3 Yoh 1
1
Okuramutsya
1Nyowe omukuru, ninkuhandiikira, iwe Gaayo, ou nkunda omu mazima.
2Mugyenzi wangye omukundwa, ninshaba ngu byona bikugyendere gye, ogire amagara marungi omu mubiri, nk'oku ori gye omu mutima. 3Nkashemererwa munonga, ahabw'okuba bamwe omu banyaruganda ku baizire, bampamiza ku orikukuratira amazima, kandi kwokwo noogakuratira. 4Tihariho kushemererwa okungira, okukira okuhurira ngu abaana bangye nibakuratira amazima.
Okusiima ahabw'eby'obufura
5Mugyenzi wangye omukundwa, okora ekintu ky'obwesigwa, ku oba nooheereza abanyaruganda omu muringo gwona, nobu baba bari abu otarikumanya. 6Manya abo bahamiize ekigombe ky'abaikiriza ebya rukundo yaawe. Naakweshengyereza, guma obahe eby'okubakwatsa omu rugyendo rwabo, omu buryo bu Ruhanga arikusiima. 7Bakaruga owaabo ahabwa Kristo, bangire kwakiira ekintu kyona eki Abanyamahanga baabaire nibenda kubaha. 8Nikyo tushemerereire kukwatsa abantu nk'abo, ngu tubone kukwatanisa nabo omurimo gw'okubuzya amazima.
Ebya Dioterefe na Demetirio
9Nyine ebi mbaire naahandiikiire ekigombe ky'abaikiriza, kwonka Dioterefe, oitanira obukuru, taikiriza bi ndagiira. 10Mbwenu ku ndiija, ndyabaijutsya ebi akora: oku arikumbeiherera nangambuura. Tagarukira aho, ataho n'okushenda abanyaruganda, nangwa n'okuzibira abarikwenda kubaakiira, kandi ababinga omu kigombe ky'abaikiriza.
11Mugyenzi wangye omukundwa otaritooreza orikukora ebibi, kureka otooreze orikukora ebirungi. Okora ebirungi n'owa Ruhanga; okora ebibi n'otakareebaga Ruhanga.
12Demetirio, boona nibamugambaho gye, n'amazima nyakabara nigamuhamya. Naanye nikwo ndikumuhamya, kandi noomanya ku obuhamya bwangye buri obw'amazima.
Okuhendera
13Naaba nyine bingi by'okukuhandiikira, kwonka tinkaayenzire kubihandiikisa kacumu na bwino, 14ahabw'okuba nyine amatsiko g'okukureeba juba, tugaaniire nitureebana.
15Ogume n'obusingye.
Banywani baawe nibakuramutsya. Oturamukize banywani baitu buri omwe.
Currently Selected:
3 Yoh 1: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.