Kur 19
19
1Aha kiro eki okwezi kwa kashatu kwabonekyeireho, Abaisiraeli barugire omu nsi ya Misiri, ahari ekyo kiro nibwo baahika omu ihamba rya Sinaayi. 2Ku baarugire Refidimu, baahika omu ihamba rya Sinaayi baarisiisiramu, baateera amahema omu mizi y'orushozi. 3Mpaho Musa atemba orushozi ru Ruhanga yaabaire ariho, na Nyakubaho amweta naayema ahari orwo rushozi, naamugira ati: Oku nikwo oraagambire ab'omuryango gwa Yakobo, kandi ogire Abaisiraeli oti: 4Mureebire oku naagizire Abanyamisiri, n'oku imwe naabareeteire omu mapapa nk'empungu, nkabeehitsya. 5N'ahabw'ekyo nu, ku muryorobera ebi ndikubagambira, mwarinda endagaano yangye, muryaba abangye ahabwangye omu mahanga goona. Manya ensi yoona n'eyangye. 6Mbwenu imwe muryambeera obugabe bw'abahongyerezi, kandi eihanga eririkwera. Ebyo nibyo bigambo ebi oraagambire Abaisiraeli.
7Musa atyo aija, ayeta abakuru b'omuri abo bantu, abateekyerereza byona ebi Nyakubaho amuragiire. 8Abo bantu boona bagarukiramu hamwe nibagira bati: Byona ebi Nyakubaho yaagamba, nitwija kubikora. Musa nawe agambira Nyakubaho ebi abo bantu baagamba. 9Nyakubaho agira Musa ati: Reeba naaza kukwijaho ndi omu kicu kikwaitse, abantu bahurire ningamba naiwe, haza babone kukwesiga ebiro byona. Musa nawe amugambira ebi abo bantu baagamba. 10Nyakubaho agira Musa ati: Irooko oze omu bantu, obagambire eri izooba na nyencakare boozye emyenda yaabo. 11Aha kiro kya kashatu babe baayeteekateekire; ahabw'okuba ahari ekyo kiro nibwo Nyowe Nyakubaho ndaashuume aha Rushozi Sinaayi, abantu boona nibandeeba. 12Reero iwe abantu obateereho obugarukiro okwehinguririza oru rushozi, kandi obagire oti: Mwerinde mutakaatemba orwo rushozi, nobu kwakuba okukora aha bugarukiro bwarwo. Weena oraarukoreho naitwa. 13Hatagira owaarukoraho, kureka bamuteere amabaare, nari bamurashe. Nobu yaakuba enyamaishwa nari omuntu bitagumaho. Enzamba ku eraagambe akasirikiriro, babe nibwo bainamuka bakahika aha rushozi. 14Musa atyo ashuuma naaruga aha rushozi, ahika abo bantu abaraarika, nabo boozya emyenda yaabo. 15Kandi abagambira ati: Mweteekateekye, ekiro kya kashatu kuza kuhika, harekye kubaho owaahika omukazi.
16Ku bwaseesire, aha kiro kya kashatu, enkuba zaagamba, emirabyo yaatyankana, orushozi rwagiibwaho ekicu kikwaitse; reero enzamba yaaraakuuza; abaabaire bari omu nsiisira baatetema. 17Bwanyima Musa yaiha abo bantu omu rusiisira kuza kutangirira Ruhanga; nabo baayemerera omu mizi y'orushozi. 18Orushozi Sinaayi rwashwekwa omwika ahabw'okuba Nyakubaho akarushuumaho ari omu muriro. Haza omwika gwarwo gwacumbuuka nk'ogw'eiziiko, kandi orushozi rwona rwatengyeeta munonga. 19Mbwenu eiraka ry'enzamba ku ryabaire ryongyera kuraakuuza, Musa agamba, na Ruhanga amugarukiramu omu nkuba. 20Mpaho Nyakubaho ashuuma, ahika aha Rushozi Sinaayi, aha mutwe gwarwo. Haza ayeta Musa kwija aha mutwe gw'orwo rushozi, na Musa anyegyera ahikayo. 21Reero Nyakubaho agira Musa ati: Shuuma oyehanangirize abantu batakaayogaho kumpika kunshamaarira, baingi omuribo bakacwekyerera. 22Kandi ragiira abahongyerezi, abaraahikye haihi Naanye, beeyeze, ntakaabajumbukana nkabaita. 23Mpaho Musa agira Nyakubaho ati: Abantu tibarikubaasa kwija aha Rushozi Sinaayi, ahabw'okuba Iwe wenka okaturagiira noogira oti: Muteho obugarukiro bwehinguririze orushozi, kandi murweze. 24Nyakubaho nawe amugira ati: Irooko oshuume, haza oijane Arooni. Kwonka otaikiriza abahongyerezi n'abantu kwataguza kwija kumpika, ntakaabajumbukana nkabaita. 25Musa nawe atyo ashuuma, ahika abo bantu abagambira.
Ebiragiro ikumi bya Ruhanga
Currently Selected:
Kur 19: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
