Wurɔmiyé 7

Tɛ́ngɛfɔli wi 'suɔ Fànʔa Siɛnrɛ ti sùkulomɔ mɛ́ bè

(Gal 2.19,20)

1Mi siinyɛninɛ, bɛ̀ yeli 'Fànʔa Siɛnrɛ cɛ́n dè, yeli ní mi nɛ nyu. Yeli sì ki cɛ́n lé bè líɛ bè taa siɛn wi- puu sìi nɛ̄ wè, Fànʔa Siɛnrɛ ti nàa ti fànʔa kpúɔn gè siɛn nɛ̄ wè. 2We- ki tɔ́nminɔ nɛ́ kaala náà ní lè: cɛliwɛ ŋáà pe 'pɔri wè, bè líɛ bè taa wi pɔli wi de tíin sìi nɛ̄ wè, cɛliwɛ wiī puɔwɔ wi pɔli nɛ̄ wè wī nɛ̀ yɛli nɛ́ fànʔa ki kajuulo ní lè. A ki sí nyaa labɔli wi 'kùu wè, cɛliwɛ wi ní wè nɛ tíin nàgaʔa ki fànʔa láara gèʔ. 3Nɛ̀ sí ki taa a cɛliwɛ wi pɔli wiī nɛ tíin sìi nɛ̄ wè, á cɛliwɛ wi 'kò nàguɔ wáà wiiyɛ mɛ́ wè, wi 'nàjaafaaligɛ kpíʔile. A ki sí nyaa wi pɔli wi 'kùu wè, wi ní wè nɛ tíin ki nàgaʔa ki fànʔa láara gèʔ. Wi bé gbɛ̀ tɛ́ni nàguɔ wáà wiiyɛ mɛ́, nàjaafaaligɛ bɛ̀ʔ kire gèʔ.

4Mi siinyɛninɛ, bɛ̀ míɛni ki yē nɛ́ yeli ní bèle, nɛ̀ yɛli nɛ́ Fànʔa Siɛnrɛ ní dè, yeli yē kúbilo nɛ̀ pínɛ wī nɛ́ Kirisi ní wè, gìi ki bé tí yeli kò wàa wìiyɛ wuulo bèle. Kire siɛn wi 'koli nɛ̀ nyɛ́ nɛ̀ yiri kúbilo nī bèle, dí we sí de yasɛnrɛ sɛngi Kulocɛliɛ mɛ́ wè. 5Ki 'nyaa bà weli 'puu nɛ tíin nɛ céri kanɛdanʔana kúu gèle, Fànʔa Siɛnrɛ ti 'puu nɛ kapiʔile láa nyɔ́gi weli nī, nɛ waa nɛ́ weli ní kùu koligo nī. 6Bɛ̀ sí ki yē píra ŋáà nī wè, weli nyɛ́nì suɔ Fànʔa Siɛnrɛ ti kiyɛ nī yè, nɛ̀ paʔa nɛ̀ suɔ yɛgɛ gíì mɛ́ ki 'puu nɛ weli cògí nɛ nyɔ́gi kasuu nī wè. A kire ki 'kɛn a weli 'kò nɛ baara kanvɔnmɔ nɛ̄ Kulocɛliɛ Pìle lire fànʔa nɛ̄ gè. Weli ní wè tíin nɛ tári kaliɛmɛ nɛ̄ bèʔ, Fànʔa Siɛnrɛ kasɛbɛgɛlɛ láara gèleʔ.

Fànʔa Siɛnrɛ tire ti nyɛ́ni kapiile tìí lè

7Gíi sí we 'yɛli we- juu ? Fànʔa Siɛnrɛ dè, ti 'pii wī lé ? ʔéʔe díɛʔ ! Gìi sí gī baa gè, a Fànʔa Siɛnrɛ tire cé bɛ̀ʔ dè, miì cî ki cɛ́n gáa gī kapiile lèʔ. Nɛ̀ pínɛ, a ki yē Fànʔa Siɛnrɛ tiì cé ki juuʔ nɛ́ jo: Fǎga nyabiɛnnɛ kpíʔile wàa yɛgɛ nɛ̄ʔ#7.7 Yir 20.17; Fàn 5.21 tire ti 'juu náʔa. wè, miǐ cî ga ki cɛ́n gáa gī nyabiɛnnɛ lèʔ. 8Kire tiʔɛ gáà nī gè, a kapiile ni 'còdiʔɛ taa nɛ̀ nyabiɛnnɛ felide ti mìɛni líɛ nɛ̀ wáa mi nɛ̄ fànʔa kajuulo lire kɛnmɛ nɛ̄ bè. Á kire bɛ̀ʔ gè, a Fànʔa Siɛnrɛ tire 'laa wè, kapiile ni 'kùu wī.

9Gbíɛn wè, bà Fànʔa Siɛnrɛ tiì puu baa wèʔ, mi 'puu sìi nɛ̄. Nɛ̀ sí ki taa bà fànʔa kajuulo ni kɛ́nì pɛn lè, a kapiile ni 'koli nɛ̀ nyɛ́ cígini, 10a mi 'kùu, mi wè. A ki 'kpíʔile, fànʔa kajuulo náà ni cé yɛli bè sìi kɛn wè, a ni 'pɛn nɛ́ kùu ní mi kɔli mɛ́ gè. 11Ki 'nyaa fànʔa kajuulo ni 'ki kɛn a kapiile ni 'còdiʔɛ taa, nɛ̀ mi fáanni nɛ̀ mi kpúu nɛ́ fànʔa kajuulo ní lè.

12Ki sí n'gɛ, Fànʔa Siɛnrɛ ti 'nyuɔ tiɛlɛ fùn, a fànʔa kajuulo míɛni ni 'nyuɔ tiɛlɛ fùn, ni siɛnrɛ tiī sìɛnrɛ, tiī cɛ̀nrɛ. 13A kire sí jo lé yɛgɛ gáà gī cɛ̀ngɛ gè, ki 'pɛn nɛ́ kùu ní mi mɛ́ wī lé ? ʔéʔe díɛ ! Ki 'nyaa kapiile lire ni 'kire kpíʔile, gìi ki bé tí kapiile ni wori ti- yiri kpànʔanɛ: kapiile ni 'yacɛ̀ngɛ líɛ gè nɛ̀ ki kpíʔile a ki 'pɛn nɛ́ kùu ní m'mɛ́. Kire ki 'tí, nɛ̀ yɛli nɛ́ fànʔa kajuulo ni siɛnrɛ ní dè, a kapiile ni sìpiimɛ wori ti 'sɔ́migɔ nɛ̀ yiri.

Siɛn nɛ́ kapiile cáanra wori dè

14Weli 'ki cɛ́n Fànʔa Siɛnrɛ dè, Kulocɛliɛ Pìle mɛ́ ti 'kɔ́n. Nɛ̀ sí ki taa mi wè, mi yē céri wī, nɛ ní wáayaʔawa bɛ̀ sùkulowo tíɛlɛ kapiile mɛ́ lè. 15Ki 'nyaa mi sǐ gbɛ̀ ki cɛ́n bè juuʔ, gàa mi nɛ kpínʔini gèʔ. Nɛ̀ taʔa gíi nɛ̄, gìi mi nɛ caa bèri kpínʔini gè, mi wè kire kpínʔiniʔ; gìi sí ki 'mi biɛn gè, kire mi nɛ kpínʔini. 16A ki sí yē gìi mi wè caa bèri kpínʔini gèʔ, kire mi nɛ kpínʔini wè, kire 'ki tìɛ mi 'yéri ki nɛ̄ nɛ̀ ki cɛ́n Fànʔa Siɛnrɛ tiī cɛ̀nrɛ wī. 17Kire tiʔɛ gáà nī gè, m'bɛ̀ʔ mi nyɛ́ni kire tánʔagɛnnɛ náà tári lèʔ, ki 'nyaa kapiile náà ni 'tɛ́ni mi nɛ̄ lè, lire nī.

18Mi 'tɛ́ngɛ ki nɛ̄ a ki tɔ̀ni nɛ̀ yéri mi nɛ̄ wè, kacɛ̀ngɛ kire wè mi nīʔ, kire 'jo kacɛ̀ngɛ ki cɛ wè náʔa mi céri nī dè wīʔ. Ki kpíʔile láa kire tɔ̀ni yē mi nī, bè sí kacɛ̀ngɛ kpíʔile gè, kire ki wè baaʔ. 19Ki 'nyaa kacɛ̀ngɛ gáà mi nɛ caa bèri kpínʔini gè, mi wè ki kpínʔiniʔ; kapiʔi gáà sí mi wè caa bèri kpínʔini gèʔ, kire mi nɛ kpínʔini. 20A ki sí nyaa gìi mi wè caa bè kpíʔile gè, kire mi nɛ kpínʔini gè, m'bɛ̀ʔ mi nyɛ́ni ki kpínʔiniʔ; kapiile náà ni 'tɛ́ni mi nɛ̄ lè, lire nī.

21Mi kɛ́nì kire tiɛlɛ náà nyaa lè: ki 'nyaa kacɛ̀ngɛ ki kpíʔile láa yē mi nɛ̄, nɛ̀ sí ki taa kapiʔi kiī bile mi táanni kpínʔ. 22Kire nɛ̄ Kulocɛliɛ Fànʔa Siɛnrɛ ti woli ni 'kpúʔɔ m'mɛ́ mi fungo nī gè. 23Nɛ̀ sí ki taa mi 'fànʔa káà kiiyɛ nyaa mi yaliiye nī yè, ki kàsii túngu nɛ́ fànʔa gíì ní mi 'cɛ́n mi sɔ̀ngirɔ nī dè. Kire fànʔa gáà gè, kiī mi yaliiye nī yè, nɛ̀ mi kpíʔile kapiile fànʔa ki kasuulewe. 24ʔé, mi tɔ̀ni yē fuunmɔ nī ! Ŋáasiɛn wi bé mi suɔ céri dáà mɛ́ dè ti waa nɛ́ mi ní kùu koligo nī gè ? 25Kpuʔɔrɔ ti 'yɛli Kulocɛliɛ nɛ̄, weli Kàfɔli Zezi Kirisi fànʔa nɛ̄ gè.

Ki 'nyaa bɛ̀ ki yē píra ŋáà nī wè, mi sɔ̀ngirɔ nī dè, mi nɛ sùkulomɔ kúu Kulocɛliɛ Fànʔa Siɛnrɛ mɛ́ dè, nɛ̀ sí ki taa bɛ̀ mi yē céri wè mi yē kapiile fànʔa láara gè.

Currently Selected:

Wurɔmiyé 7: sev

Highlight

Copy

Compare