abaragiire. Arooni atyo aimukiza enkoni omu maisho ga Faraaho n'ag'abagaragwa be, agiteeza amaizi g'omu mugyera; goona gahinduka eshagama. 21N'ebyenyanja byamwo bifa, omugeyera gunuuka, Abanyamisiri baremwa kunywa amaizi gaamwo. Ensi ya Misiri yoona ebugwa eshagama. 22Kwonka abafumu ba Misiri nabo bakora batyo n'emiguruko yaabo, na Faraaho aguma agangaize omutima, ayanga kubahurira, nk'oku Nyakubaho yaagambire. 23Faraaho atyo agarukayo, ayetaahira omu nju ye, ekyo takyeetaho. 24Abanyamisiri boona batimba amaziba omu mbaju z'omugyera, ngu bakaayetungira amaizi g'okunywa, ahabw'okuba amaizi gaagwo gakabarema kunywa. 25Hatyo hahinguraho ebiro mushanju, Nyakubaho aherize kuteera amaizi g'ogwo mugyera.
Ekibonaboneso kya kabiri: Ensi okwijura ebikyere
Currently Selected:
Kur 7: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
