Bar 1
1
Baruuku n'Abayudaaya omuri Babulooni
1Ebi n'ebigambo by'ekitabo eki Baruuku mwene Neraaiya, mwene Maheseeya, mwene Zedekiya, mwene Hasadiiya, mwene Hilikiya, yaahandiikiire omuri Babulooni, 2omu mwaka gwa kataano,#1:2 Omwaka gwa kataano nigwo mwaka gwa 582 Kristo atakazairwe. aha kiro kya mushanju ky'okwezi, obu Abakaludaaya baakwata Yerusalemu, bakagyotsya. 3Baruuku ogwo akashoma ebigambo by'eki kitabo, byahurirwa Yekoniya mwene Yehoyakimu, omugabe wa Buyudaaya, n'abantu boona abaizire kubihurira. 4Kandi n'abantu ab'obushoboorozi n'abanyiginya n'abakuru omu ihanga n'abantu boona abato n'abakuru, boona abaabaire batwire omuri Babulooni aha mugyera Sudi, nabo bakabihurira.
5Baarira baayesiibyakwo, baashaba Mukama; 6kandi baarundaana empiiha, buri omwe naaha eki arikubaasa. 7Baazoohereza Yerusalemu ahari Yehoyakimu omuhongyerezi, mwene Hilikiya, mwene Shaluumu, n'aha bahongyerezi n'aha bantu boona abaabaire bari hamwe nawe Yerusalemu. 8Omuri obwo bunaku, aha kiro kya ikumi ekya Silivani, Baruuku akatwara ebintu kubigarura omu nsi ya Yuda. Ebyo bintu bikaba biri eby'efeeza eby'omu nju ya Mukama, ebi Zedekiya mwene Yosiya, omugabe wa Buyudaaya yaakozire, 9Nebukadenezaari omugabe wa Babulooni yaaherize kukwata Yekoniya akamwiha Yerusalemu, hamwe n'abanyiginya n'embohe n'ab'obushoboorozi n'abantu b'omuri egyo nsi, akabiiha omuri Nyaruju, akabitwara Babulooni hamwe nabo.
10Kandi baagira bati: Reeba, twabatwekyera empiiha; muziguremu ebitambo by'okucwetsya n'eby'okukarabira ebibi n'okuziguramu obubaani, mutebeekanise emitoijo y'esaano, mubihongyere aha itambiro rya Mukama Ruhanga waitu. 11Haza mushabire Nebukadenezaari omugabe wa Babulooni, aramaare hamwe na Belishazaari omutabani, ebiro byabo omu nsi bibe nk'eby'omu iguru. 12Mukama naija kutuha amaani, atuhwezese, tugume niturindwa Nebukadenezaari omugabe wa Babulooni n'omutabani Belishazaari, tumare ebiro bingi nitubaheereza, tubone kushongoka omu maisho gaabo. 13Haza mutushabire ahari Mukama Ruhanga waitu, ahabw'okuba tukamucumuraho, n'okuhitsya eri izooba ekiniga kye n'ekishinjo kye tibikaturugireho. 14Eki kitabo eki twabatwekyera, mukishome, kibareetere okwaturira ebibi byanyu omu nju ya Mukama, aha biro bikuru n'omu bunaku obutairweho.
Okweteisa kw'Abayudaaya bari Babulooni
15Mbwenu mugire muti: Okuhikiirira n'okwa Mukama Ruhanga waitu. Kwonka itwe okuhitsya eri izooba, tutuura nitwitwa enshoni, itwe abantu ba Yuda abatuuzi ba Yerusalemu, 16n'abagabe baitu n'abanyiginya n'abahongyerezi n'abarangi baitu na baatatenkuriitwe. 17Manya tukacumura omu maisho ga Mukama, 18twamugomera, titwayeta ha iraka rya Mukama Ruhanga waitu, kukuratira ebi yaatuteeraireho. 19Okwiha obu Mukama yaiha baatatenkuriitwe omu nsi ya Misiri n'okuhitsya hati, tutuura togomeire Mukama Ruhanga waitu, tutarikweta ha bi arikutugambira. 20N'ahabw'ekyo n'okuhitsya eri izooba akagwe n'omukyeeno bituura bituramatsire. Nibyo Mukama yaagambiire omuheereza we Musa, obu yaiha baatatenkuriitwe omuri Misiri, kutuha ensi erikuhimintika amate n'obwoki. 21Titureetaire ha bi Mukama Ruhanga waitu yatugambiire naatutumaho abarangi. Kureka buri omwe omuriitwe akakuratira ebi omutima gwe mubi gurikwenda, yaaheereza baaruhanga abandi, yaakora ebibi omu maisho ga Mukama Ruhanga waitu.
Currently Selected:
Bar 1: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.