1 Maka 2
2
1Omu biro ebyo Matatiya mwene Yohaana, Yohaana mwene Simeoni omuhongyerezi ow'omuri beene Yoharibu, akaruga Yerusalemu, yaatuura omu Modeyini. 2Akaba aine abatabani bataano: Yohaana orikwetwa Gade, 3Simooni orikwetwa Taasi, 4Yuda orikwetwa Makabeho, 5Eleyazaari orikwetwa Avaraani, na Yonataani orikwetwa Afusi. 6Matatiya ogwo akareeba ebibi by'okurogota nibikorwa omuri Buyudaaya n'omuri Yerusalemu, 7yaagira ati:
Ai bambe! Mbwenu nkaba naazaarirwa ki kureeba
okuhwerekyerera kw'eihanga ryangye
n'okucwekyerera kw'orurembo orurikwera,
haza nkarutuuramu rwaherize kurekurirwa abazigu,
n'Omwanya Ogurikwera gwarekuriirwe Abanyamahanga?
8Nyaruju yaarwo ebaire
nk'omushaija otaine kitiinwa;
9ebintu byarwo eby'ekitiinwa binyagirwe byatwarwa,
abeereere baarwo baitiirwe omu nguuto zaarwo,
eminyeeto yaarwo yaitwa rurara y'ababisha.
10Ni ihanga ki eritahungwire bikaari
byarwo eby'obugabe,
rikatunga eminyago yaarwo?
11Amahunde gaarwo goona gatwairwe,
tirwakyetegyeka, ruhindukire omuhuuku.
12Reeba Omwanya gwaitu Ogurikwera,
oburungi bwaitu kandi ekitiinwa kyaitu,
guhindwirwe omushaka,
Abanyamahanga baaguhagaza.
13Mbwenu ahabw'enki
nitugumaho tutafiire?
14Matatiya n'abatabani nikwo kutaagura ebi bajwaire, bakajwara ebiguniya, bakacura munonga.
Matatiya okwitira omuntu aha itambiro
15Obwo abakungu b'omugabe abaabaire nibagyema abantu kureka enyikiriza yaabo, bakaija omu rurembo rwa Modeyini kubatambisa ekitambo. 16Baingi omu baarugire Isiraeli baija ahi bari, na Matatiya n'abatabani baateeraniraho. 17Mpaho abakungu b'omugabe baagambira Matatiya bati: Niiwe mwebembezi orikuheebwa ekitiinwa, omukuru omuri oru rurembo, kandi orikukwatsibwa batabani baawe na beene sho. 18Mbwenu ba niiwe waabanza kwija, okore ebi omugabe arikuragiira, nk'oku Abanyamahanga boona n'abantu ba Yuda n'abatsigaire Yerusalemu bakozire. Haza obwo iwe na batabani baawe nibwo muraabarirwe omuri banywani b'omugabe, mukaba ab'ekitiinwa, mukaheebwa ebihembo birungi eby'efeeza n'eby'ezaabu n'ebiconco bingi.
19Kwonka Matatiya yaagarukamu naahiga n'eiraka rihango ati: Amahanga goona agarikutegyekwa omugabe nobu garaamuhurire gakasiima kukora ebi arikuragiira, buri rimwe rikareka ediini ya baishenkuru, 20kwonka nyowe na batabani bangye na beene tata nitwija kugumira aha ndagaano ya baatataitwe. 21Nikikabure itwe okureka eiteeka n'ebiragiro. 22Itwe titurikwija kukuratira ekiragiro ky'omugabe, tukareka emiramize yaitu, kukiikama aha rubaju rwa buryo nari orwa bumosho. 23Ku yaaherize kugamba ebyo, Omuyudaaya omwe yaahuruutukayo boona nibamureeba, kutambira ekitambo aha itambiro ry'omuri Modeyini, nk'oku omugabe yaaragiire. 24Matatiya ku yaakireebire, eihato ryayenda kumwita, omutima gwe gwatuumeera. Yaagira ekiniga kihikire, yairuka yaamwitira aha itambiro. 25Omuri ago magingo yaita n'omukungu w'omugabe owaabaire naabagyemesereza kutamba ebitambo, n'eitambiro yaarisheenyagura. 26Yaagira atyo eihato ahabw'Eiteeka, nk'oku Finehaasi yaarigiriire Zimuri mwene Saalu.
27Bwanyima Matatiya yaayamuriza omu rurembo n'eiraka rihango ati: Weena oiniire eiteeka eihato, orikuteeraho kurinda endagaano arugyeyo tugyende kumwe. 28Atyo we n'abatabani baahungira omu nshozi, baatsigaho byona ebi baabaire batungire omuri orwo rurembo.
Abaitiirwe omu ihamba ahari Sabato
29Obwo baingi abaabaire nibakunda okuhikiirira n'amazima, bakaza omu ihamba kutuurayo; 30bo n'abaana baabo n'abakazi baabo n'amatungo gaabo; ahabw'okuba ebibi ebyabaire nibikorwa bikaba bibakabize. 31Reero baabarega aha bakungu b'omugabe n'aha b'amahe omuri Yerusalemu, orurembo rwa Daudi, ngu abantu abaayangire kukuratira ekiragiro ky'omugabe bashuumire, baaza omu myanya y'okwesherekamu omu ihamba. 32Baingi baabaza omu kirari, baarugaho baabahika; baateera orusiisira ahashungaine nabo, baatenga orugamba kubarwanisa aha izooba rya Sabato. 33Baabagira bati: Manya obunaku bwahika! Nimurugyeyo mukore eki omugabe aragiire, nibwo muraagumeho. 34Kwonka bo baabagira bati: Titurikwija kurugayo, nobu kwakuba okukora ebi omugabe aragiire, tukahagaza ekiro kya Sabato. 35Abazigu ahonaaho baahwayo, baabateera. 36Kwonka bo baabeetsiza, tibaabarekyera mabaare, nobu kwakuba okwita emihanda erikuza omu myanya ei baabaire beesherekiremu. 37Ahabw'okuba bakagira bati: Twena ka tufe turi beere! Eiguru n'ensi bituhamize ku murikutwitira busha. 38Batyo baabateera ahari Sabato, baafa n'abakazi baabo n'abaana baabo n'amatungo gaabo, boona baahika abantu rukumi.
Obumanzi bwa Matatiya na bagyenzi be
39Matatiya na bagyenzi be ku baakimanyire, baabacurira munonga. 40Buri omwe yaagambira mutaahi we ati: Ku turaatwaze nk'oku beene waitu bagizire, tukanga kurwanisa Abanyamahanga kurinda amagara gaitu, n'ebiragiro byaitu, nibaija kutucwekyereza juba, batumare omu nsi. 41Eryo izooba baamaramaza bati: Nimurekye turwanise omuntu weena oraije kututeera aha izooba rya Sabato; twena ka turekye kufa nk'oku beene waitu baafeeraire omu myanya yaabo y'okwesherekamu.
42Reero baayeteeranwaho ekigombe ky'Abahasidaayo, amamanzi rugambwa ga Isiraeli, weena owaayehaireyo ahabw'eiteeka ayekundiire. 43N'empungi ezaabaire zihungire okuhiiganisibwa zaayeteerana nabo, zaabaha emikono. 44Baatebekanisa eihe, baita enkozi z'ebibi n'ekiniga, n'ebihaze baabiita n'ekishinjo, abaahonokireho baahungira omu Banyamahanga. 45Matatiya na bagyenzi be baagyenda, baasheenya amatambiro, 46baashara n'empaka aboojo boona abatashazirwe abu baashangire omu ihanga rya Isiraeli. 47Baahiiga abanyamaryo, haza omurimo gwabo gwabagyendera gye. 48Baiha eiteeka omu mikono y'Abanyamahanga n'ey'abagabe, tibaikiriza basiisi kwimutsya mutwe.
Okuraga kwa Matatiya n'okufa kwe
49Obunaku bwa Matatiya bw'okufa ku bwairiire haihi, yaagira abaana be ati: Amaryo n'obuhemu hati byeyongyeire amaani; obu n'obunaku bw'okuhwerekyerera n'okugirirana ekiniga kingi. 50Baana bangye, mugirire eiteeka eihato, muheyo amagara gaanyu ahabw'endagaano ya baatatenkuriitwe.
51Mwijukye ebi baatatenkuriitwe baakozire, ebi baakozire omu busingye bwabo bakaheebwa ekitiinwa kihango n'eiziina ritaryeba. 52Mbwenu shi Aburahamu ku yaagyeziibwe, tarashangirwe ari omwesigwa, haza kikamubarirwa kuba ohikiriire? 53Yosefu omu bunaku bwe obw'okureeba enaku akarinda ekiragiro, haza yaahinduka mukama wa Misiri. 54Tatenkuriitwe Finehaasi ku yaagizire eihato ringi, yaaheebwa endagaano y'obuhongyerezi bw'obutwire bwona. 55Yoshwa ahabw'okuhikiiriza ekiragiro, akaba omuramuzi wa Isiraeli. 56Kalebu ku yaahaire obujurizi omu maisho g'abantu, yaatunga obuhunguzi omuri egyo nsi. 57Daudi ahabw'okuba akaba ari ow'embabazi, akahungura ekitebe ky'obugabe ebiro byona. 58Eliya ku yaagiriire Eiteeka eihato ringi, yaatwarwa omu iguru. 59Hananiya, Azariya na Mishaeli, bakaikiriza, baajunwa ekibabo ky'omuriro. 60Daniyeli ahabw'okuba mwere, akaihwa omu maino g'entare.
61Kandi mwetegyereze, nk'oku obusingye bwihaihana, tihariho n'omwe oramwesigire akahemuka. 62Mutaritiina ebigambo by'omusiisi, ahabw'okuba ekitiinwa kye kiryahinduka orubungo n'enyogori. 63Eri izooba atunguukire, nyencakare tokimubona, ahabw'okuba naaba yaagarukire omu mucuucu, n'ebiteekateeko bye bitakiriho. 64Baana bangye, mube emanzi kandi mugume mweyongyere kuba ab'amaani omu kukuratira eiteeka; haza ribahaise ekitiinwa.
65Mbwenu reeba, nimmanya ku Simeoni mukuru waanyu ari omuhabuzi waanyu w'obwengye; mugume mumutegye okutu, abe nka shoimwe. 66Yuda Makabeho abaire ari omurwani rugambwa okwiha omu buto, abe niwe yaategyeka eihe ryanyu, kurwanisa abazigu omu rugamba. 67Mwakiire boona abarikukuratira eiteeka, haza muhoorere abantu baanyu. 68Muzimuuririre kimwe Abanyamahanga, kandi mute omutima aha bi eiteeka riragiira.
69Bwanyima yaabashabira omugisha, yaakurata baishenkuru. 70Matatiya akafa omu mwaka gwa igana na makumi ana na mukaaga, yaaziikwa Modeyini omu kituuro kya baishenkuru. Isiraeli yoona yaamucurira n'okutonzya kwingi.
Ekyevugo ky'okusingiza Yuda Makabeho
Currently Selected:
1 Maka 2: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.