Kur 3
3
1Omu biro ebyo Musa akaba naariisa obusyo bw'entaama za Yetero ishezaara, omuhongyerezi Omumidiyani. Yaaseetura obusyo bwe, yaabwahukiza aha bukiizi bwa burengyerwa-izooba obw'eihamba; yaahika aha rushozi rwa Ruhanga orurikwetwa Horebu. 2Mpaho maraika wa Nyakubaho yaamubonekyerera omu rurimi rw'omuriro gurikwakira ahagati y'orushaka. Ku yaanagireyo ati amaisho, yaareeba orushaka nirwaka, kwonka rutarikusiriira.
3Musa agira ati: Ka nyekiikuure, ndeebe eri ihano, ekirikuzibira oru rushaka kusya. 4Nyakubaho ku yaareebire Musa naakiikama kurwetegyereza Ruhanga ogwo yaamweta naayema omuri orwo rushaka ati: Musa! Musa! Onu ati: Ndi aha! 5Nawe amugira ati: Otairira haihi. Juura enkaito omu bigyere byawe, ahabw'okuba omwanya gu oyemereiremu n'ogurikwera. 6Ayongyera amugira ati: Niinye Ruhanga wa baashoimwe, Ruhanga wa Aburahamu, Ruhanga wa Isaaka, Ruhanga wa Yakobo. Musa atyo ayesangira aha maisho ahabw'okutiina kureeba Ruhanga.
Ruhanga okutuma Musa ahari Faraaho
7Bwanyima Nyakubaho yaagira Musa ati: Ndeebire okubonabonesibwa kw'abantu bangye abari omuri Misiri, naahurira okuborooga kwabo oku barikuboroogyesibwa abanyampara. Nimmanya obusaasi bwabo. 8Hati naija kubakiza okutegyekwa Abanyamisiri, mbaihe omuri egyo nsi, mbatware omu nsi enungi kandi egarami: Ensi erikuhimintika amate n'obwoki, mbahitsye omu nsi y'Abanyakanaani n'Abahiiti n'Abaamori n'Abaperizi n'Abahiivi n'Abayebusi. 9Reeba mpikirweho okuborooga kw'Abaisiraeli, naareeba oku Abanyamisiri barikubahata. 10Mbwenu nu ija nkutume ahari Faraaho oihe abantu bangye Abaisiraeli omuri Misiri. 11Kwonka Musa agira Ruhanga ati: Mbwenu nyowe niinye oha orikuza ahari Faraaho nkaiha Abaisiraeli Misiri? 12Nawe amugira ati: Niinyija kuba nkwine, kandi aka niko kamanyiso aku orimanyiraho ku niinye nkutumire: Ku oriba waihire abo bantu omuri Misiri; muryaramiza Ruhanga ahari oru rushozi.
13Bwanyima Musa abuuza Ruhanga ati: Ku ndaahikye Abaisiraeli, naabagira nti Ruhanga wa baashwenkuriimwe abantumireho; haza bambuuza bati: Eiziina rye n'oha, mbagire nta? 14Ruhanga agarukamu Musa ati: Niinye Nyakubaho. Kandi amugira ati: Ogambire Abaisiraeli oti: Nyakubaho niwe abantumireho. 15Ayongyera amugira ati: Abaisiraeli obagambire oti: Mukama Ruhanga wa baashwenkuriimwe, Ruhanga wa Aburahamu, Ruhanga wa Isaaka, Ruhanga wa Yakobo yaabantumaho. Eryo niryo iziina ryangye eri nyetwa ebiro byona, kandi ndyaguma niinyetwa ntyo obusingye bwona.
16Mbwenu irooko orundaane abakuru b'omu Baisiraeli, haza obagire oti: Mukama Ruhanga wa baashwenkuriimwe, Ruhanga wa Aburahamu, Ruhanga wa Isaaka, Ruhanga wa Yakobo ambonekyeire yangira ati: Mbeetegyereize, naareeba oku babagizire omuri Misiri. 17Hati mmaririire kubaiha omu kubonabonesizibwa omuri Misiri, mbatware omu nsi y'Abanyakanaani n'Abahiiti n'Abaamori n'Abaperizi n'Abahiivi n'Abayebusi, ensi erikuhimintika amate n'obwoki. 18Nabo nibaija kwikiriza ebi oraabagambire. Reero iwe n'abakuru b'omu Baisiraeli mugyende, muhikye omugabe wa Misiri, haza mumugire muti: Mukama Ruhanga w'Abaheburaayo atubonekyeire. Mbwenu nitukweshengyereza, otwikirize tugyende orugyendo rw'ebiro bishatu, tuze omu ihamba, tubone kutambirirayo Mukama Ruhanga waitu ebitambo. 19Nimmanya omugabe wa Misiri ku atarikwija kubaikiriza kugyenda, yaaba atagyemesereziibwe. 20Mbwenu niinyija kubanga omukono gwangye, nteeze Misiri eby'okutangaaza byona ebi ndigikoreramu; bwanyima abarekye mugyende. 21Kandi abo bantu ndyabareetera okugirirwa embabazi Abanyamisiri. N'ahabw'ekyo ku muriza kugyenda, timurigyenda ngaro nsha. 22Kureka buri mukazi aryashaba mutaahi we, nari ondi mukazi ocumbikire omu nju ye, ebintu by'efeeza n'eby'ezaabu n'ebijwaro; mubijwekye batabani baanyu na bahara baanyu, mwaye mutyo Abanyamisiri.
Ruhanga okworeka Musa eby'okutangaaza
Currently Selected:
Kur 3: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
