1 Maka 5
5
1Abanyamahanga abeehinguririizeho ku baahuriire ngu Abaisiraeli bombekire eitambiro baahaasirira Omwanya Ogurikwera, nk'oku gwabaire guri bwabiso, baagira ekiniga kingi. 2Baamaramaza kucwekyereza baijukuru ba Yakobo abaabaire babatwiremu, batyo baatandika kubaita n'okubamara omu bantu. 3Yuda nawe yaateerera beene Esau ahari Akurabaateene omuri Idumaaya, ahabw'okuba bakaba batuura bagweraire Abaisiraeli. Akabateera oruteera ruhango munonga, yaabacwa eishaija kandi yaabanyaga. 4Akaijuka n'obubi bwa beene Baaya, abaabeereire abantu omutego n'obusya, bakabagwera omu mihanda rugyendwa. 5Yuda yaabakingiranira omu bigo byabo kandi yaabateeraho orusiisira, yaahiga kubacwekyerereza kimwe, n'eminaara yaabo yaagyotsya na boona abaabaire bagirimu. 6Bwanyima yaayambuka kuteera Abaamooni, okwo niyo yaashangire eihe ry'amaani n'abantu baingi beebembeirwe Timoteeho. 7Yaarwana nabo engamba nyingi, yaabasingura, yaabacwekyereza. 8Reero yaakwata Yazeeri n'ebyaro byayo, bwanyima yaagarukayo Buyudaaya.
Okutebeekanisa ehururu za Galilaaya na Giliyaadi
9Mbwenu Abanyamahanga b'omuri Giliyaadi bakateeranira hamwe kurwanisa Abaisiraeli abatwire omu nsi yaabo, baacuma enaama y'okubacwekyereza. Kwonka bo baahungira omu kigo ky'okwerindiramu eky'omuri Daatema, 10kandi baatwekyera Yuda na beene ishe ebaruha erikugira eti: Abanyamahanga abatwehinguririize beeteeraine kuturwanisa kutucwekyereza. 11Beeteekateekire kwija kukwata ekigo ki tuhungiiremu, kandi Timoteeho niwe ayebembeire amahe gaabo. 12Mbwenu nimwije mubatujune, ahabw'okuba baingi omuriitwe bagwireho. 13Na beene waitu boona ababaire bari omu nsi ya Tobi baitsirwe; ababisha bakwatsire abakazi baabo n'abaana n'ebintu byabo, baacwekyererezayo abashaija nka rukumi.
14Ku baabaire nibakishoma egyo baruha, baayecura ezindi ntumwa zijwaire ebijwaro bitaagukire niziruga Galilaaya, nazo zaabateekyerereza ebiri nk'ebyo; 15zaabagira ziti: Abantu ba Putolemaayo n'aba Tuuro n'aba Sidoni n'aba Galilaaya yoona ey'Abanyamahanga, beeteeraine kuturwanisa kutumaraho. 16Yuda n'abantu ku baahuriire ebi babatumireho, baayeta oruteerane ruhango kucwamu eki baraakorere beene waabo abari omu kabi, abu abazigu baabaire nibateera. 17Yuda yaagira mukuru we Simooni ati; Yetooranire abantu, oze kujuna beene sho omuri Galilaaya. Nyowe na Yonataani murumuna wangye nitwija kuza Giliyaadi. 18Kwonka Yosefu mutabani wa Zekariya, na Azariya omwebembezi w'abantu hamwe n'ab'amahe abaatsigaireho, yaabatsiga omuri Buyudaaya kugirinda. 19Kandi yaabaragiira ati: Mureeberere aba bantu, kwonka muteetaasya omu by'engamba n'Abanyamahanga, okuhitysa obu turaagarukye. 20Simooni baamubarira abantu enkumi ishatu kubatwara Galilaaya, reero enkumi munaana baazitooranira Yuda kuza nazo Giliyaadi.
Abaisiraeli okuteera Galilaaya na Giliyaadi
21Simooni ku yaagiire Galilaaya, yaarwanirayo engamba nyingi n'Abanyamahanga, yaabasingura. 22Yaababinga, yaabahitsya aha irembo rya Putolemaayo; Abanyamahanga baingi nk'enkumi ishatu baagwaho, kandi yaabanyaga. 23Bwanyima yaakwata Abayudaaya b'omuri Galilaaya n'ab'omuri Arubaata, hamwe n'abakazi baabo n'abaana na byona ebi baabaire batungire, yaabatwara Buyudaaya n'okushemererwa kwingi.
24Yuda Makabeho na Yonataani omurumuna, bo baayambuka Yorudaani, baagyenda orugyendo rw'ebiro bishatu nibaraba omu ihamba. 25Baabugabugana n'Abanabataayo, abaabaakiire n'obusingye, bakabateekyerereza byona ebyabaire ahari beene waabo omuri Giliyaadi, bati: 26Baingi aharibo bakingiraniirwe omuri Bozira na Bosori, omuri Alema na Kasufo n'omuri Makedi na Karinaimu endembo ezo zoona zigumire kandi ni mpango. 27N'abamwe bakingiraniirwe omu zindi ndembo za Giliyaadi; abazigu beeteekateekire kuteera ebyo bigo nyencakare, kukwata n'okucwekyereza abo bantu boona omu izooba rimwe.
28Mpaho Yuda n'ab'eihe rye baakuba ahonaaho, baatoora ogw'eihamba, baahika Bozira; yaakwata orwo rurembo, yaitsa rurara omuntu weena oyetwa omushaija, yaanyaga ebyamwo byona, yaarwotsya. 29Okwo akarugayo nyekiro, baagumizamu baahika aha kigo ky'okwerindiramu ekya Daatema. 30Ku baimukize amaisho omushekye nigujuguta, baareeba emigogo y'abantu abatarikubaasa kubarwa beekoreire amatembero n'ebyoma by'orugamba kukwata ekyo kigo n'okurwanisizamu Abayudaaya abakirimu. 31Yuda areeba ku orugamba rwatandikire, kandi ku okuborooga kw'ab'omu rurembo kwahikire omu iguru, hamwe n'okuteera enzamba n'orwari; 32atyo agambira abashaija b'omu mahe ge ati: Eri izooba murwanirire beene waanyu! 33Atyo abareetwa enyima aine ebimbuuro bishatu by'abantu abarikuteera enzamba, bakaamuza nibashaba Ruhanga. 34Ab'eihe rya Timoteeho ku baayetegyereize ku ari Makabeho, baamuhunga; nawe yaabaita orwita ruhango. Eryo izooba abantu baingi nk'enkumi munaana baagwaho.
35Ekyakuratsireho yaahinduka yaagarura ogurikuza Alema, yaagirwanisa, yaagikwata, yaita omuntu weena oyetwa omushaija omuriyo, yaaginyaga kandi yaagyotsya. 36Ku yaarugire okwo, yaagumizamu yaakwata Kasufo na Makedi na Bosori n'ezindi ndembo za Giliyaadi.
37Ebyo ku byahwaire Timoteeho yaahuruza erindi ihe, yaateera ensiisira aharikureebana na Rafooni, aha rundi rubaju rw'akagyera. 38Yuda ku yaatumire abantu kutata orwo rusiisira, baamugambira bati: Abanyamahanga boona abatwehinguririize bamuteeraniireho, kandi n'eihe rihango munonga. 39Baguririire n'Abaharabu kubaha emikono, mbwenu basiisiire seeri y'akagyera, beeteekateekire kwija kuturwanisa. Yuda nikwo kuza kubugabugana nabo.
40Yuda n'ab'eihe rye ku baahikire haihi n'ako kagyera, Timoteeho yaagambira abakuru b'emitwe y'amahe ge, ati: Ku araatubandize kukambuka, titurikwija kubaasa kumugungira, ahabw'okuba omu mazima naija kutusingura. 41Kwonka ku araatiine, yaateera ensiisira aha rundi rubaju rw'ogu mugyera, nitwija kwambuka tumuhikye, tumusingure. 42Yuda ku yaahikire haihi n'ako kagyera yaata abakuru b'amahe aha mwegyeego gwako, haza yaabaragiira ati: Mutaikiriza omuntu weena kusiisira, kureka boona mubaragiire barwane orugamba. 43Atyo yaayambuka kuba niwe yaabanza kubarwanisa n'eihe ryona ryamukuratira. Abanyamahanga boona yaabasingura, yaabaraza, baanaga eby'okurwanisa byabo, baahungira omu ndaaro z'omuri Karinaimu. 44Yuda orwo rurembo yaarukwata, yaayotsya ezo ndaaro n'abaabaire bazirimu boona. Karinaimu nikwo yaasingwirwe etyo, abo banyamahanga batabaase kuza Yuda omu kaso obundi.
45Bwanyima Yuda yaateerana Abaisiraeli boona ab'omuri Giliyaadi, abanyamaziina n'abatari banyamaziina, hamwe n'abakazi baabo n'abaana n'ebintu, ekimbuuro kihango munonga, kuza omu nsi ya Yuda. 46Batyo baija Efurooni. Orurembo orwo rukaba ruri ruhango kandi rugumire munonga, ruri aha muhanda, batarikubaasa kurukiikuuka aha rubaju rwa buryo, nari aha rwa bumosho, kureka okururabamu. 47Ab'omuri orwo rurembo baabakingira, amarembo baagaigaza amabaare. 48Yuda nikwo kubatumaho naabeeshengyereza ati: Muturekye turabe omu nsi yaanyu, tubone kuhika omu yaitu. Tihariho oraabakore kubi, kureka nitwija kuhingura nitugyendesa ebigyere; kwonka bo baayanga kumwigurira. 49Yuda nikwo kuragiira ku barangirira ab'omu ihe, buri omwe kuteera orusiisira naayema ahu ari. 50Ab'omu mahe baasiisira; Yuda yaamara eizooba ryona n'ekiro kyona naarwanisa orwo rurembo; yaarugaho yaarusingura. 51Buri mushaija weena yaamwitsa rurara, orurembo yaarusheenyagura, yaataho n'okurunyaga, yaarurabamu naatambuuka emitumbi.
52Batyo baayambuka Yorudaani, baaza omu ruhita ruhango orurikureeba Beetishaani. 53Yuda yaaguma naarundaana abatsigaire enyima, kandi naagumya abantu omuri orwo rugyendo rwona, okuhitsya obu yaahikire omu nsi ya Yuda. 54Bainamuka orushozi Siyooni bashemereirwe kandi nibeesiima, baatamba ebitambo by'okucwetsya, ahabw'okuba omuribo tiharabaireho n'omwe owaagwireyo; boona bakagarukayo buhooro.
55Yuda na Yonataani ku baabaire bakiri omuri Giliyaadi, na Simooni omurumuna akiri omuri Galilaaya naarwanisa Putolemaayo, 56Yosefu mwene Zekariya na Azariya abakuru b'amahe, baahurira eby'obumanzi ebi bakozire n'orugamba ru baarwaine mashaija. 57Nabo baagira bati: Naitwe ka twetungire eiziina, tuze kurwana orugamba, tuteere Abanyamahanga batwehinguririize. 58Baaragiira abantu b'omu mahe gu baabaire baine baahurura, baateera Yamuniya. 59Gorigiya n'abashaija be nabo baaruga omuri orwo rurembo, kubabugana kurwana. 60Ekyarugiremu, Yosefu na Azariya baahunga, abazigu baababinga, baabahitsya omu myatano ya Buyudaaya; eryo izooba abantu baingi nk'enkumi ibiri ab'omu Baisiraeli baagwayo. 61Abo bantu baareeba enaku z'okusingurwa munonga, ahabw'okuba ku baayenzire kukora eky'obumanzi, tibaata mutima aha ki Yuda na beene ishe baabagambiire. 62Kwonka bakaba batari b'omuryango gw'abaakwtsiibwe omurimo gw'okurokora Isiraeli.
63Ogwo mushaija Yuda na beene ishe bakaheebwa ekitiinwa kingi omuri Isiraeli yoona n'omu banyamahanga boona, hoona ah'eiziina ryabo ryahuriirwe. 64Abantu bakabateeraniraho, baabasingiza munonga.
65Bwanyima Yuda na beene ishe baagyenda, baarwanisa beene Esau ab'omu nsi y'obukiizi-bwa-buryo, yaateera Heburooni n'ebirorero byarwo, yaasheenya ebigo byarwo, n'eminaara yaarwo erwehinguririize yaagyotsya. 66Reero yaahurura kuza omu nsi y'Abafilisitiya, yaaraba omuri Marisa. 67Eryo izooba abahongyerezi bamwe, abaayenzire kukora eby'obumanzi, baagwa omu rugamba ahabw'okuba obushema bukabakoresa eki batakukozire. 68Yuda we akakiikama, yaaza Azooto omu nsi y'Abafilisitiya; yaasheenya amatambiro gaabo, yaayotsya ebishushani by'emandwa ebisharwirwe, yaanyaga endembo zaabo; bwanyima yaagarukayo omu nsi ya Yuda.
Ebiro bya Antiyoko Epifane ebyahereerukire
Currently Selected:
1 Maka 5: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.